Omundjadjukuni woikwapopilitika Joseph Diescho okwa lundila omupedu pelesidente Netumbo Nandi-Ndaitwah kutya ota pitike ovanhu ovo ve li moulingilingi woFishrot opo va popye poikonga yaye yomahoololo.
“Ndee natango okwa teelela ovanhu va itavela kutya oinima otai ka lunduluka ngee a hoololwa a ninge pelesidente. Kapu na oukwashili opo.
Hamumbala twa dimbwa kutya eenghono ihadi lundulula ovanhu,” Diescho osho a ti ngaho Etivali.
Nandi-Ndaitwah, oo e li natango omuhoololwa pelesesidente woSwapo, kakwa nande a nyamukula okatumwalaka kopangodi oko kwa li a tuminwa Etivali. Ashike nee, okwa li a pulile kutya oThe Namibian oya “hala shike kuye”.
“Omu shii nge ngaa? The Namibian okwa ninga oshifo osho itandi dulu vali okulesha, shaashi keshe ashike efimbo oipalanyole yeni oi li ashike ominge naNetumbo.
“Owa hala okulongifa nge shike? Kashiwa. Kandi shi kutya onda ninga shike,” Osho a ti ngaho.
Omupedu hamushangandjai woSwapo Uahekua Herunga, nande ongaho, okwa popila ekufombinga lovanhu vamwe ovo tava popilwa oulingilingi woFishrot moikonga yomahoololo yoSwapo, ta ti kutya manga inava monika ondjo komhangu natango kave na ondjo.
“Otava lundilwa ashike ndee inava monika ondjo,” Herunga osho a ti ngaho Omaandaxa.
Oshibofa shoFishrot osha kwatela mo oohandimwe ngaashi hahende Sisa Namandje, omukulunhuwiliki wongudu yokwiimba yoNdilimani Jesse Nombanza, omupedu minista woilonga noyeendifo Veikko Nekundi, hamushanga wevava lovanysha loSwapo Ephraim Nekongo nosho yo omuunganeki woSwapo koshitopolwa shaShikoto Armas Amukwiyu.
Nande nee ovanhu ava itava tamanekelwa nande oshibofa shimwe shoimbuluma, opwa kala pu na omalimbililo kombinga yavo ve li ovapopi va fimana koyoongalele yaNandi-Ndaitwah.
‘OVA KWATELWA MO NEENGHONO’
Omundjadjukununi woikwapolitika oo e likufa moshilongo yeemwene Diescho, oo kwa li a monika e li poshoongalele shoSwapo eemwedi da pita, okwa li unene audifwa nai eshi Namandje kwa li ta yandje oshipopiwa koshitopolwa shaKavaongo Ushilo.
“Oshinima eshi shi li apa ngaha osho tashi lulumike Swapo nelelo laye,” Osho a ti ngaho okupitila koWhatsApp.
KuDiescho, Namandje navakwao ovo tava feekelelwa oFishrot inava enghena poikonga yaNandi-Ndaitwah.
“Hahende Namandje, kuyemwene, oye kwa li omufuti woimaliwa yoFishrot namwe wombaanga.
Okwa kwatelwa mo neenghono moulingilingi oo u life eeminista mbali dOkabinete modolongo oule weedula nanho omwedi ou,” Osho a ti ngaho.
Diescho okwa weda po: “Oshinima eshi itashi vatele oikongo yameme Netumbo Nandi-Ndaitwah nandenande opo a hoololwe a ninge pelesidente woshilongo omo mu na ovanhu va handuka kombinga youlingilingi.
“Ou omukalo wongudu tai pangele wokulinenepeka nosho yo okuhena ko na sha oko kwa etela oANC moSouth Africa noBotswana Democratic Party di fifwe ohoni momahoololo axuuninwa.” Okwa ti ngeno okwa li Namibia e na oveta “yapama”, ngeno Namandje okwa kalekwa manga opo aha kale vali ta longo oilonga yopaveta oule weedula donumba.
“Okwa ya mo fiyo ofingo moshinima eshi shoFishrot shilengifa,” Diescho osho a ti ngaho.
Nandi-Ndaitwah okwa li a talela po koIceland opo a lombwele omahangano opaveta avo a tulile mo ovakulunhuwikili vehangano lokukwata eeshi ledina Samherji endjidikila.
Ashike nee, oilyo imwe yomongudu oya limbililwa shaashi okwa dopa okulikaleka kokule novanhu vamwe ovo tava feekelelwa oFishrot.
“Ngee keshe umwe ote mu kambeinine moshilongo ashishe, okwa pumbwa okufikama ndee ta ti tala, ino kambeinina nge? Osho wa teelela osho?” Herunga osho a pula ngaho Omaandaxa.
Okwa ti moshilongo kamu na oveta tai kelele omufeekelwa aha kambeinine ongudu yaye yopolitika.
Omuprima minista mukulu Nahas Angula petameko loshivike eshi okwa ti: “Ngee osha kolekwa kutya ova mona oshimaliwa ndee Swapo ote va longifa va ninge oikonga, ovahoololi otave shi mono mo. Oshe likolelela kovahoololi.
“Ngee ovahoololi ve shi mono mo kutya ovanhu vamwe ava ova kwatelwa moFishrot, otava hoolola ngee eshi Meme Netumbo ta popi oshi li mondjila ile kashi li mondjila.”
Minista mukulu woilonga noyeendifo Sankwasa James Sankwasa okwa ti “inashi talwa nawa” okukala tu na ovanhu ovo tava feekelwa ndee ovo vali ve kwetele komesho oikonga yaNandi-Ndaitwah.
Ashike nee, ongovakwashiwana ve na maufemba ova pitikwa va kufe ombinga moikonga omu.
“Eyooloko otali uya kutya ovanhu vahapu otava tale ko ovanhu ava ngahelipi,” Sankwasa osho a ti ngaho.
Amukwiyu Etivali okwa ti ke na efimbo lokunyamukula ovanhu ovo tava ti kakwa li a pumbwa okukufa ombinga moikonga yoSwapo.
“Nava fye ohoni,” Osho a ti ngaho.
Oifuta ihapu okudja kombaanga tai wilikwa kuAmukwiyu oya holola kutya yee nomunangeshefa Vaino Nghipondoka ova fa va mona oshimaliwa shi fike peemiliyona N$15 odo taku tiwa onda vakwa mehangano leeshi lepangelo ledina National Fishing Corporation of Namibia (Fishcor).
Otaku tiwa vati Nekundi okwa mona oshimaliwa shi fike poN$20 000 muSeptemba 2017.
Pefimbo opo, okwa li hamushanga wevava lovanyasha loSwapo.
Oimaliwa oyo ya futa eengunga dohauto yaNombanza i fike poN$443 000 nayo oya kwatakanifwa noshinima eshi.
Okwa li e li momusholondo wovapopi koshoongalele shoSwapo koshitopolwahoololo shaHangwena, omanga Nekundi a kala nokukambeinina Swapo naNandi-Ndaitwah moshitopolwahoololo sha//Kharas naKavango.
Namandje okwa li omupopi koyoongalele yoSwapo omafiku aa kOshikoto, Rundu nOndangwa.
Ehangano laye, Sisa Namandje & Co, ola mona eemiliyona N$17,5 okudja kehangano loFischor pokati komudo 2015 no2017.
Oimaliwa imwe okwa li ya pitifwa mombaanga yehangano lopaveta laNamandje, vati ya nuninwa oinyangadalwa yoshoongalele shoSwapo shomudo 2017. Namandje Etivali ina monika opo a dule okutya sha.
Omundjadjukununi woikwapolitika Rui Tyitende okwa ti nande kapu na oulingilingi, ovanhu itava waimina Swapo.
“Ashike nee, nashi popiwe kutya moSwapo omu na ovanhu vamwe ve na oshili, ashike ovashona,” Osho a ti ngaho.
Tyitende okwa ti haa weelelo nande la piyaaneke Ovanamibia vaha mone oushili umwe wa fimana – kutya kapu nande ohokwe ya mana mo yopapolitika yokukondjifa oulingilingi molwomauwa opapolitika oo hau etele ovandjeko ovo ve li mepangelo novanangeshefa.
Oshibofa shoFishrot osha kwatela mo minista mukulu weeshi Bernhard Esau, minista mukulu wouyuki Sacky Shanghala, James Hatuikulipi, Tamson Hatuikulipi, Pius Mwatelulo naRicardo Gustavo. Vakwao omukulunhuwiliki mukulu woFischor Mike Nghipunya, Otniel Shuudifonya naPhilip Mwapopi.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
