Hidipo Hamutenya okwa ya nombili – Geingob

AANAPOLITIKA naayenda aanenentu oya li ya ngundumana kohi yomuti gwoongala oontokele noontiliganembwilili sho taya gandja esimaneko lyahugunina kunakusa Hidipo Hamutenya poshituthidhimbuluko she lwokomatango gEtitano moshinyanga shopaliamende moshilandopangelo shaNamibia. Hidipo Hamutenya okwa fumvikwa ongula yOlyomakaya komayendo omanene gomapendafule gaNamibia moshilandopangelo.

Hamutenya, ngoka a tseyika nawa koyendji nefupipikwadhina lye HH, okwa li a fumvikwa kepangelo konima sho a yambelwa uufule molwiilongapondoli ye pethimbo nokonima yekondjelomanguluko lyoshitunda Namibia.

Kuume ke kopothingo, omusamane Tuliameni Kalomoh, okwa ti Hidipo Hamjutenya okwa li a simanekwa nokwa yelwa koyendji molwuunongo we wa tsa kesipa, euvoko lye nohole ye yokuhola oshilongo nongundu Swapo.

“Swapo ka li ashike moothipa dhombinzi yaHidipo, ihe Swapo okwa li ombinzi ye,” Kalomoh ta ti. Kakele kiipopiwa tayi henda koomwenyo mbyoka ya li ya gandjwa kookuume ke; omupresidente Hage Geingob; omunashipundi omukulu gwomutumba gwopashigwana Theo-Ben Gurirab naKaire Mbuende, oshipopiwa shomonamati Kela osho sha li sha tya shoo. “Pitikeni eso lya-HH li aludhe iilalo,” Kela ta ti.

Sho a popi kombinga yuudhigu wopapolitika mboka he a li a taalela, Kela okwa ti iiningwanima yi lilitha ihe oyoshili yomonkalamwenyo yahe nayi kale omukankalandu noshilongwa kaaleli yokomongula yoshitunda Namibia opo ya hole nokusimanekathana, yo yi imange kumwe ngashi sha li muupongekwa pethimbo lyiita yekondjelomanguluko lyoshilongo Namibia.

“Kapu na omukalo gulwe, okuninga shila twa hala okundopa,” Kela ta ti.

Kela okwa popi wo kombinga yuunongo wahe wokunyola, nonkene a longitha uunongo mboka mokuholola ohole ye yokomutima. Kela okwa hokololele aalilisa kombinga yolweendonkalamwenyo lwahe mopolitika, onkene ina lila okathima koluko mokuholola nkene he a li a thiminikwa opo a thige po ongndu yopapolitika yoSwapo, nonkene iiningwanima mbyoka ya gumu nayi egumbo lyawo, ookume kawo naayehe mboka ye ya hole. Kela okwa popi kutya uudhigu awuhe owa holoka konima sho he a hogololwa a ninge omuulikwapresidente gwongundu Swapo. “Okwa li a lundilwa nokutukwa. Oku ulwa kutya omukwamuhoko, shoka shaa li nando mondjila, ngashi naana tashi vulu okukalelwa po kumboka ye mu tseya nawa,” Kela ta ti, ta gwedha po kutya munakusa he kamwa li nando uukwamuhoko.

Kela okwa popi nkene he a li hi ithanwa epuli, shoka ta ti oshi li kokule nonkalo yahe, molwashoka he okwa kutha ombinga metotopo lyekotampango lyaNamibia.

Omupresidente omukulu, tatekulu Hifikepunye Pohamba okwa pandula Kela molwuuyelele mboka e ya topolele mosheetwapo she mokuhokolola kombinga yondjokonona nolweendo lwonkalamwenyo yahe. Omupresidente gwashilongo, tatekulu Hage Geingob, okwa lombwele aakwashigwana ya lile, yo ya simaneke uufule waHamutenya.

“Ngele onda tameke okuhokolola kombinga yuukume ketu naye okuza lela komutima, osha yela kutya otatu yeni komagumbo ngula,” omupresidente Hage Geingob ta ti. Sho a popi pevumviko lyaHamutenya mOlyomakaya goshiwike sha zi ko, Geingob okwa ti okwa li i ihololelwa kuHamutenya konima yoshituthidhimbuluko ongulohi yEtitatno.

Okwa ti pethimbo ndyoka, Hamutenya okwe mu lombwele kutya ina pitika nando olye a kale u uvite a fa a patelwa pondje, nokwe lombwele kutya okwa kutha ko she nokwa ya kegumbo a ka vululukwe.

Geingob okwa ti ita dhimbulukwa ngele pamwe ondjodhi, nokwa gwedha po ta ti Hamutenya okwa ti okwa li e na omaipulo kombinga yamboka u uvite ya fa ya patelwa pondje, e ta gwedha po kutya nayi imange kumwe opo ya tunge oshilongo Namibia.

“Inamu nika uuthiga molwandje.

Maneni iilonga mbyoka mwa tameka yokutunga oshilongo shi na onakuyiwa ya hapa,” Geingob ta topolele aalilisa etumwalaka ndyoka a pewa kuHamutenya mokwaamonika.

Omupresidente Geingob okwa ti megumbo moka, Namibia, aantu otaya vulu oku ipuma mumwe nokunyenyeta, ihe shoka kashi na okuteya po egumbo.

Omutekulu gwaHamutenya, Kennedy, ngoka a popi peha lyaakwaAmutenya, okwa pandula epangelo lyaNamibia, unene omupresidente Hage Geingob, molwesimaneko ndyoka a pe nakusa.

MOlyomakaya, Kennedy okwa pandula omukokolipresidente Sam Nujoma sho a yambidhidha noku pa hekulu oompito dha yooloka. “Otwe ku pandula notu ku hole,” Kennedy ta ti kuNujoma.

Pethimbo ta file ombila yaHamutenya pomayendo gomapendafule, Gurirab okwa tenteke opena nombaapila keyendo lyaHamutenya nokwi indile aanyoli AaNamibia ya tsikile nokushanga, ya shange nuunkulungu ngashi Hamutenya a li ha ningi sho a li omutoolinkundana nomunyoli dhingi.