Eengudu dopolitika onda pula presidente Netumbo Nandi-Ndaitwah a talulule euliko lomundohotola wopaunamiti Esperance Luvindao ongominista youndjolowele nomayakulo opanghalafano.
Ongudu yoPopular Democratic Movement, nande ongaho, oya popila euliko eli, tai ti okwa li lopapolitika napresidente okwa ninga ehoololo lomondjila.
Luvindao, oo e li umwe womovanhu vahetatu ovo va hoololwa kuNandi-Ndaitwah va ye komutumba wopashiwana, okwa kala nokupopiwa moshiwana okudja ngaa mexuliloshivike
Omaandaxa, omunyekadi mukulu Monica Geingos okwa li e li kaleka kokule moshiwana nomafeekelo kutya okwa xwaxwameka euliko laLuvindao.
Ndohotola tete okwa li he liyambe kombelewa yomunyekadi kopolohalama yo#BeFree campus.
Minista woundjolowlele mupe eedula da dja ko okwa kala nokupitifa omafano a yooloka e li naGeingos.
Ashike nee, omunyekadi mukulu okwe likanyuna kutya ke na mo sha nande meuliko laye.
Eengudu dimwe dopapolitika Omaandaxa oda pula Nandi-Ndaitwah opo a talulule etokolo laye ndee ta hoolola minista mupe.
The Namibian okwa uda kutya presidente okwa pula lela ongudu yaye opo i talulule euliko eli.
“Oha longo noumbangi. Okwa pula ongudu opo i ongele oumbangi,” Odjo osho ya ti ngaho, tai weda po kutya presidente otashi dulika ashike a ningulule euliko “ngee oumbangi owa koleke kutya opu na sha shapuka”.
‘KE NA WINO’
Eengudu dopolitika, nande ongaho, oda limbililwa kokuhe na owino komuhoololwa mupe.
Presidente wongudu yoRepublican Party (RP) Henk Mudge Omaandaxa okwa ti euliko laLuvindao laNandi-Ndaitwah otali tilifa.
“Eshi tashi kumwifa osheshi kutya presidente ota dulu okuhoolola omunhu ndee oinima imwe tai uya koluheela, ndee paife okwa tulwa pondodo opo ta dulu oku mu taataya divadiva.
“Epulo lange oleli: Oku na owino washike? Okwa li ashike ashiivika okupitila mehangano lomunyekadi mukulu momudo 2019,” Osho a ti ngaho.
Mudge okwa ti oministili youndjolowele nomayakulo opanghalafano oshinakuwanifa shakula, tashi pula omunhu e na owino.
“Okutala kwaashi ndi udite naasho ndi wete, Nandi-Ndaitwah itashi shiva a tule Luvindao ponhele opo . . . Oministili oyo oya pumbwa minista apama ndee kandi wete ngee okwe lilongekida,” Osho a ti ngaho.
Okwa ti omapulo kombinga yekwatafano laLuvindao naGeingos okwa pumbiwa.
“Presidente ota hoolola omunhu e li ngaho ngahelipi ina ninga omakonakono? Ovanhu vangapi va ulikwa inaku ningwa omakonakono? Onda kumwa ashike,” Osho a ti ngaho.
Omupedu presidente wongudu yoNamibia Economic Freedom Fighters (NEFF) Kalimbo Iipumbu Omaandaxa okwa itavela kutya Nandi-Ndaitwah na talulule euliko laLuvindao.
“Ohatu pula ewiliko li kendabale li ulike omunhu e na ondjokonona yakola mokuwilika oundjolowele nomayakulo oshiwana – omunhu e na owino yokweeta exumokomesho la pumbiwa nokukwashilipaleka oidjemo iwa yOvanamibia aveshe,” Osho a ti ngaho.
Iipumbu okwa ti minista ou a ulikwa ke na owino.
“Otwa itavela neenghono kutya elelo loministili youndjolowele ola fimana mokwaamena oundjolowele wovanhu vetu nokuungaunga noikumungu idjuu oyo ya taalela oshilongo shetu.
“Osha fimana opo oshinakuwanifa eshi shi pewe omunhu e na owino u shiivike nosho yo owino wa pumbiwa mokuungaunga nomaupyakadi akula opaundjolowele nokutula moilonga omilandu diwa.”
TAVA POPILE
Omupopiliko wongudu yoPopular Democratic Movement (PDM) Geoffrey Mwilima Omaandaxa okwa ti ongudu kai wete pu na sha shapuka neuliko laLuvindao.
Okwa ti Nandi-Ndaitwah okwa ninga etokolo lomondjila ndee ovo tava nyenyeta okwa li va halela po omunhu umwe pomhito opo.
“Etokolo lomondjila, shaashi inatu mona a dopa, ndee otwa pumbwa okutambula osho presidente e tu pa. Itatu dulu kutya etokolo lapuka.
Ongongudu ohatu mu halele ashike ouwa opo a kwatele komesho,” Osho a ti ngaho.
Mwilima okwa ti euliko laLuvindao olopapolitika.
“Ovanhu nava kale ve udite kutya eshi okwa li shi li papolitika ndee keshe umwe ota dulu okuulikwa a ninge minista, shaashi omukulunhuwiliki oye ha kwatele komesho oministili,” Osho a ti ngaho.
Hamushangandjai wongudu yoIndependent Patriots for Change (IPC) Christine !Aochamus Omaandaxa okwa ti okwa mona ashike kutya Luvindao olyelye konima kwa li a shiivifwa kutya oye ominista youndjolowele Olomakaya.
“Ondi shi kutya ongudu yokuninga omauliko oya ninga omapekapeko ayo nawa ndee tai mono kutya ota dulu noku na keshe osho sha pumbiwa.
“Kashi li lela nawa ngee onda ti ke na owino, shaashi kandi mu shi,” Osho a ti ngaho.
Eedula da pita, Luvindao okwa kala nokufindana.
OVAXWAXWAMEKI
Geingos Omaandaxa okwa ti ke udite ko kutya oshike ovanhu tava andjakaneke ehokololo kutya okwa xwaxwameka euliko laLuvindao.
“Onda shiiva euliko laDr Luvindao eshi kwa li sha shiivifwa pashiwana,” Osho a ti ngaho.
“Inandi popya nande efiku limwe nomuleli kombinga yeuliko lomunhu wonhumba, ile nda yandja omayele ile nda xwaxwameka euliko lopaministili.
Euliko leeminista ohali ningwa kupresidente, ndee onda kumwa eshi pu na onghendabala yoku tu pa eembedi omanga tuhe li momulandu omo,” Osho a ti ngaho.
Geingos okwa popya yoo koshikumungu shoimaliwa ya futwa okudja koministeli youndjolowele okuya kehangano laye.
“Onda handuka nonda pumbwa okukoleka kutya kandi na ile kanda li nande efiku limwe nohokwe yoimaliwa yomilandu dokukonga oipumbiwa yehangano nande olimwe lepangelo,” Osho a ti ngaho.
The Namibian okwa ninga onghendabala yokupoya naLuvindao, ashike kakwa li nande a nyamukula Omaandaxa.
Ashike nee, eshi kwa li ta popi keumbo lepangelo konima yeuliko laye Olomakaya, Luvindao okwa ti kutya euliko laye ola holola efimano lokukwatela mo ovanyasha ovo ve na ohokwe notava dulu okuwanifa po oinima.
“Ngee tashi ya komayakulo opaundjolowele, ohatu popi, oshinima shotete: okutwala omayakulo opaundjolowele keshe pamwe.
Osho osha hala kutya keshe Omunamibia, kutya nee ove li peni moshilongo, nava dule okukala tava mono omayakulo opaundjolowele opamufika,” Osho a popya ngaho mokavidio ka pitifwa koNew Era.
Okwa ti, elalakano ole li kutya “ngee omunhu wonhumba a i moshipangelo shepangelo, inava dula okukala tava dimbulukwa eyooloko pokati kasho noshipangelo shopaumwene.”
Okwa popya yo vali kombinga yomayakulo opaundjolowele opamalungula. “Eesystema detu odi hadi, neendohotola detu, ovapangi novanambelewa vouhaku ove yadi omikundu,” Osho a ti ngaho, ta weda po kutya ekandulepo lomukundu limwe okutameka okulongifa omayakulo opaunamiti opamalungula.
“Natu kwashilipaleke kutya hafye ashike hatu longo oilonga. Omalungula okwa xuma fiyo opondodo opo taa dulu okuninga ookaume ketu voshili moilonga,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
