ELIDOPEMO lopapolitika otali piyaaneke emanguluko loikundaneki yaNamibia, ehangano lokuninga omapekapeko lomoshilongo osho la ti ngaho.
Tannan Groenewald, omukulunhu womauyelele nomakonakono kehangano ledina Cirrus, okwa ti Namibia okwa kanifa oukwatya waye ongoshilongo shi na oikundaneki ya manguluka muAfrica.
Ouyelele ou wa yandjwa ko Reporters Without Borders Press Freedom Index, otau ti Namibia okwa dja pondodo 80.91 momudo 2023 mounyuni e ya pondodo 74.16 momudo 2024.
Oiyelekifo yopolitika oya ulika kutya Namibia okwa li e li ponomola 29 momudo 2023, okuyelekanifa noponomola 45 momudo 2024, omanga oiyelekifo yomaxupilo oya ulika kutya Namibia okwa li e li ponomola 21 momudo 2023, okuyelekanifa noponomola 29 opo e li neudo, noiyelekifo yeameno oya ulika kutya Namibia okwa li e li ponomola 22 momudo 2023 ashike neudo oku li ponomola 34.
Groenewald okwa ti Namibia okwa wa pedu mounyuni kombinga yokulopota oikwapolitika.
“Papolitika: Efimaneko lokuikundaneki okuyelakanifa nefininiko lopapolitika okudja kepangelo nemanguluko lokulopota eenghundana dopapolitika ola ulika kutya Namibia okwa shuna pedu okudja ponomola 29 opo a li momudo 2023 a ya ponomola 45 mounyuni momudo 2024.
“Omaxupilo: Oulingilingi nokatongotongo mokuyandja omaliko epangelo nosho yo oinima ihapu ya kwatakanifwa neemumbwe dopamaxupilo komilandu depangelo okwa ulika kutya oshilongo osha shuna monima okudja pondodo 21 okuya po29,” Groenewald osho a ti ngaho.
Okwa popya kutya Namibia okwa shuna monima okudja po29 fiyo opo35 kombinga yemanguluko lovatoolinghundana noikundaneki opo i longe puhe na omangabeko, eendjidikila dopaveta ile omangabeko a pitilila kokuyandja omaliudo.
“Onghalafano: Efininiko kovatoolinghundana vaha pule kombinga yomahangano amwe epangelo ile exwaxwameko ile vaha lopote oikumungu yonghalo yoshilongo, nokuponokela oikundaneki shi na sha noikumungu ngaashi youkakwashikekookanhu, oukwamuhoko, eendodo nosho yo omaitavelo okwa holola kutya Namibia okwa shuna monima okudja ponomola 18 fiyo okonomola 43.
“Eameno: Kombinga yokudula okumona kutya, okwoongela nokwaandjakaneka eenghundana nomauyelele puhe na oupyakadi womahepeko, omalushindo, omatilifo ile okukanifa oilonga, Namibia okwa wa pedu okudja ponomola 22 fiyo oponomola 34,” Osho a weda po ngaho.
OMIKALO DA YELA
Eshi kwa li ta popi noThe Namibian Etivali, omuhongi koshiputundilo shedina Namibia University of Science and Technology Phillip Santos okwa ti opu na omumbwe yokukonakona omukalo oo kwa li wa longifwa opo omapekapeko aa a mone ouyelele ou.
“Omikalo nadi kale da yela kutya okwa li naana kwa longifwa shike pakweeta po eendodo edi. Opu na omumbwe yokukonakona omukalo ou wa longifwa okweeta po eendodo edi,” Osho a ti ngaho.
“Eendodo edi, da shunifwa pedu, nadi konakonwe kutya okoiyelekifo ilipipo da tala, ile eyooloko kombinga yaasho tadi lalakanene ile ngee opu na omayooloko pokati kaasho tadi lalakanene.
“Otwa pumbwa okutala kutya oshike sha konakonwa ile sha talika nosho yo omukalo oo wa longifwa okuninga omatokolo. Oinima ei oya fimana mokuyandja eendodo. Efimbo limwe owa pumbwa okutala kutya olyelye e li pombada,” Osho a ti ngaho.
Ouyelele womapekapeko owe ya konima ehangano lokwaandjakaneka omawi momhepo laNamibia ledina Namibian Broadcasting Corporation (NBC) kwa li tali finywaafinywa notaku lipulwa kombinga yemanguluko lalo mafiku aa shi na sha netokolo lokutula pedu omunyanyangidi akula Anna Nicodemus.
Nicodemus okwa li moshipyu konima yomapulaapulo noradio yomudidmbe yaSouth Africa yeenghundana, yoNewzroom Afrika, omo a popya kutya omuhoololwa pelesidente waNamibia Netumbo Nandi-Ndaitwah okwa li e lidenga po oikando ivali pefimbo loikonga yomahoololo.
Omapopyo aye, nande onghao, okwa kolekwa kutya okwa puka kehangano ledina Namibia Fact Check. Omundjadjukununi woikwapolitika Ndumba Kamwanyah okwa li a tya etulopedu laNicodemus otali eta omalipulo kombinga yemanguluko loikundaneki.
“Otashi kumwifa ngee omutoolinghundana okwa taalela eenghatu deputudo shaashi a holola omaliudo ile eshi a yandja ouyelele oo wa pumbiwa koshiwana,” Osho a ti ngaho.
OMAUPYAKADI
Omukulunhuwiliki wehangano ledina NMT Media Foundation Zoé Titus okwa ti oshinima eshi shaNamibia ta shuna pedu memanguluko loikundaneki otashi ulike omaupyakadi kemanguluko loikundaneki, mwa kwatelwa elidopemo lopolitika nosho yo omafininiko oo haa imbi ovatoolinghundana va longe va manguluka.
“Omaupyakadi amwe kombinga yoshinima eshi omwa kwatelwa okuwilika osho omunhu ta popi, okushunifa pedu omakonakono opaikundaneki nosho yo oshiwana shihe na ouyelele, osho shi li tashi nghundipaleke omilandu dopaudemokoli,” Osho a ti ngaho.
Titus okwa ti, ouyelele wa yandjwa kehangano ledina Reporters Without Borders Press Freedom Index owa ulika oshinima tashi ningwa tashi kumwifa, unene ngaa kombinga yelidopemo lopapolitika nefininiko lovatoolinghundana.
Titus okwa ti nghee Namibia e na okumona vali oukwatya wokukala e na oshilongo shi na oikundaneki ya manguluka muAfrica otashi ke likolelela kepangelo lipe koshi yewiliko lomupelesidente mupe.
Okwa ti okwe lineekela kutya elelo lipe “otali ke litula mo memanguluko loikundaneki, emanguluko lokuyandja omaliudo nosho yo okumona omauyelele”.
“Ashike osha fimana okudidilika kutya oshiwana osha fa shi na ohokwe moikumungu yemanguluko loikundaneki nosho yo eudeko lavo kombinga yemanguluko loikundaneki.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
