Chicco ota ka mona edu longushu yeemiliyona N$30 keemiliyonaN$8 kOshakati

Minista womayambulepo eedoolopa noitopolwa yokomikunda Erastus Uutoni vati okwa koleka okulandifa po edu kOshakati longushu yeemiliyona N$30 keemiliyona ashike di li N$8 komunangeshefa Erastus ‘Chicco’ Shapumba.

Elelo lodoolpa yaShakati, ola lombwela oikundaneki Etine, kutya edu okwa li la landifwa po kehangano ledina Mouse Properties Ninety Eight CC, laShapumba.

MuJuni momudo 2016, elelodoolopa okwa li la landifa po edu e li tali popiwa, li shiivike nawa kwa li kutya opo matala akulu, kehangano laShapamba koshimaliwa shi fike peemiliyona N$2,5.

Edu olo kwa li nale hali longifwa ongomatala omalandifilo nonhele yokulondekela nokutulikila oubesha, oli na ounene u fike pohecta imwe oshinghwanyu heyali noli li komunghulo wopate yakula yaShakati.

Ominista ikulu yomayambulepo eedoolopa noitopolwa yokomikunda Sophia Shaningwa okwa li kwa lopotwa kutya okwa kalekele etokolo lelelo lodoolopa lokulandifa edu eli kehangano laShapumba koshimaliwa shi fike peemiliyona N$2,5.

Oshinima eshi osha ya fiyo okomhangu, ashike nee, Shapumba okwa li a findana po oshibofa eshi.

“Ominista yomayambulepo eedoolopa noitopolwa yokomikunda, koshi yokatendo 30(1) (t) komalelo eedoolopa, okatendo oka23 komudo 1992 eshi ka lundululwa, okwa li ka pitika elelodoolopa laShakati opo li landife po edu olo, li li ponhele yomangeshefelo mOshakati Extension 4, li na ounene weemita 16 177, koshimaliwa shi fike peemiliyona N$7 inamu kwatelwa oishoshela ile keemiliyona N$8 mwa kwatelwa oishoshela. Omwaalu ou inau kwatela mo oshimaliwa osho sha futwa pefimbo lokulundulula nokulongekida omikada dedu okudja kelelodoolopa okuya kedina lanakulilanda po,” Elelodoolopa osho la ti ngaho.

Elelodoolopa ola ti vali ola ka mona kutya okwa li nale kwa shainwa eudafano nehangano ledina Mouse Properties Ninety Eight, olo tali u like kutya edu ola futwa nale.

Elelodoolopa ola ti, elandifepo ledu eli okwa li la kwatela mo kutya ehangano ledina Mouse Properties Ninety Eight nali yandje omukanda oo tau ulike kutya otali ka tunga ngahelipi omanga okomisi yokutunga inai u koleka.

“Kutya etungo nali kale pamufika ngaashi omatungo eengeshefa e na okukala modoolopa,” Elelodoolopa osho la ti ngaho.

Elelodoolopa ola ti ola hala natango etungo li kale le lilonda.

Elelodoolopa ola ti etungo olo tali ka tungwa otali ka yambula po odoolopa notali ka weda keliko lodoolopa.

“Sha fimana unene, otali ka eta eemhito doilonga dihapu, pefimbo lokutunga nopefimbo tali ka tameka okulonga.

Shimwe vali, oiyemo yelelodoolopa otai ka ya pombada pamukalo weedando noishoshela yokongulu nosho yo omayakulo akwao amuni oo taa ka longifwa metungo omu,” Elelodoolopa osho la ti ngaho.

Shapumba okwa li aanya okutya ko sha koshikumungu oku eshi kwa li a dengelwa koThe Namibian Oshoondaxa, omanga omukulunhuwiliki waShakati Timoteus Namwandi a ti ota dulu ashike okunyamukula Omaandaxa.

Uutoni ina nyamukula ongodi yaye kwa li eshi a dengelwa koThe Namibian Oshoondaxa.

EEDULA HETATU DA PITA

Mayola mukulu wodoolopa yaShakati Onesmus Shilunga momudo 2020 okwa li a lombwela oThe Namibian manga edu kwa li inali landifwa po kehangano ledina Mouse Properties Ninety Eight, elelodoolopa ola mona omaindilo eengeshefa okudja komahangano e li 11, oo ta ti amwe okwa li e na oshimaliwa sha ya fiyo opeemiliyona N$150 nobiliyona imwe.

Shapumba oye umwe womwaavo kwa li va ninga omaindilo neindilo laye okwa li li li poutitano momaindilo e li 11.

Ovo kwa li va hala okulanda po onhele ei koimaliwa i dulife pwaayo kwa li ya tengenekwa okwa li va shunifwa ko, osho sha ninga Shapumba opo a kale oye a halika kelelodoolopa, osho a ti ngaho.

Konima eshi edu kwa li la landifwa po kehangano laShapumba momudo 2016, elelodoolopa okwa li la konga omunhu opo a tengeneke ongushu yedu olo, osho a ti ngaho.

Olopota yomakonakono oyo ya monika koThe Namibian oya ti, onhele oyo okwa li i na ongushu yeemiliona N$30,4 mefiku lotete laJuli 2016 noi na omauwa mahapu shaashi oi li popepi nopate.

“Onhele yongeshefa oyo tai dulu okweeta ondado iwa ngee oya ngeshefwa nawa kovalandi ovo ve i hala,” Omukonakoni osho a lopota ngaho.

Omukonakoni natango okwa ti shaashi onhele oi li popepi nopate, ovanhu vahapu ove na ehalo lokufuta ohiila i li pombada, osho tashi shi ningi shipu opo elelodoolopa li mone mo oiyemo ihapu.

Omwaalu ou u li pedu okwa li eemiliyona N$16,11, omanga oo wa li pombada eemiliyona N$45,5.