EEPELESENDA di li 25 dOvanamibia ovo hava mono oiyemo ohadi dulu ashike okulongifa oshimaliwa shi fike poN$521 meemumbwe nomayakulo komwedi, ehangano lomapekapeko osho la ti ngaho.
Natango, opelesenda imwe yovamoni voiyemo ohai dulu okulongifa oshimaliwa shi fike poN$40 000 komwedi.
Ehangano ledina Cirrus Capital ola ti ovamoni voiyemo okeshe omunhu a longa oule wovili momafiku aheyali a pita ndee ta futwa ile a pewa sha ongolupandu, mwa kwatelwa nounafaalama womunhumwene.
Eepelesenda 25 otadi dulu ashike okulongifa oshimaliwa shi fike poN$1 185 omanga dikwao adishe tadi dulu ashike okulongifa oshimaliwa okudja poN$2 363 fiyo opoN$16 269.
Omukulunhu womauyelele nomapekapeko wehangano loCirrus Tannan Groenewald okwa ti, eepelesenda dovanhu ovo hava mono oiyemo ihadi dulu okulongifa oshimaliwa shi dule poN$5 000 komwedi.
“Eepeleseda 43 dOvanamibia dihe na oilonga novanhu vahapu ovo ve na oilonga ve li nale moupyakadi ou, otadi limbililike neenghono,” Groenewald osho a ti ngaho.
Okwa ti oiyemo yovanhu oi li moupyakadi shaashi eendado otadi i pombada omido adishe edi.
“Ongoshinima shakula shomaxupilo, okutala moiyemo yoye mwene otaku shuna pedu – eendjabi, nounafaalama neengeshefa yoo dimwe adishe oda wa pedu,” Groenewald osho a ti ngaho.
Pakuweda po, okutala meyambidido lepangelo otaku i ombada.
Pefimbo lomutengenekwafaneko womudo 2023/2024, epangelo okwa li la tula oshimaliwa shi fike pobiliyona imwe oshinghwanyu nanho mopolohalama yoshikukuta.
Nomwaalu womaumbo oo haa mono omavatele oshikukuta owa ya pombada okudja po172 009 momudo 2023 fiyo opop364 927 momudo 2024.
MuOktomba, Okabinete okwa li ka koleka kutya komaumbo aa haa mono omavatelo okudja kopolohalama yoshikukuta okwa wedwa omaumbo e li 64 525, oo kwa li kwa teelelwa a ka pule oshimaliwa shi fike peemiliyona N$256 momudo 2025/2026.
“Okuxupa meyambido lepangelo – mwa kwatelwa eependjela dovakulupe, eependjela dikwao, oshimaliwa shokulanda oikulya noikulya yoshikukuta – okwa ya pombada moNamibia,” Groenewald a ti ngaho.
Ouyelele oo wa dja kehangano ledina Cirrus owa ti, eepelesenda 28.7 domaumbo paife odi li meebashu, okudja peepelesenda 16.0 momudo 2011.
“Payukililo, eshi osha ya pombada lutatu okudja pomaumbo e li 74 000 fiyo 217 000. Moshitopolwahoololo shaKhomas, hamumbala etata lovanhu ohava di meebashu,” Groenewald osho a ti ngaho.
“Okutala koidjemo yomavalulo omudo 2023, kandi wete po naana elunduluko liwa. Eshi oidjemo yotete kwa li ya pita petameko lomudo ou, okwa li ndi wete kutya oitopolwa aishe yomeedoolopa noyokomikunda oi fike pamwe, nande oidjemo yaxuuninwa oya holola oshili shoovene,” Osho a ti ngaho.
Omundjadjukununi woinima ya pamba oilonga Herbert Jauch okwa ti oupyakadi moshilongo owa twikila nokunaipala.
“Otu li lela moupyakadi wakula oo tau twikile nokuhololwa kokuhena oilonga, oluhepo, okuhafikapamwe nomalukanda,” Jauch osho a ti ngaho. Okwa ti oshilongo osha pumbwa elunduluko lihapu.
“Shaashi kapu na oidjemo ipe koimbinga yoinima ya pamba oilonga, ohatu tengeneke ashike kutya oupyakadi otau naipala. Eshi Namibia a pumbwa elunduluko liwa nolakola,” Jauch osho a ti ngaho.
Omupopiliko wongudu yoLandless People’s Movement Lifalaza Simataa okwa ti ekateko okudja kehangano lokuninga omavalulo laNamibia ledina Namibia Statistics Agency (NSA) mokuyandja ouyelele kombinga yokuhena oilonga ole shi ninga shidjuu mokuungaunga noikumungu yokuhafikapamwe.
Simataa okwa ti ouyelele otau yandje efano kutya ovanhu vangapi vehe na oilonga, ovo ve na oilonga yopakafimbo naavo ve na oilonga yaalushe nosho yo osho hava mono.
“Eshi otashi tu ulikile onghalo kutya Ovanamibia vahapu ove li monghalo i li ngahelipi nonghee tu na okuungaunga noshinima eshi, shaashi oshi na okukandulwa po taku talika koikondo ya yooloka opo omwaka ou u fitikwe,” Osho a ti ngaho.
Okwa ti epangelo olo tali lele ola dopa okutota omilandu di xwaxwameke etopolo leliko lifike pamwe oule weedula 30 da pita. “Epangelo, epangelo olo tali lele oule weedula 30 kwa wedwa, ola dopa okutota omilandu odo tadi wilike nokupopila etopolo leliko shi fike pamwe,” Simataa osho a ti ngaho.
Okwa ti vali oshinima shimwe tashi eta oupyakadi ou osheshi puhe na omilandu dokufininika omahango a fute oishoshela, onghe nee, otaa nyeke epangelo oimaliwa oyo tai dulu okulongifwa mokuvatela Ovanamibia.
Okwa ti omilandu odo dihe po odo ngaa tadi pitike omahangano okondje yoshilongo a monife Ovanamibia oixuna, onghee nee, nande ngeno ova pewa oilonga, ihashi vatele omaxupilo avo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
