Iilonga yetungo lyOsasiona yOpolisi pOnandjaba itayi ende nawa nande

OMINISTELI yOpevi yEgameno nEpopilo lyOshigwana omusamane Erastus Uutoni, ngoka a li a talele po Osasiona yOpolisi pOnandjaba mOkalongo mEtitano lya zi ko, okwa ti kutya iilonga yetungo lyOsasiona yOpolisi itayi ende nawa nande notashi vulika Okampani ndjoka ya pewa iilonga mbika yi ke yi kuthwe ngele nani osho tashi ende ngawo.

Aapolisi ya Kalongo, hela ngaa ya yile mOnandjaba moka, oye li ashike taya lala moothaila nokulongela mOothaila moka nomookaravana.Minista Gwopwevi Uutoni, ota ti kutya okwa ningw anale etokolo momumvo 2009 kutya ku tamekwe nokutunga Osasiona ompe yOpolisi mOnandjaba mOkalongo moka. Ta ti iilonga mbika oya gandjwa nale kOkampani yontumba, ndjoka ya li yi na okutameka momumvo 2009 moka niilonga yokutunga Osasiona ndjika, noya li yi na okukala yapwa nale nokuli. Ashike sigo okeluwa ndika inayi pwa. Ta ti opwa tungwa ashike etungo limwe lyegumbo lyAapolisi, nokutunga po okandama kohanya, hoka inaka tungwa nande nawa notaka hala okugwila mo nale. Ko ishewe oka tungwa pomweelo gwegumbo ndjoka lyAapolisi, ndyoka, sigo okonena ndjika itali longithwa molwashoka kamu na natango omeya nolusheno. ‘Ano, omolwashike iilonga hayi pewa aantu mboka kaye yi shi yo wo itaye yi vulu? Uutoni ta ti nokupula ngawo. Ta indile ku Komanda gwOpolisi mOshitopolwa sha Musati Komufala gwOpolisi Shinedima Shindinge kutya a konaakone muule nomeendelelo onkalo ndjoka yOsasiona yOpolisi ya Nandjaba mOkalongo itayi pu kulongwa nonande ya tamekwa nale pwa pita ngashiingeyi oomvulandatu ne lwaampoka. Komufala Shindinge ta ti, opwa li ngaa Okampani yimwe ya Shoti, ndjoka ya kana po ishewe aniwa omasiku ngaka nokuthiga iilonga inayi longwa mo nawa yo wo inayi pwa. Omupeviminsta ta indile kOmanda gwOpolisi mOmusati Shindinge kutya a kale a ta la kutya aantu mboka oye li peni na omolwashike ya thigapo iilonga inayi pwa? ‘Yakwetu oshike shi li moNamibia, shaantu taya pewa iilonga, ihe otaya longo ashike oshege nokuya, taya thigi iilonga inayi pwa. Shika otu na oku shi konaakona nokutala kutya Osasiona yOpolisi pOnandjaba oya pwa okutungwa nokulala meendelelo ngashi tashi vulika,’ Omupeviminista Uutoni ta ti ngawo neyeme.Komufala Shindinge okwa lombwele Minista wo kutya shoka sha tungwa po, ano shegumbo lyAapolisi noshilambo shohanya, osha li moshitopolwa shotango shetungo lyOsasiona ndjika, nokwa hupa nee shoka oshitiyali shokutunga nee oombelewa dhOpolisi, oondunda dhokukala dhOpolisi, Ondholongo yOpolisi, Okila yOpolisi nosho tuu yilwe ya hupa ko iishona.Komanda gwOpolisi mOnandjaba mOkalongo moka, Waranda Offisa Ananias Nahango, okwa ti kutya Opolisi ye oyi li noyi ilongekidha okulonga nuupenda nonando onkalo yokukala moka yi li yi li manga ngawo. Ta ti oyi inekele otayi ka lala nawa nziya, unene tuu sho Omupeviminista Erastus Uutoni ye mwene a za momutumba e ye i italele ko ye mwene kutya onkalo yetungo lyOsasiona yOpolisi pOnandjaba oyi li naanaa ngiini.