Epangelo lyOswapo olya longa po oshindji kombinga yUuhaku

PETHIMBO ta egulula pambelewa Iitopolwa yimwe yUuhaku mOshipangelo sha Eenhana moHangwena mEtitano lya zi ko, Omupresidende Hifikepunye Pohamba, okwa ti Epangelo olya ninga po oshindji lela shi na sha nUuhaku woshigwana.

Omupresidende ta ti, Epangelo lye olya tunga Iipangelo nUupangelo moshilongo ashihe notali tsikile noku shi ninga.Ta ti kakale kIipangelo, nUupangelo, Epangelo olya tunga wo oosikola, oondjila nokweeta omalusheno koshigwana oshowo omeya niiyakulitho yilwe yi ili noyi ili.Ta ti ngashi ngaa mIitopolwa yilwe moshilongo nomoshitopowla sha Hangwena namo wo omwa tungwa oshindji, ngashi iipangelo noshowo ooklinika nosho tuu. Ta ti Iipangelo iinene ya tungwa moshitopolwa sha Hangwena ongashi , shoka sha Eenhana, sha Ngela nosha Kongo omanga Ooklinika nadho wo odha tungwa mo odhindji. Omupresidende Pohamba ta ti, kakele kiipangelo nooklinika, Epangelo mOhangwena olya tunga mo oondjila ngashi ndjoka onene ya Nhuno nEenhana, ya tulwa oteya omanga pethimbo ndika, li ipyakidhila nokutunga nokutula oteya ondjila onene ya Elundu mOhangwena noRundu mOkavango. ‘Ondjila ndjika sho tatu popi ngeyi, oyi li metifa niiloonga otayi yi nawa komeho,’Omupresidende Pohamba ta ti ngawo nokutsikila ko ta ti nonande pu na yamwe mboka taya ti kutya Epangelo itali longo sha, shapo kaye shi sho ya hala kutya. Ta ti Epangelo otali longo iinima yi wetike notayi vulu okugumwa noonyala, naamboka taye shi pataneke, shapo ngele itaya vulu oku yi mona nenge oku yi guma naye yi lathe ano nelaka nenge nomalaka gawo. ‘Shihengehenge osha katikamwe, nEpangelo itali vulu shili okugwanitha po ayihe pethimbo limwe. Otaka ende ngaa taka yala nolwoozi lumwe sigo ka gwanithila po ayehe oompumbwe dhawo,’Omupresidende Pohamba ta ti ngawo.Omatungo gamwe ga tungwa mOshipangelo shomEenhana moka, oga tungwa niimaliwa ya gandjwa kIilongo yilwe ngashi unene ku Amerika, ano kEpangelo lya Amerika nOmupresidende Pohamba okwa pandula noonkondo, omapangelo giilongo yopondje ngoka, unene a pandula kondandalunde olya America ndjoka lya kwatha metungululo lyoshipangelo shEenhana noodola dha Namibia oomiliona mbali oshinkwanu ndatu lwaampoka.’Yakwetu mbaka, otaye tu kwathele molwashoka oye shi mona noku shi dhimbulula kutya natse ohatu kondjo nokwiihumitha komeho tseyene,’ Omupresidende Pohamba ti ngawo.Manga Omupresidende ina popya kwali, Oministeli yUuhaku Omundohotola Richard Nchabi Kamwi, okwa ti kutya omushangwahololo gwa gandjwa pokati komumvo 2008 nomumvo 2010, Uuministeli wUuhaku owo hau gandja iilonga kaakwashigwana oyendji moshilongo. Ta ti ngashi iilonga yomatungo mUuministeli we oyindji noyendji ohaya kutha ombinga miilonga moka. Kombinga yIipangelo nUuklinika, Uuministeli we owa ninga po oshindji lela. Ta ti, Iipangelo iinene ngashi shoka sha Rundu nosha Shakati oya opalekululwa notayi opalekululwa noyendji oya mona iilonga omanga mbyoka iishona ngashi shoka sha Tsandi, Okahao, Onandjokwe, Katima Mulilo, namo omwa kutilwa aagundjuka taya longo miilonga yomawapalekululo. Omagumbo gaapangi pOklinika ya Shaango oga pwa nale okutungwa omanga Oklinika yo CDC pOshipangelo sha Kongo nEngela nadho wo dhi li pokupwa notadhi ka egululwa nziya pambelewa opo dhi vule okugandja nawa omiti dhokulepeka onkalamwenyo yaamboka ya kwatwa kombuto yo HIV. Okwa lombwele Omupresidende, Pohamba kutya oshipangelo shEenhana osha nenepekwa sigo tashi kala shi na oombete 52 nOklinika yEpango lyOpetameko. Oklinika ya Ongha nayo oshowo nokutulwa pOklinika yi na oombete hetatu, omanga nee Oshitopolwa shika shOshipangelo sha Eenhana, opo sha egululwa, sha thikama mIitopolwa itatu yEpango lyopetameko neopaleko lyokila yOmidhimba, ya longwa po muule wethimbo lya zi ko nokugwnaithwa po. Oklinika ya Nambutu noya Shaango nayo wo oya tungwa kumwe nomagumbo gaapangi, ayihe kumwe ya kutha pomokapandi kOoN$1,784,944.39 nOoN$5,058,821.50. Okapangelo ka Mungwelume nOnangolo nawo wo otawu opalekululwa, omanga hoka ka Namunama, Omuhongo, Onamafila noondunda dhaapangi nayo yi li pokutamekiwa nokutungwa. Epinga nOhaukelo nawo wo ota u longwa. Kamwi ta ti,molweendo lwembo lyiimaliwa yomumvo 2008/2009 oya mona oshimaliwa shi thike pOoN$8,912,805.90 okuzilila ko PEPFAR, CDC noko Global Fund, okutungulula nokuwapalekulula oshipangelo sha Eenhana, Engela nosha Okongo. ‘Otatu pandula Epangelo noshigwana sha America, sho taye tu kwathele noonkondo mekondjitho lyomukithi gwo HIV/AIDS,’Ominista Kamwi ta ti.