Ovaleli vepangelo novanambelewa mutu otava dilaadila kutya otave liamene komakonakono oshiwana eshi tava henuka okwoongela omivalu domauyelele a fimana oshiwana.
Kutya nee etomeno ola shike inava halela okwoongela ouyelele upe vomavalulo oshiwana, oiyemo yomomaumbo nosho yo oinima oyo ya pumbiwa koshiwana nomwaalu wovanhu ovo vehe na oilonga okudja ngaa momudo 2010, 2015 no2018, oshipu okutya Namibia okwa yuka ashike kowii nokapu na eshi tashi ningwa po.
Omukulunhu wehangano lokuninga omavalulo moNamibia Alex Shimuafeni okwa pumbwa vali okuya kepangelo opo a ka indile oshimaliwa shi fike peemiliyona N$250 shi va tele mokwoongela omauyelele.
Omavalulo oshiwana, ohaa yandje ouyelele nomivalu oko epangelo li na okutungila keshe shimwe osho tali ningi opo li dule okukandula po eemumbwe doshiwana.
Oshiholelwa, epangelo ola shiivifa omalunduluko meendjabi dovanailonga vamwe omanga omauyelele kombinga yeyopombada leendado haa pitifwa konima yeemwedi nhatu.
Omatokolo oo ohaa ningwa kwa talwa koshike nomauyelele oo oku li mondjila shi fike peni?
Ovaleli vepangelo otava monika va fa ve hole okupewa omaushima e likolelela komauyelele ehe li mondjila taa ulike oluhepo tali i pombada nosho yo okuhafika pamwe kwoiyemo taku naipala.
Ovanapolitika otava kala tava ningi omaundaneko oikonga yeepolitika va manguluka ngahelipi vehe na ouyelele womivalu wa yela?
Opu na omaindilo oshimaliwa shi vatele omaumbo oo ihaa tema a dule okumona oikulya keshe efiku. Oimaliwa oyo oya kanghama peni ngee katu na ouyelele u li mondjila kutya ovanhu vangapi ve li momumbwe?
Epangelo letu ohali endelele okufuta ovanhu vamwe nosho yo oiwana imwe: Ovanamibia ve li lwopo40 000 ovo va dja kombada momudo 1989 keshe fimbo ovo ashike ve li komesho keshe apa tapa yandjwa omauwa epengelo.
Omilandu odo ohadi ningwa she likolelela koshike?
Otu na elineekelo kutya epangelo otali ka dilaadilulula kombinga yomavalulo, oo a pumbwa okukala oshinima shotete epangelo tali longifa oshimaliwa musho.
Ngee kapu na omauyelele oo, nena kapu na eshi tashi dulu okuningwa po.
Nefimaneko linene pelesidente Mbumba, Okabinete nopaliamente dilaadileni nawa.
Yandjeni oshimaliwa sha wana kehangano lokuninga omavalulo laNamibia opo oshilongo shi mone omauwa omauyelele e li mondjila.
Natu lipakeni mo ongoshilongo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
