Omupedu hamushangadjai woSwapo Uahekua Herunga okwa ti ongudu oya hafela oidjemo yomahoololo owina.
Ashike nande ongaho, okwa pula okomisi yomahoololo yaNamibia opo i kwashilipalek kutya omahoololo okwa enda nawa.
Eshi kwa li ta popi koDesert Radio Etine, Herunga okwa ti oidjemo oyo i li po oya holola kutya ongudu otai ningi nawa.
“Otu wete oidjemo oyo tai di kondje yoshilongo nohatu ningi nawa.
“Otwe lineekela kutya okomisi yomahoololo otai ka kandula po omaupyakadi ashona omanga omahoololo omomafiku 27 Novemba inaa fika,” Osho a ti ngaho.
Omaupyakadi amwe oo okomisi yomahoololo kwa li ye lihanga muwo Etitatu omwa kwatelwa eembapila domahoololo inadi wana nawa peenhele dimwe dokuhoololela, ovahoololi kwa li tava weelele voo kave li melandulafano novamwe itava dulu okuhoolola.
Omapopyo aHerunga okwe ya konima oidjemo ihapu yomahoololo owina Etitatu ya holola kutya ongudu tai pangele otai ningi nawa i dule eengudu dikwao moshilongo nopondje yoshilongo.
Ongudu yoIndependent Patriots for Change (IPC), Popular Democratic Movement (PDM) noAffirmative Repositioning (AR) nado otadi mono mo omawi e li xwepo.
Oidjemo oyo ya monika po fiyo opapa otai ti, okandidate koSwapo Netumbo Nandi-Ndaitwah oka mona omawi e li 21 omomawi e li 33 a valulwa koHavana, koCuba. Job Amupanda woAR okwa dja mo nomawi ahamano, kwa landula Panduleni Itula woIPC e na omawi atanho.
KoBrazil Swapo okwa mona omawi atanho omomawi ahamano oo a valulwa. KoBerlin, Germany, Nandi-Ndaitwa okwa dja ko nomawi 45, Itula 30, Venaani 15, Amupanda 14 noLandless People’s Movement (LPM) oya dja ko nomawi atatu.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
