Etokolo lokuwedela omafiku omahoololo kali li paveta – ovanawino

Ovanawino ova ti etokolo olo la kufwa kokomisi yomahoololo yaNamibia lokuwedela omafiku omahoololo otali limbililike.

Etitau, elombwelo okwa la yandjwa kutya eenhele dokuhoololela nadi kale da patuluka konima yotundi 21h00 molweembapila domahoololo odo kwa li da pwa po nosho yo omashina oo kwa li itaa longo nawa.

Hahende Henry Shimutwikeni Oshoondaxa okwa lombwela oThe Namibian kutya okatendo itaka popile oshinima osho.

“Pelesidente okwa pitikwa okutokola kutya efiku lomahoololo onaini.

Momafiku 26 Septemba, pelesidente meeshiivifo lopambelewa lepangelo, komayele okomisi yomahoololo yaNamibia, okwa tokola kutya omafiku 27 Novemba otaa ka kala efiku lomahoololo okudja potundi 07h00 ongla fiyo okonguloshi potundi21h00,” Osho a ti ngaho.

Shimutwikeni okwa ti kapu na nande omhango oyo tai ti pelesidente ota dulu okutokola mefiku lomahoololo kutya omahoololo ote a undulile kefiku la shikula ko.

Okwa ti otashi dulu okukala okutala nawa kwoveta ashike.

“Opwa li omunhu opo manga otundi 21h00 inai denga, ndee omunhu umwe otashi duli e shi tale ndee ta ti opo vali opo ve ya okuhoolola mefiku lomahoololo nonghee nava efiwe va hoolole.

“Aske opu na natango eenhele dokuhoololela odo da patulka momafiku 28, ovanhu tava i mo voo tava di mo, otashi shi ningi shidjuu okuuda ko,” Osho a ti ngaho.

Omukulunhuwiliki wendiki lokuyandja omavatelo opaveta Toni Hancox Oshoondaxa okwa ti osho kwa li sha lopotwa peenhele domahoololo otashi popile lela efininiko lovahoololi.

“Ngee ito dulu okuhoolola mwolwomikweyo dile unene ile eembapila domahoololo inadi wana, oshitya osho tashi wapalele efininiko ashike lovahoololi, sha hala okutya otave shi nigi shidjuu neenghono opo u hoolole, osho tashi ti owa kufwa oufemba woye wokuhoolola.

“Okatendo ina ka taya efimbo otali dulu okulundululwa asdhike osho nashi ningwe omanga efimbo lokuhoolola inali fika, osho kwa li inashi ningwa po apa,” Osho a ti ngaho.

Okwa ti oshinima eshi otashi dulu okutwalwa komhangu ya shiya ko shaashi oyo omhangu yokuungaunga noinima yondjudo ei. “Keshe oupyakadi wa pamba oidjemo otau dulu okupwilikinwa meendelelo oko. Oufemba wopakotamhango,” Osho a ti ngaho.

Momudo 2020, omhangu ya shiya ko moNamibia okwa li li ya kaleka oidjemo yomahoololo omudo 2019 konima eshi omahoololo kwa li a kondjifwa shaashi okwa li kwa longoifwa omashina ehe na ouyelel nawa.

Omhangu okwa li ya popya kutya ovakondjifi ova dopa okuyandja oumbangi kutya Swapo okwa danena omashina oo.

“Epulo paife ole li ngee eshipaife osha wana ngaa okuningulula omahoololo ile inashi wana,” Hancox osho a weda po ngah.

“Ngee otu wete kutya oudemokoli otau danenwa, ohatu kondjifa lelalela oshinima osho.

Ohatu ti dulu okutya ngahelipi keshe Omunamibia oku na oufemba wokuhoolola ashike otwa lombwela nale ovanhu ova ye komaumbo,” Omupedu hamushangandjai wongudu yoNational Unity Democratic Oranisation Joseph Uapingene osho a ti ngaho.

Uapingene okwa ti eengudu ode lilongekoda okukondjifa omahoololo.

“Itatu kala omutumba twa mwena omanga tu wete omaupyakadi e li ngaho taa ningwa kokomisi yomahoololo ndee kapu na omunhu ta kalele po oshinima osho,” George Kambal woAffirmative Repositioning osho a ti ngaho.

Omupopiliko wongudu yoLandless People’s Movement Lifalaza Simaata naye okwa endulula omapopyo aa, ta ti ongudu yaye itai lineekel omahoololo a kale opauyelele.

“Shaashi pu na ou ta dulu okukalela po oshinima eshi mokomisi yomahoololo yaNamibia, itatu lineekele elelo olo li li mo paife li twikile noshinima eshi. Otwa pula opo ovaleli va fiye po oilonga,” Osho a ti ngaho.

Eshi kwa li ta popi koDesert FM Etine, hamushangandjai wongudu yoPopular Democrayic movement Manuel Ngaringombe okwa ti ongudu yaye itai ta,mbula ko epangelo olo tali fininikilwa ovanhu.

“Otu na okufikama ndee hatu i momapandaanda aNamibia ndee hatu ti ahowe komahoololo aa,” Ngaringombe osho a ti ngaho.

Ngaringombe, pamwe neengudu dikwao, natango ova pula ovakulunhuwiliki aveshe vokomisi yomahoololo va fiye po oilonga.

“Opo omunhu a kale ina hoolola medina lokomisi yomahoololo otashi udifa nai neenghono. Ngee oto yandje ombedi kepangelo loSwapo, ondi udite ko shaashi nande opapolitika ovaleli vongudu yoSwapo ove na oufemba wokuyandja omalombwelo kovakulunhuwiliki nokeeminista.

Ohatu yandje omalombwelo keshe efiku. Ashike kombinga yokomisi yomahoololo, eenghono dapelesidente oda xulila pokuulika ovanhu ovo,” Osho a ti ngaho.
Rui Tyitende Etine okwa ti omahoololo aa okwa danenwa koinima ya piyaana.” Aa omahoololo a piyaana otete a ningwa mondjokonona yaNamibia. Otwa yuka koZanu-PF yaZimbabwe.

Swapo oku shi shi kutya oku na oupyakadi nokwa kanifa eenghono keenhele dimwe,” Osho a ti ngaho.

Omundjandjukununi okwa ti okomisi yomahoololo oaya pumbwa okumona kutya omwaalu vovanhu vangapi va hoolola opo a mone kutya ovanhu vangapi kwa li inava mona omhito ei.

“Ngee omwaalu owa kula, otwa pumbwa okukupulashi omahoololo aeshe.” “Elolo lokuulika ovanhu ola pumbwa okutaataya ovanhu aveshe ava. Ovakulunhu vomahoololo newil;iko ova pumbwa okuya,” Osho a ti ngaho.

Pelesidente wongudu yoRally for Democracy and Progress (RDP) Mike Kavekotora okwa ti ovanhu vamwe okwa li va shuna komaumbo ndee inava dula vali okuwanifa po oufemba wavo wopaudemokoli.

“Ngee owa tale nawa oinima ei ndee to lipula,nandi lineekele oindjemo yomahoololo aa? Enyamukulo koRDP ahowe nandenande,” osho a ti ngaho.