Hahende a holoka mompangu sho a kwatwa e li kohi yondhungo

Hahende gwomOvenduka okwa holoka mompangu lwanima sho kwa li a tulwa miipandeko mehuliloshiwike sho taku hokololwa kutya okwa li ta hingi e li kohi yondhungo.

Hahende, Henry Shimutwikeni (36), okwa tulwa miipandeko ongulohi yOlyomakaya sho taku hokololwa a adhika kopolisi ta hingi e li kohi yondhungo nokwa li a tindi okupitika opolisi yi mu fudhilithe mo osho wo okukuthwa ombinzi opo kukolekwe kutya okwa li a nwa omalovu.

Shimutwikeni ota tamanekelwa wo onkambadhala yokugandja oombumbo kaapolisi opo ye mu mangulule.
Hahende ngoka okwa holoka komeho gamangestrata Kandiwapa Nembia mOmpangu yaMangestrata gwaVenduka, mOmaandaha.

Pauyelele womompangu kombinga yoshipotha a taalela, epangelo otali popi kutya Shimutwikeni okwa li ta hingi osheenditho she omanga e li kohi yondhungo sha ningilwa mOvenduka, naasho a pulwa kopolisi opo a fudhile mo nenge a gandje ombinzi ye, okwa tindi, nokuza mpoka anuwa okwa pula a fute N$10 000 aapolisi yaali mboka ya li poshiningwanima opo ye mu mangulule.

Oshipotha she oshu undulilwa komasiku 24 Juli opo ku ningwe omakonakono ga gwedhwa po, sha landula sho omweeti gwiihokolola yepangelo Sylvia Kauluma a lombwele mangestrata kutya opolisi onkene ya pumbwa omikanda dhuuyelele kombinga yoshingwanima shoka okuza kaagandji yuumbangi yatatu mboka ya li po.

Shimutwikeni, okwa li a kalelwa po kuhahende Samson Enkali, ngoka a lombwele ompangu kutya omuyakulwa gwe okwa li a mangululwa mondjeedhililo sho a futu oboloha yooN$6 000.

Mehuliloshiwike lya piti, opolisi oya lopota kutya oohahende yaali okwa li ya tulwa miipandeko nolwanima oya mangululwa mondjeedhililo paboloha, mekwatathano noshipotha shoka shokuhinga kohi yondhungo.

Ashike hahende omutiyali ina holoka we mompangu molwashoka omweeti gwiihokolola okwe ekelehi oshipotha she netompelo ndyoka kutya kapu na uumbangi wa gwana kombinga yaashoka ta tamanekelwa.