Fila oshisho ovanhu, oinamwenyo noushitwe

Ombada Yedu otai mono oixuna koudjuu wokuwanifila po aveshe ovo ve lineekela muyo.

Mupya munene, oudjuu wakula otau di kwaavo ihava pandula, ovanhu ovo ve na efupa – oinamwenyo oyo ya pewa eenghono diwa dokuifila oshimwiyu noishitwa aishe oyo i li ko.

Okumonifa oushitwe oixuna kwamana mo otaku monika muNamibia la mbuwapala: Okudidja nodula okwa kala taku shuna pedu tashi limbililike; oulifilo woinamwenyo oyo hai li oimeno owa wa pedu, edu nalo kali na vali oushosho wa wana oo wa pumbiwa opo ku longwe oikulya ya wana.

Eshi epangelo la dimina oikwamina ihapu meenhele odo diwa nokukala oinamwenyo yomoixwa – ngaashi eenhele odo hadi kala eemanda dilaula nosho yo oshimeno sha pumba shoWelwitschia – otashi kumwifa omadilaadilo kutya oshike naana sha fininika ovaleli va kufe omatokolo oo taa tula oushitwe moshiponga.

Moule wefimbo inali hanga nopomwedi, eenhele mbali dokwiidilila oinamwenyo (Doro !Nawas noUibasen Twyfelfontein conservancies), elolo lopamufyuululwakalo laAodaman nehangano lovatalelipo Ultimate Safaris okwa li e udite a fininikwa opo a ye komhangu yopombada opo a kelele okufukula oikwamina ponhele oyo tai etele oshiponga eemanda dilaula nomatalelepo.

Oludi leemanda dilaula odi li nale moshiponga shokuxula ko filufilu ndee Namibia oye e li komesho konima eshi kwa kendabalwa okudikaleka po, odo natango tadi twikile nokukala da tanwa komaukongo ehe li paveta molwomaitavelo apuka kutya omaluvinga eemanda ohaa eta omahalo oipala nawa.

Okweeta oinima ya nyika oikwamina meenhele omo ovakwashiwana va kala nokulonga noudjuu novalonga nawa mokushonopeka omaupyakadi pokati kovanhu noinamwenyo kashi na eshi tashi eta, otashi eta ashike omaupyakadi.

Omikandapitikilo dokufukula oikwamina otadi yandjwa kwaavo hava ifwanwa kutya Ovanamibia ovo va kala va lyatelwa pedu nale ovo ve li mOvenduka nosho yo meedoolopa dimwe dakula ndee kave na ko na sha nomatalelepo, oo e li oshikondo shakula shokuyandja oilonga tashi yambidida ovanhu vokoitopolwa yokoushai mokupitila meenhele odo da idilila oinamwenyo.

Otwe lineekela ovaleli vepangelo otava ka talulula omatokolo avo oo a pukifwa okuyandja omikanda dokufukula oikwamina meenhele odo daamenwa neenghono.

Osha ninga ngaa nee efimbo lokuxulifa po efupa li nyanyaleka olo la popifaleka vahapu nohali di ashike omauwa ovanhu vashona.

Itatu xupu ngee katu na oushitwe u li nawa. Ohau tupe oikulya, omeva, omhepo noikwanghono.

Oushitwe owa pumbwa omukalo uwa tau lalakanene okufila ovanhu oshisho, oinamwenyo nosho yo oimeno, unene ngaa omiti odo hadi tu yambidida nomhepo oyo hatu fudile mo.