Eengudu doilameno oda ninga omatilifo kutya otadi anye okukundafana kombinga yomutengenekwafeno mopaliamente fiyo da pewa omikanda adishe da wana po odo tadi ke di pitika di tale nawa omutengenekwafaneko moule.
Minista weliko nomawiliko eependjela Ericah Shafudah, okwa li a shiivifa omutengenekwafaneko wopashiwana woshimaliwa shi fike peebiliyona N$106.3 momutumba wopashiwana Etine oshivike sha dja ko.
Etilifo leengudu domilameno ole ya konima eenghundafana domutengenekwafaneko kwa li da udulilwa komafiku 08 Apilili.
Oshinima eshi okwa li sha shiivifwa momutumba wopashiwana Etivali, nande inapa yandjwa naana omatomeno.
Omuleli wongudu yoAffirmative Repositioning Job Amupanda okwa lombwela oThe Namibian kutya itava ka kundafana omutengenekwafaneko puhe na omikanda.
Amupanda kepandja laye lokomalungula Etivali okwa ti omikanda odo eengudu domilameno da pula oshivike sha dja ko inadi yandjwa, osho tashi imbi eemhata diye komesho.
Presidente wongudu yoBody of Christ Party Festus Thomas naye okwa twa kumwe noshinima eshi, ta ti kutya ongudu yaye oya hala okukwashilipaleka kutya omutengenekwafaneko owa pita konima wa talululwa nawa.
“Ovanhu ove tu hoolola opo tuva kalele po mopaliamente. Inatu hala okukundafana oinima ya fimana tuhe shi kutya momikanda omu na shike lela.
Otwa pumbwa kumona kutya oolyelye tava mono omauwa, omutengenekwafaneko okwa li wa etwa po ngahelipi noministili ilipipo ya mona ingapi nomolwashike,” Thomas osho a lombwela oThe Namibian ngaho Etitatu.
Thomas okwa denga omufindo kefimano lokuyandja ouyelele wa wana kovaleli, tashi va pitike va ninge omatokolo oo taa popile ouwa wOvanamibia aveshe. Okwa pula yoo vali oministili yoshimaliwa i kwashilipaleke kutya omikanda oda yandjwa ngeno manga Etivali loshivike tashi ya inali fika.
Ongudu yoIndependent Patriots for Change (IPC) oya ti oya udifwa nai ketokolo lokuundulila opaliamente komesho.
Omupopiliko wongudu Immanuel Nashinge okwa ti kutya etokolo eli ola ningwa ashike komunhu umwe.
“IPC ota holola elimbililo lakula kombinga yetokolo eli la ningwa ashike komunhu umwe komunashipundi womutumba wopashiwana, Saara Kuugongelwa-Amadhila, lokuundulila komesho opaliamente yonena – oyo kwa li ya nuninwa okukundafana oshinima sha fimana – ina yandja nande etomeno ile a pule eengudu dikwao dopolitika,” Osho a ti ngaho Etivali.
Nashinge okwa ti kutya opaliamente inai wilikwa kovanhu itava dulu ile ve li olwaamambinga.
IPC, okwa ti, ota kongo efatululo lomeendelelo komunashipundi kutya oveta ilipipo a longifa okuundulila oshinima eshi komesho, nosho yo kutya omitumba dopashiwana monakwiiwa itadi ka kalekwa inaku kundafanwa neengudu adishe ngaashi eeveta tadi popi.
Pefimbo lomapulaapulo noDesertFM Etitatu, omuleli wongudu yoNational Democartic Party (NDP) Martin Lukato okwa ti ngeno opaliamente okwa li ya itavela eshi a pula oivike ivali yokulesha nawa omutengenekwafaneko, ngeno omutumba wopashiwana inau ninga etokolo li li ngaho.
Okwa ti oivike ivali okwa li ya wana nokuyandja omikanda noku di lesha nawa.
“Ashike paife osha undulilwa komesho koshivike tashi ya. Onda pandula omunashipundi eshi a ninga ngaho shaashi oshinima sha pumbiwa,” Lukato osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
