Eindilo lyonkalo yopaulumwempumbwe moshilongo omolwonkalo yokwaana iilonga

Hah Kadhila Amoomo okwa popi kutya onkundana yomaso gaagundjuka yatango, mboka taku hokololwa kwa li taya kambadhala okuyuga otayi gandja ethano kutya onkalo yokwaana iilonga moshilongo oya yaga kegonga notayi hwahwameke aagundjuka ya longe omiyonena opo yi imonene sha shomboloto.

“Ngiika shika otashi kala etukulutho kepangelo lyetu opo onkalo yokwaana iilonga maagundjuka yi talike ko ongonkalo yopaulumwempumbwe,” osho a popi ngaaka.

Ndhoka Amoomo okwe dhi popi okupitila kiikundaneki ye yopankalathano komalungula, mEtitatu.

Hahende okwa popi kutya epangelo olya pumbwa okukatuka onkatu yomeendelelo opo onkalo yokwaana iilonga moshilongo yi yapukilwe molwashoka ngashingeyi aagundjuka otaya longo iimbuluma.

“Omundjandjukununi gwopankalathano ngoka ke ewete ko oye ngoka ke ena konasha noshiponga shoka twa taalela ongoshigwana,” osho a popi ngaaka.

Amoomo okwa li oshitopolwa shongundu yaakalelipo yopaveta mboka kwa li taya popile aanandjungu Michael Amushelelo naDimbulukeni Nauyoma osho wo oshilyo shomutumba gwopashigwana Inna Hengari konima sho ya tulwa miipandeko pehololomadhiladhilo lyonkalo yokwaana iilonga moshilongo, ndyoka lya ningwa mesiku lyemanguluko numvo.

“Kehe gumwe e na omeho nomakutsi okuwete kutya oshe etithi shoshilonga shoka shombuluma oshe etithwa koshike,” osho Amoomo a popi ngaaka.

Hahende okwa lombwele oThe Namibian kutya kapu na ngoka e li nawa pamadhiladhilo ta popile iilonga yiimbuluma, ashike inashi pumbiwa opo kwi idhimbikwe oshizemo shokwaana iilonga, okwaathikepamwe nondjala, noshizemo shoka ohashi kala sha kwatela mo aantu taya idhopo miilonga yiimbuluma.

EYAHO LYAAFEKELWA

Amoomo okwa zi mokalungu sha landula onkundana ndjoka yi ingaana miikundaneki ongula yEtitatu sho aalumentu yatano taku hokololwa ya yahwa nokudhipagwa kopolisi yaNamibia opamwe nopolisi yoshilandopangelo popepi nOkahandja, sha ningwa ongulohi yEtiyali.

Sigo oompaka, opolisi inayi pititha uuyelele wothaathaa kombinga yoshiningwanima shoka, ashike oya popi kutya aafekelwa mboka oya li ya hamano nonande gumwe okwe shi pondola okufadhukapo nokuliwe mokashoko. Omupopiliko gwopolisi moshilongo, omupevikomufala Kauna Shikwambi mEtitatu okwa popi kutya onkene ya tegelela olopota yothaathaa okuza kukomanda gwopolisi yoshitopolwa shaTjozondjupa.

Okwa koleke kutya omufekelwa omutihamano onkene ta kongwa, naafekelwa mboka okwa li ya landulwa kopolisi pethimbo ya ndopa okuyuga ondunda yomashina gokundombola iimaliwa, mOvenduka.

Aafekelwa mboka yatano oya yahwa nokuhulitha mopate yopokati kaVenduka naKahandja pethimbo kwa li ya tidhwa kopolisi.

Omukuluntu gwehangano lyomakwatho gopaveta oLegal Assistance Centre, Tony Hancox okwa popi kutya omatompelo ngoka taga etitha opo uuyelele womuule kaawu gandjwe mbala moshigwana kombinga yoshiningwanima shoka otashi vulika ga kale kutya omolwashoka omakonakono oge li natango metifa ishewe opo uuyelele mboka kaawu ete onkalo yomalimbililo.

Okwa popi kutya opolisi kaye na uuthemba wokuyaha uuna yu umbwa kaafekelwa, ashike oye na owala uuthemba wokwi igamena uuna ye wete kutya oonkalamwenyo dhawo odhi li moshiponga, nenge ye wete kutya opu na oonkalamwenyo dhaantu dhi li moshiponga.

Hahende Norman Tjombe okwa popi kutya oomwenyo dhaantu ayehe odhi na okugamenenwa po kutya nee otashi pula shike.

Okwa popi kutya opolisi otayi vulu okupitikwa yi longithe oonkondo uuna taya umbwa, naashoka ohashi vulu okwe eta aafekelwa ye ehamekelwe mo noonkondo nenge nokuli ya dhipagwe kopolisi.

“Opolisi oya fa owala kehe gumwe, oyi na uuthemba wokugamenenapo oonkalamwenyo dhawo uuna ye li monkalo ya nika oshiponga,” osho Tjombe a lombwele oThe Namibian ngaaka.

Olopota kombinga yoshiningwanima shoka inayi pitithwa omolwomakonakono ngoka taga ningilwa pehala lyoshiningwanima osho wo omufekelwa gumwe ngoka e li we natango mokashoko kopolisi.

Uuyelele mboka owa kolekwa komupopiliko gwopolisi yaKhomas, Silas Shipandeni.

“Ondjayi yetanga lyopolisi [Joseph Shikongo] okwa gandja elombwelo opo kaaku gandjwe uuyelele wa gwedhwa po sigo ya mana okutula kumwe olopota yoshimbuluma,” osho a popi ngaa.