Ovakwati veetendela ova teelela okukala mo nawa konima minista weliko nokuwilika eependjela Erica Shafudah Etine a wedela omutengenekwafaneko womayambulepo fiyo opeebiliyona N$12.8.
Eshi oshimaliwa osho epangelo la yandja keeproyeka dalo.
“Okutwikila nokuungaunga noupyakadi womatungo, omutengenekwafaneko womayambulepo owa ya pombada neepelesenda 22 okudja momwaalu oo kwa li wa tenengenekwa womudo 2024/25,” Shafudah osho a ti ngaho.
Eeproyeka dimwe da fimana da pewa oshimaliwa omwa kwatelwa eembiliyona N$2.5 domalutenda, eemiliyona N$970 dokutunga nokuwapaleka omatungo eengulu dofikola nomatungo akwao eefikola, eemiliyona N$700 dokuungaunga noikumungu yomaumbo, eemiliyona N$450 domatungo omaudano neebiliyona di li N$2.2 domatungo omeva.
Omutengenekwafaneko wopashiwana waShafudah woshimaliwa shi fike peebiliyona N$106.3 owa kalela po ewedelo leebiliyona di li N$6.2 okuyelekanifa neebiliyona N$100.1 dodula ya dja ko.
Eshi kwa li ta popi noThe Namibian Etine, omuleli wongudu yoPopular Democratic Movement McHenry Venaani okwa ti etokololokutilila oshimaliwa moinima yomayambulepo ola tambulwa ko notali ka yambula po eliko loshilongo “Onde lineekela ashike kutya epangelo otali kwashilipaleke kutya oshimaliwa eshi osha longifwa nawa okupitila mekongo loipumbiwa yepangelo lopauyelele olo itali tu shune monima keedula dinya dokukwata eetendela oko ovanhu vashona ovo ashike kwa li hava mono omauwa,” Osho a ti ngaho.
Omutengenekwafaneko owa yandja eemiliyona N$200 dokutunga oupale vape vomaudano nosho yo eemiliyona dikwao da wedwa po di li N$200 domatungo omaudano, tadi popile omulandu woSwapo wokuyambula po oshimaliwa shomaudano nokukwashilipaleka kutya omatungo omaudano opashiwana oku li pondodo yopaunyuni.
Etokolo eli ole ya pefimbo lidjuu, eshi oshipaana yetanga lokeemadi yopashiwana yoshilongo, yedina Brave Warriors, tai fininikwa okudanena omaudano omeumbo kondje yoshilongo konima ongongahangano yetanga lokeemadi yaAfrica ya mona kutya oupale vaNamibia aveshe kave li pondodo yokudanenwa omaudano opaunyuni.
OMALIUDO
Omuleli wongudu yoNational Democratic Party Martin Lukato okwa pula va pewe oivike ivali opo ovanapaliamente va ye mo nawa momutengenekwafaneko ndee tava ningi omatokolo opamufika.
“Ovanamibia ova pumbwa ouwa, notwa pumbwa okupandula omutengenekwafaneko, oo wa kwatela mo ovanhuu vahapu,” Osho a ti ngaho.
Natango, omuleli wongudu yoAffirmative Repositioning (AR) Job Amupanda naye okwa pula omikanda domutengenekwafaneko opo a ye mo nawa mudo elilongekidilele eenghundafana domutengenekwafaneko odo da teelelika di ka ningwe mongula.
Oshilyo shopaliamente shongudu yoPDM Inna Hengari okwa holola omalimbililo kombiga yoimaliwa imwe oyo ya yandjwa keeministili donhumba, ta popi kombinga yokomisi yomahoololo yaNamibia, oyo ya mona oshimaliwa shi fike peemiliyona N$438 nande opwa li pu na omikundu dakula momahoololo oupresidente nomutumba wopashiwana.
“Otwa kumifwa unene kefimbo nongee minista okwa li ngaa e na efimbo lawana omaga ina ninga omutengenekwafaneko. Ashike ohatu i moule moshivike tashi ya ngee nda yandje enyamukulo lange lopambelewa,” Osho a ti ngaho.
Omupopiliko wongudu yoAR George Kambala okwa holola kutya omutengenekwafaneko ouwa, ta pandula eshi wa tala unene kovanyasha. Ashike nee, okwa pula kutya oupale otava tungwa peni neengudu dilipipo domaudano minista kwa li ta popi.
“Otwa pumbwa okuya omivalu edi moule opo tu kale lela tu shi kutya otadi ka longifwa moshike.
Shaashi omunhu ota dulu okutengeneka kutya obiliyona imwe otashi dulika i ye momatungo, shaashi eebiliyona di li N$24 odo da yandjwa koministili yehongo otashi dulika i kaue ashike movanailonga,” Osho a ti ngaho.
Omunawino woinima yap amba omaxupilo Josef Sheehama okwa ti omutengenekwafaneko otau etifa eenghono nowa pumbwa okuxwaxwameka omayambulepo moshiwana nomeliko loshilongo, ponhele yokuwila ashike momake apuka.
Ashike nee, okwa ti eebiliyona N$2.6 odo da yandjwa kounamapya nounaimuna nomatendululo omadu inadi wana ngee taku talwa komatendululo a pumbiwa nosho yo keeproyeka moshikondo omu.
“Sha fimana unene, omawii epangelo langhundipala moikondo imwe yepangelo naa talike nawa, notash dulika shi kale sha pumbiwa okwaa wapaleka, okwaa wilika nokulopota kombinga yao opo kuxilifwe po oulingilingi nokukwashilipaleka kutya Ovanamibia aveshe ova mona omauwa, osho tashi shonopeke okuhafika pamwe moiyemo,” Sheehama osho a ti ngaho.
Ehongo ola mona oshimaliwa shi fike peebiliyona N$24.8.
“Omutengenekwafaneko woministili yefikopamwe lopaukakwashikekookanhu nonghalonawa younona owa fikama peemiliyona di li N$473.6 momudo 2025/26, omanga oministili yomaudano, ovanyasha nomayakulo opashiwana ya pewa obiliyona imwe oshinghwanyu nhatu,” Shafudah osho a ti ngaho.
Minista woshimaliwa okwa ti vali oshimaliwa eshi osha kwatela eyambidido leepolohalama dokuyambula eewino nokuyandja eewino.
Oministili youndjolowele nomayakulo opanghalafano otai ka mona oshimaliwa shi fike peebiliyona N$13.3.
“Elalakano okushonopeka omangafifi ooh aa kala moipangelo yepangelo nokuxwepopeka omayakulo aeshe koonono.
Okwa talika yo vali nawa kovanailonga moshikondo shoundjolowele, nosho yo kelando noinima yopaundjolowele,” Shafudah osho a ti ngaho.
Oministili yoyeendifo otai ka mona oshimaliwa shi fike peebiliyona N$2.7. Pakuweda kokweendelelifa omalutende, oshimaliwa eshi natango otashi ka vatela mokumanifa oeproyeka deendjila odo tadi longwwa paife, mwa kwatelwa eendjila dokomikunda odo da ya keefikola noupangelo vashona.
Eebiliyona di li N$2.6 momudo 2024/25 oda yandjwa koshikondo shounamapya nounaimuna nomatendululo omadu.
“Eshi osha kwatela mo oshimaliwa shokuyambula po eesystema doikulya, nosho yo eepolohalama doikunino mwa kwatelwa oshikako oshitivali shoproyeka yokutekela oimeno koNectar Dam, mokati kadikwao,” Shafudah osho a ti ngaho.
Omeva noinima yomefuta oya pewa oshimaliwa shi fike peemiliyona N$956.5.
Shafudah natango okwa shiivifa omutengenekwafaneko woshimaliwa shi fike peebiliyona N$14.6 doministili yaye mwene yeliko momawiliko eependjela, odo da kwatela mo eebiliyona N$7.2 deependjela.
Oministili yetanga leameno noipambele yomeumbo oya mona eebiliyona di li N$7.5 omanga ikwao ya mona eebiyona N$7.9, omanga oshikondo shoveta noministili youyuki noyoipambele oilonga da pewa eemiliyona di li N$601 neemiliyona di li N$494.1, opo di nghonopeke omayakulo opaveta.
Ombelewa yapresidnte oya mona oshimaliwa shi fike pobiliyona oshinhwanyu nhano, epangelo natango ola yandja eemiliyona N$100 kehangano lonyama laNamibia neemiliyona di li N$320 koTransNamib.
Oshimaliwa sheemiliyona di li N$350 osha fiwa po sha nuninwa oinima yopaulumomumbwe.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
