Hendrina Wamui okwa ti kala ta longo nokuhondama opolifi keengaba omanga kwa li ta kufa oilya moAngola shihe li paveta. Oshinima eshi okwa ti okwa kala nokushininga oule weedula nhee twa dja opo a dule okupalwifa ofamili yaye.
Waimu osho a popya ngaho.
Okwa ti ongeshefa oya kala idjuu shaashi omahangu okoAngola otaa landifwa kondado i fike puyaye.
“Paife itatu mono vali ovalandi noupu, shaashi ovanhu otava i ashike kOvaangola. Okweeta mo oilya moNamibia to kufa koAngola kashi shi pu, shaashi ohatu shi ningi hatu pitile peemalungushu.
“Ohatu pitile opo inatu ufwatu pite, shaashi ovanambelewa ovo ve li peenghaba otave tu kelele, ashike otava efa Ovaangola va pite va manguluka,” Wamui osho a ti ngaho.
“Monakudiwa onda kala handi kufa omahangu kofuka, ashike paife, molwodula oyo inai hala okuloka, paife ohandi kufa koAngola,” Osho a ti ngaho.
Wamui okwa ti ota tu kumwe napelesidente Nangolo Mbumba eshi a ti kutya ovalandi vomahangu nava pitikwe va kale tava ka landa oilya yavo vamanguluka koAngola. Mbumba mexuliloshivike okwa li a pula opolifi opo i efe Ovanamibia opo va kalande opikulya koAngola opo va wife omumbwe yoikulya ei i li moshilongo.
Eshi okwa li eshi popya koshivilo shedina Ondonga Heritage Shrine koshitopolwahoololo shaShikoto Etitano.
“Kutya nee ove shi hole ile kave shi hole, omahangu ee na okutaauluka eengaba odo, shaashi ovanhu ova fya ondjala. Ovanambelewa vopolifi voilongo aishe ei ivali otava futwa eembumbo ngee tava kendabala okukufa ko omahangu etu,” Osho a ti ngaho. Waimu okwa ti okwa teelela okukala ta ka landa oilya yaye yokulandifa a manguluka nopehe na ou te mu piyaaneke. Epangelo ola ti oshikukuta eshi shi li ko oshi djuu nai moule weedula efele.
Ruben Tropo Omandaxa okwa ti oitya ya pelesidente oya pumbwa okutulwa momishangwa. “Okwe shi popya ashike, ashike kashi li pamishangwa natango. Katu shi ngee otashi tulwa ngaa moilonga ile itashi tulwa mo,” Osho a ti ngaho.
“Ondadja kOshikango nena, ashike ovapolifi vopOnhuno ova lombwela nge kutya kave na ko na sha naashi sha popiwa, ova hala omikandeefelo.
“Otwa hala pelesidente eshi tule pamishangwa. Ndee tedi yandje kehangano loNamibia Revenue Agency (Namra) ndee tadi tulilwa poboloka yopolifi pOnhuno,” Tropo osho a ti ngaho.
Okwa ti nande efimbo limwe oha lande oilya yayekomatala omalandifilo okOshikango, ashike natango oha pulwa ashike omikandeefelo.
“Otwa hala elelo lodoolopa yaHelao Nafidi opo i tupe omikanda. Ohandi kala ndi udite nai ngee handi pulwa omikanda, shaashi elelo lodoolopa ole tu dopeka, ndee inatu hala vali okulongifa omikalo dopaumbudi fyee,” Osho a ti ngaho.
“Ngee omahangu ee li nale moshilongo, inatu pumbwa vali epitikilo tali di koNamra peengaba, ashike oda pumbwa okuya komalelelo oikandjo needoolopa.
“Nashi kale oshinakuwanifa shavo okupula ovo va landa omahangu komatala omangeshefelo, shaashi ohatu lande ashike moshilongo,” Tropo osho a ti ngaho.
Okwa ti vali ongeshefa yomahangu otai xupifa eemwenyo ndee ta pula vali epangelo opo li tule po odepo opo ovanhu tava kala tava ka landa omahangu avao.
NATANGO OSHI LI OUPYAKADI
Omukwashiwana wa Angola oo naye ha landifa wedina Secilia, okwa ti ashike ohava i nokudja kOndjiva oikando ivali moshivike.
Okwa ti oha kwatwa po luhapu kopolifi ngee a hangika e na oilya.
“Opolifi oya lombwela nge kutya nandi xulife po okupitila meemalungushu, ashike nandi pite pomuvelo. Okwa li vali twa lombwelwa natango kutya natu konge eembapila dokulandifa pitafa omahangu,” Secilia osho a ti ngaho.
Okwa ti ova pitikwa ashike va longe Omaandaxa nEtitano.
“Inatu pitikwa tu landife keshe efiku. Ohatu di ndee hatu shuna koAngola efiku limwe ashike. Otwa hala okukala hatu landifa twa manguluka, natango oshi li oupyakadi shaashi inashitulwa peembapila,” Osho a ti ngaho. Secilia okwa ti okashako keekilohalama 20 komahangu oke na oshimaliwa shi fike poN$140.
OSHA TAMBULWA KO
Ngoloneya woshitopolwahoololo shaMusati Erginus Endjala okwa tambula ko oshinima eshi sha pulwa kupelesidente, ta ti otashi va tele neenghono okulwifa ondjala.
“Onghalo ei oya nghundipala nai keengaba, noilongo ei ivali oya pumbwa okuningapo sha nghee oshinima eshi shi na okuungaungwa na shao,” Osho a ti ngaho.
OPOLIFI KAI NA NASHO
Komufala wopolifi koShana Naftal sakaria okwa Omaandaxa okwa ti ovanambelewa vaye moshitopolwa ihava kufa oikulya kovanhu.
“Otwa kala tu na oshinima osho shOvaangola tava landifa oilya mOmatala. Ashike otwa hoolola okukufa ko omahooli oo ehe li paveta ponhele yoikulya,” Osho a ti ngaho.
Omupopiliko woNamra Tonateni Shidhudhu Omaandaxaokwa ti ehangano itali ti ko sha koshinima shi li ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
