OO a li nale minista yeeshi noinima yomefuta Bernhard Esau okwa ti okwa pumbwa okumona epitikilo opo a kufe oshimaliwa shi fike peemiliyona N$3,5 momaliko aye oo e li momake epangelo, opo a dule okufuta ovakalelipo vopaveta vaye.
Esau eshi okwe shi popya momukandaano oo wa yandjwa komhangu yopombada mOvenduka tau popile opo a pewe oshimaliwa tashi di momaliko aye oo eli momake epangelo.
Esau ota pula omhangu opo i yandje epitikilo opo a pewe oshimaliwa shi fike pomiliyona imwe oshinghwanyu mbali tashi di momaliko aye oo e li momake epangelo opo a dule okufuta omukalelipo wopaveta waye molwoilonga oyo a longa nale, ota pula vali kutya ngeno oshimaliwa shi fike pomiliyona imwe oshinghwanyu nhatu nasho nashi yandjwe okudja momaliko aye opo a dule okufuta ehangano lopaveta olo tali ke mu kalela po moihokolola yaye momhangu yopombada yaVenduka.
Omhupanguli ta vatele Beatrix de Jager oye kwa li a pwilikina eehelo laEsau, olo la tamanekwa komutamanekindjai Martha Imalwa, Omaandaxa.
De Jager okwa udulila oihokolola kombinga yeehelo eli komafiku 10 Juli pexulilo loihokolola.
Momukandaano umwe oo kwa li wa yandjwa komhangu omwedi wa dja ko Esau okwa ti ineshi pondola monghendabala yokumona omukalelipo wopaveta ta futwa kepangelo.
Esau okwa li a pula opo epangelo li mu pe omukalelipo wopaveta shaashi okwa li omunailonga wepangelo pefimbo opo oinima oyo ye mu
kaleka modolongo ya ningwa.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
