Ehangano lokatanga kokeemadi laNamibia olo la mbangolota ledina Namibia Football Association (NFA) ola itavela okufuta hamushangandjai walo mukulu Franco Cosmos oshimaliwa shi fike peemiliyona N$4.7.
Eshi osha kwatela mo oshimaliwa tashi futwa lumwe shi fike poN$456 000 nosho yo ondjabi yoN$70 00.
Ehangano eli ola kala li li momumbwe yoshimaliwa oule weedula dihapu, onghalo oyo ya fininika olutu wiliki li ehele epangelo oshimaliwa opo li dule okuya komesho momaudano.
Paife otaku tiwa kutya ehangano ola kala nokufininikwa opo li fute omukulunhuwiliki walo umwe nokumushuna moilonga.
Cosmos tete okwa li ha longele oNFA ongahamushangandjai okudja momudo 2020 fiyo a tewa moilonga muApilili 2022.
Okwaalukila kwaye kehangano mulotete laOktoba 2024 okwa kumwifa ovalanduli vetanga lokeemadi.
Ouyelele oo wa monika koThe Namibian owa ulika kutya Robert Shimooshili, oo e li pelesidente wehangano paife, okwa li nale ombangi yekufo moilonga laCosmos momhangu yoipambele yoilonga omanga kwa li ina hoololwa a ninge pelesidente wehangano.
Cosmos okwa ka nifa oshibofa.
Oministili yoilonga, nomakwatafano oikwafaabulika nokutota oilonga Etine oya koleka kutya Shimooshili okwa li ombangi.
Ashike nee, eshi Cosmos kwa li a ninga etalululoindilo letokolo lomhangu yoilonga komhangu yopombada odula ei, oNFA, oyo i li koshi yaShimooshili, inai kondjifa oshibofa eshi nande okwa li ya yandja omukanda tau ti oi na ehalo lokukondjifa oshinima eshi.
Eshi osha eta omalimbililo kombinga yoshinima eshi nosho yo kombinga yekwatelamo loNFA moshikumungu eshi. Eedjo oda ti oungudu ovo ve li mehangano lokatanga kokeemadi ova dopa okukondjifa oshibofa eshi komhangu, osho tashi fininike ehangano li fute oshimaliwa shihapu kuCosmos.
Momafiku 23 Apilili, oNFA okwa li ya yandja omukanda tau popi kutya oi na ehalo lokukondjifa etalululoindilo.
Momafiku 11 Mei, omhangu okwa li ya yandja edimbulukifo kutya etalululoindilo otali ka ningwa moule womafiku 60 nokwa li ya londoda ku kufwe omilandu da pumbiwa opo ku kwashilipalekwe kutya oinima aishe oya ningwa pefimbo.
Nande okwa li kwa yandjwa elombwelo eli, kapu na nande omikanda dimwe kwa li vali da dja keembinga adishe fiyo omomafiku 4 Oktoba, eshi kwa li omukandaudafano wa yandjwa kuhaende woNFA.
Tete oNFA okwa li ya tya Cosmos okwa alulwa kuwanifwe po osho tashi pulwa kehangano loInternational Federation of Association Football (Fifa), ashike omikanda odo da monika koThe Namibian otadi kondjifafana noshinima eshi. Omikanda oda holola kutya eembinga edi mbali okwa li di na eudafano pondje yomhangu nande Cosmos okwa kanifa oshibofa shokomhangu yoilonga.
“NFA na fute Cosmos oshimaliwa shi fike poN$456 000 tashi futwa mo ile manga omafiku 30 Novemba 2024 inaa koya,” Omhangu yopombada osho ya ti ngaho.
“Oilonga yaCosmos ipe noNFA nai tameke mefiku omo va shaina eudafano eli, ndee tai twikile oule weedula nanho okudja mefiku va shanina eudafano eli,” Osho ya weda po ngaho.
Cosmos ota ka kala ta futwa oshimaliwa shi fike poN$70 800 keshe komwedi.
“NFA okwa itavela okufuta Cosmos oshimaliwa shi fike poN$850 000 keshe kodula, osho tashi ka futwa moipambu i fike pamwe alushe manga ku na efiku limwe omwedi u fye moule weedula nanho,” Omukanda womhangu osho wa ti ngaho.
Eudafanotwokumwe eli okwa li la shainwa momafiku 27 Septemba 2024 kuShimooshili.
Hamushandjai woNFA Charles Siauya okwa shaina oumbangi woNFA. Cosmos okwa shaina eudafano naAlicia Pienaar ongombangi.
Pelesidente mukulu woNFA Ranga Haikali okwa ti ou oo naanana omukalondjiikilile kwa li a hala ufye pefimbo laye.
Okwa ti ovanhu “ohava ningi eshi va hala moNFA medina lomauwa avo vene omanga ovadanauki tava mono oixuna”.
“Osha yela kutya okwa alulwa shaashi ove li mongudu imwe. Eshi kwa li nde mu tula pedu okwa li a danena etulopedu olo. Okwa [Cosmos] kwatela komesho omulandu oo wa kufa ko ewiliko alishe loNFA, ashike elalakano okwa li okukufa nge mo ongopelesidente, nokwe shi pondola,” Osho a ti ngaho.
Haikali okwa ti etokolo inali kumwifa ovanhu.
“Otashi kumwifa ngahelipi ngee pelesidente oo e li ko paife oye kwa li ombangi yaCosmos pefimbo loshibofa komhangu yoilonga?”
Omupedu pelesidente woNFA mukulu Izak Fredericks okwa ti okwa li pu na eudafano pokati kovakufimbinga kutya elelo alishe itali longo nawa.
“Elelo loNFA ola kala nomilandu dapuka dokuninga omatokolo, moilonga kamu na elongopauyelele nomu na yoo omikalo dokulongifa oshimaliwa tadi nyikwaanyikwa,” Osho a ti ngaho.
Ehangano eli lokatanga kokeemadi olaanya okunyamukula oThe Namibian kombinga youyelele ou upe.
Shimooshili okwa u kifa omapulo kuSiauya.
Siauya oshivike sha dja okwa pula omapulo opo a yukifwe kuye, ta ti: “Onda hala u ude ko oshinima nawa, inandi hala okuudika ko epuko.”
Ashike konima okwa yukifa omapulo kuhaende woNFA, Sisa Namandje & Company.
The Namibian okwa ya kuSisa Namandje & Company nokuhaende Ndateelela Alexander, ashike ina nyamukulwa ko nande.
Cosmos oshivike shinya sha dile ko okwa ti eudafano ola fiya la yeleka oinima aishe kombinga yaye.
Eshi kwa li a pulwa kutya omolwashike ta longele ponhele oyo ta lundile kutya oye mu ninga nai, Cosmos okwa ti: “Ngeno onda futilwe mo ngeno otashi dulika sha kala shi li xwepo, ashike kandi wete ngee opu na oshimaliwa.”
Cosmos okwa li a tewaatewa koFifa Normalisation Committee (NC) konima eshi kwa li a monika ondjo moibofa itanho yomoibofa omuwoi oyo kwa li ta tamanekelwa. Oibofa ihapu yaCosmos okwa li ya etwa kuHaikali oo kwa li a yandja ouhamushangandjai kuCosmos, ashike Cosmos vati okwa ngongosheka ongudu aishe i mu tanaukile ndee ta kwatela komesho ekufoko laHaikali koupelesidente woNFA muDesemba 2021.
Cosmos ota lundilwa kutya okwa yandja otendela yongushu yoshimaliwa shi fike peemiliyona N$2.3 kehangano loKalahari Dunes Trading nokwe shi ninga pakunuka po omilandu dimwe odo di na okulandulwa.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
