Eengudu domilameno oda pulakuningwe omahoololo a manguluka

Ovahoololi ovo kwa li inava dula okuhoolola nomahoololo opashiwana Etitatu la dja ko neengudu dopolitika okwa li va pula opo omahoololo oupelesidente nomutumba wopashiwana a ningululwe.

Omahoololo okwa li anyanaunwa koinima ihapu ya yooloka, mwa kwatelwa eembapila domahoololo inadi wana, omikweyo diledile, omakwatafano a nghundipala okudja kokomisi yomahoololo yaNamibia nosho yo omaupyadi mokutalulula oinima.

Omukanda oo kwa li tau endaenda pokati koshiwana sha handuka owa lundile okomisi yomahoololo kutya ka ya li i na ko nasha noye liumbatela nai ovahoololi owina.

Omukanda ou okwa li wa nyolwa Etine loshivike sha dja nokwa li nokuli wa mona eyambidido okudja kovanhu ve dulife peyovi.

Omukanda okwa li tau popi kutya ovahoololi vahapu okwa li va imbwa okuhoolola eshi kwa li va shunifwa ko peenhele dokuhoololela potundi 21h00 Etitatu.

Omanyenyeto amwe oyaa kutya eenhele dokuhoololela dopakafimbo kakwa li da teelela ovanhu aveshe va hoolole neenhele dimwe dokuhoololela eembapila okwa li da pwa po ile okwa li pwa holoka omaupyakadi a yooloka opamashina oo kwa li taa longifwa.

“Okupitila meenhele dokuhoololela edi, otwa hala okupula okomisi yomahoololo opo i wapaleke oshinima eshi meendelelo, kutya nee opakuwedea omafiku omahoololo fiyo ovanhu aveshe ovo ve lishangifa omahoololo otava hoolola, ile opo ku ekelashi omahoololo aa,” Omukanda osho wa ti ngaho.

Omukulunhuwiliki wendiki lomayakulo opaveta Toni Hancox Etine okwa ti omaupyakadi oo kwa li a holoka pefimbo lomahoololo Etitatu otaa ulike okufininika ovahoololi.

Okwa ti kutya omikweyo dile, eembapila dokuhoolola inadi wana nosho yo omaupyakadi akwao okwa nyeka nawa ovahoololi omhito yokuhoolola.

“Ngee ito dulu okuhoolola . . . oshitya otashi kala efininiko lovahoololi, sha hala kutya otave shi ningi shidjuu neenghono opo u hoolole, paushili, owa nyekwa oufemba woye wokuhoolola,” Hancox osho a ti ngaho.

Okwa ti omanga oveta ya pitika ewedelo lefimbo lokuhoolola, oshinima eshi oshi na ngeno okutokolwa omanga efiku lomahoololo inali fika.
Kwaavo va hala okukondjifa oidjemo yomahoololo, Hancox okwa ti opu na ehoololo lokuya komhangu ya shiya ko.

“Ngee opu na ongudu yopapolitika ile omunhu e nae halo okukondjifa oshinima eshi, nena osho ve na okuninga okuya komhangu ya shiya ko.

“Onghee nee keshe oupyakadi kombinga yoidjemo, oshiholelwa, otau dulu okupwilikunwa meendelelo oko ngaho. Oufemba wopakaotamhango,” Osho a ti ngaho.

Omupedu pelesidente wongudu yoIndependent Patriots for Change (IPC) Trevino Forbes Etine okwa ti okomisi yomahoololo oya dopeka oshiwana.

Okwa ti ovahoololi vahapu kakwa li nande va pewa omhito opo va wanife po oufemba wavo wopaudeokoli wokuhoolola.

Oshinima eshi oshe ya konima yomapopyo kutya ovanailonga vokomina yaHusaba ve fike lwopo1 000 inava dula okuhoolola shaashi onhele yokuhoololela yokomisi yomahoololo yopakafimbo okwa li ya tembuka po nale ponhele opo omanga ovahoololi natango kwa li ve li momikweyo va teelela okuhoolola komina oko.

Oshiholelwa shimwe osha kwatela mo oDordabis, oko kwa lopotwa kutya ovanambelewa vokuhoololifa ovo va li ponhele yopakafimbo yokuhoololela opo ova fiya ovanhu ve li lwopo30 ve li momukweyo, nokoGoanikontes, oko vati ovanhu ve li lwopefele kwa li va fiwa po omanga inava hoolola.

Oshinima eshi natango okwa li yoo valai sha lopotwa ponhele imwe moSwakopmund.

“Ovanailonga vokomina yaHusab havao ashike ovanailonga va fiwa po kongudu yokomisi yomahoololo inava hoolola.

Oshilongo ashishe ovanhu okwa li va shunifwa ko kovanailonga vokomisi yomahoololo shaashi kapu na eembapila domahoololo ile molwongudu oyo kwa li tai hoololifa peenhele da yooloka ya lombwelwa kutya nai dje po ponhele opo i ye kwiikwao omanga ovanhu natango kwa li ashike ve li momikweyo.

“Ova dopeka oshiwana. Oshilongo eshi natango osha pumbwa efiku lokuhoolola. . ,” Forbes osho a ti ngaho.

Ongudu yoIPC Etitatu okwa li ya yandja omukandanyenyeto wopambelewa kokomisi yomahoololo nokwa li wa shiivifa kutya ongudu oi na ondunge yokuya komhangu yomahoololo meendelelo

Omupedu kulunhuwiliki woSwap Uranium Irvin Simataa Etine okwaanya omapopyo kutya ovanailonga vamwe okwa li va fiwa po inava hoolola ta ti “osha nenepekwa unene”, ta yandje yoo omafatululo kombinga yoilonga.

“Onhele yokuhoolola okwa li tai endaenda, okwa li ya tulwa pomukunda wetu ponhele yoilonga nokwa li ya nuninwa ovanailonga ovo hava di poilonga naavo kwa li tava longo pefimbo opo,” Osho a ti ngaho.

Simataa okwa ti onhele oyo okwa li ashike i na okukala poilonga yavo okudja po7h00 fiyo opo10h00 nokwa li efimbo olo la wedelwa fiyo opo14h30 molwomwaalu oo kwa li inau teelelwa.

Ashike nee, omapopyo otaa ti ovanambelewa okwa li va dja po ponhele opo omanga ovanailonga aveshe inava mana okuhoolola.

“Itashi shiva nandenande okukala tu na ovanhu ve li 1 000 momukweyo moule wefimbo olo la yandjwa,” Simataa osho a ti ngaho.