Kakadhona ngoka a dhengwa okwa lalekwa mo moshipangelo

Kakadhona gwomimvo ntano ngoka a dhengagulwa nokwe ehamekwa kaamwayinagona megumbo tali adhika moshitopolwa shaMaheke, okwa lalekwa mo moshipangelo nokuli monkalo ohwepo ngashingeyi.

Oshiningwanima shoka osha ningilwa megumbo lya yinagona yokanona hoka moshitopolwa shaMaheke.

Omupopiliko gUuministili wUuthikepamwe, Ekondjitho lyoluhepo nOnkalonawa, Lukas Haufiku okwa popi kutya oye na omukumo netegameno kutya kakadhona ngoka ota aluka nawa.

Haufiku okwa thiminikwa a tye ko sha koshiningwanima shokanona hoka, sha landula sho okavidio ki ingaana kiikundaneki yopankalathano komalungula, taka ulike nkene kakadhona ngoka ta pulwa kutya okwa dhengelwa shike.

Okwa popi kutya oshiningwanima shoka osha ningwa pehulilo lyaJuli.

Oonakuhepeka nokweehameka kakadhona ngoka, aamwayinagona ye ye li yatatu moka gumwe e na omimvo ndatu, gumwe omimvo hetatu omanga omukwawo oku na omimvo 12.

“Uuministili owa ndhindhilika nehaluko oshiningwanima shoka shehepeko lyokanona sha ningwa omasiku ga zi ko moshitopolwa shaMaheke shoka sha kondemwa koyendji moshigwana,” osho Haufiku a popi ngaaka.

Okwa popi kutya oshiningwanima shoka tashi nyanyaleke, oshaya pambambo Oveta yEgameno nEtonatelo lyOkanona yo2015 (Oveta yonomola 3 yo2015) nokwa popi kutya oshiningwanima sha ningilwa okanona hoka “oshuumbalimbali” nosha kondemwa noonkondo kuuministili.

Haufiku okwa yelitha wo kombinga ya nkene oveta yaanona aashona hayi longo kombinga.

“Nonande kohi yoveta yaNamibia, okanona ke li kohi yoomvula heyali ita ka vulu okukatukilwa onkatu kombinga yoshimbuluma ka longa, onkene hashi vulu okuningwa uuna kwa monika uumbangi mboka wa koleka lela oshiningwanima shoka.”

Okwa popi kutya uuministili owa nongela kutya oshiningwanima shoka sha ningilwa kakadhona ngoka oshinene noonkondo, nowa popi kutya yinagona, nakuninga oshihakanwa osho wo oonakudhengagula mukwawo, ayehe otaya mono ehungomwenyo.

“Osha simana okutseya kutya oonakuyona aanona aashona lela, noya pumbwa ekwatho lyoku uva ko kutya iilanduli oyini yaashoka ya longa, molwashoka otashi vulika ya li kaaye shi shoka taya vulu okutaalela sho ya longo oshimbuluma shoka,” osho a popi ngaaka. Uuministili owa londodha oshigwana opo shi yande okulonga iimbuluma yoludhi ndoka.

“Uuministili otawu gandja elondodho koshigwana shi ikaleke kokule nokulonga iimbuluma yoludhi ndoka molwashoka otayi vulu okutulitha moshiponga mboka taye shi longo,” osho Haufiku a popi ngaaka.