Epangelo ola tameka omakonakono kombinga yomauyelele opaumwene ovalongifi vehangano loTelecom Namibia (TN) ve dulife po619 000 oo kwa li e livakelwa komalungula oshivike sha dja ko.
Omauyelele oo e livakelwa Olomakaya omwa kwatelwa ouyelele okudja mombelewa yapelesidente, omauyelele opaunamiti, omauyelele omahangano eedila, omauyelele opaitopolwahoololo nomawiliko eedoolopa, omauyelele oiputudilo yopombada, omahanganao oikwamina, eengeshefa doihauto nosho yo eenhele domalilo.
Oshinima eshi oshe ya konima ehangano loTelcom Namibia kwa li la pewa omafiku e li atatu kehangano ledina Hunters International li fute omwaalu uhe shiivike konima ongudu oyo kwa li ye livakela mosystema momafiku 11 Desemba.
Omukulunhuwiliki wehangano e li loTN Stanley Shanapinda mexuliloshivike eli kakwa li nande a nyamukula eshi kwa li a pulwa opo a popye kutya omwaalu oufike peni.
Ehangano lomakwatafano opamhepo li na oiyemo yokomudo i fike pobiliyona imwe oshinghwanyu nhee, ola mona omapandja e na omauyelele ovayakulwa valo e livakelwa komalungula.
Minista womauyelele nomakwatafano opaungoba Emma Theofelus okwa ti oshinima eshi otashi konakonwa komahangano aeshe a pumbiwa.
“Oministili, ehangano loCommunications Regulatory Authority of Namibia nosho yo opolifi yaNamibia pamwe noTelecom otaa konakona oshinima eshi,” Osho a ti ngaho mexuliloshivike.
Theofelus okwa londoda oshiwana opo shi kale sha tonata noshi ha landule nande oinima inai yuka komalungula.
Mokati komahangano oo a kumwa koshinima eshi omwa kwatelwa yoo oministili younamapya nounaimuna, omeva nomatendululo omadu, oministili yoikwameni, omatembu neameno, oministili yoilonga noyeendifo,oministili yomaudano, ovanyasha nomayakulo oshiwana, oministili yetanga leameno noipambele yoonakulwa vakulu, ominsitili yehongo, omaunghulungu nomifyuululwakalo, oministili yomidingonoko, omakuti nomatalelepo noministili yeeshi noinima yomefuta.
Ewiliko loshitopolwahoololo shaMaheke, Omusati, Oshikoto, Khomas noKunene nosho yo oomuni ngaashi waMbaye, Gobabis, Swakopmund, Luderitz, Karasburg, Karibib, Keetmanshoop, Rehoboth, Maltahohe nOniipa aeshe okwa kwa kumwa koshinima eshi.
Ehangano ledina Qatar Airways Namibia, Ethiopian Airlines, Redforce Debt Management, Government Institution Pension Fund, ehangano ledina Roads Contractor, Reptile Uranium Namibia, QKR Namibia noPowerCom omauyelele omahangano aeshe aa nao okwa li a etwa poluheela.
OUPYAKADI
Olomakaya Shanapinda okwa koleka oshinima eshi, ta weda po kutya ehangano e li lomakwatafano opamhepo ole lipayakadi tali konakona kutya oshinim eshi osha ya fiyo openi novanawino vomoshilongo novopaiwana kombinga yoinima yeameno lopamalungula.
“Ehangano loTelcom Namibia oli shi shi kombinga yoshinima eshi shopamalungula sha kwatela mo yoo okulivakela omauyelele ovayakulwa vehangano eli. Okudja opo, otwa kala hatu konakona oshinima ashishe nosho yo ondjudo yoshiningwanima novanawino vetu vomoshilongo nosho yo vopaunyuni,” Osho a ti ngaho.
Odula ei epangelo ola tula po oshimaliwa shi fike peemiliyona N$20 shokutota po ongudu yeameno lopamalungula lopashiwa.
Omukulunhuwiliki wehangano lokuwilika omilandu dopamakwatafano laNamibia ledina Cran Emilia Nghikembua okwa ti: “Oshiningwanima eshi otashi holola omumbwe yokukala kwa kotokiwa noyelongelokumwe opo ku kelelwe oinima yoludi eli yopamalungula iha ningwe vali moshiwana.”
Nghikembua okwa ti ehangano lokuungaunga neameno lopamalungula ola kala nokulongela kumwe noTN opo li kwashilipaleke kutya omilandu adishe da pumbiwa oda landulwa opo kukandulwe po oshinima eshi.
Okwa ti kutya Namibia ke na oveta i lile po okukelela oimbuluma yopamalungula nosho yoo yokwaamena omauyelele, ashike ehangano lokuungaunga neameno loikumungu yopamalungula otali tu omahangano aeshe omukumo opo a tameke okulongifa oinima yopaungoba oyo hai longifwa kounyuni shi na sha neameno lopamalungula.
Okwa pula ovakufimbinga noshiwana opo shi kale tashi lopota oiningwanima keshe kehangano laNamibia lokuungaunga noinima yopamalungula opo kukwashilipalekwe kutya oiningwanima ei oya ungaungwa nayo pamukalo uwa neyambidido ola yandjwa.
Opo kuxwepopekwe omaupyakadi omaponokelo monakwiiwa, Nam-CSIRT okwa yandja omayele komahangano opo a tule moilonga omilandu da wapala.
OUPYAKADI KEPANGELO
Oministili youndjololwele nomayakulo opanghalafano nayo otai popiwa kutya oya fa ya kwatelwa mo moshiningwanima omu, osho tashi dulika shi ete omauyelele a ka tulikwe komapandja apuka.
Minista woundjolowele Kalumbi Shangula ka li nande a nyamukula.
“Ohandi ke ku alukila nomanyamukulo,” Osho kwa li a udaneka ngaho.
Omukulunhuwiliki womauyelele nomakwatafano opaungoba Audrin Mathe okwa ti oministili itai dulu nande okufeekela kutya oshinima eshi shokulivakela omauyelele osha ya fiyo openi fiyo omakonakono opamufika a ningwa, ashike okwa londoda oshiwana opo shi nghonopaleke omilandu dasho deameno lopamalungula.
“Itatu ka feekela nande kutya oshinima eshi osha ya fiyo openi fiyo twa shiiva shihapu,” Osho a ti ngaho.
Mathe okwa denga omufindo kelitulemo lepangelo lokukwashilipaleka eameno lomauyelele a fimana nokupula ovo ve lile po oshinimina eshi ve shi kalele po.
Omapeko a yooloka okudja mombelewa yomupelesidente, ombelewa yomuprima minista nosho yo ombelewa yomuvalulindjai okwe livakelwa.
Omupopiliko wombelewa yapelesidente Dennis Shikwambi okwa ti ombelewa itai ti kosha manga pondodo ei.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
