Meme Olivia Mupwedi (40) gwomOngwediva okwa taalelwa keshongo enene lyokutonatela omwanamati, By-Faith Lwiishi (8), ngoka a lemana omimvo mbali dha piti kuulema tawu ithanwa Landau-Kleffner Syndrome (LKS).
Lwiishi, ngoka a valwe e li nawa keena uulema washa, ngashingeyi iha vulu we okwe enda, okupopya, okulya nokulonga sha kuyemwene.
Mupwedi okwa hokolola kutya omwana okwa li hayi kosikola nokwa li ha dhana nooyakwawo, ngaashi naanaa aanona ayehe ye li.
Yina okwa gwedhapo kutya omwana ngoka ngashingeyi oha kala owala mombete nokuli oha pewelwa iikulya okupitila mokamunino.
“Ngashingeyi ohatu mu pe iikulya okupitila mokamunino noha li owala omahini ngoka twa lombwelwa kundohotola, nuupyakadhi oomboka kutya ohaga adhika owala koophamacy. Omathimbo gamwe ohandi nyengwa koshimaliwa shoku ga landa,” osho a popi ngaaka.
Lwiishi oha pewelwa wo omiti dhe niikulya mbyoka ya nika iikunguluki okupitila mokamunino molwashoka iha vulu we okulya nomulungu ishewe iha vulu we okutaasina iikulya.
Mupwedi okwa popi kutya ota nana nondatu pashimaliwa, nonande omathimbo gamwe oha kwathelwa kaakwanegongalo yongeleka. Iilonga ohayi kala oyindji noonkondo kuye uuna e li megumbo nolundji oshinakugwanithwa okutonatela owala omwana, mwa kwatelwa okulundulula okamunino kiikulya aluhe konima yoomwedhi ne.
Nonande okwa taalelwa kompumbwe yoshimaliwa, okwa popi kutya ohi iyutha komalombwelo ga ndohotola nokuna etegemaneko kutya omwana ota aluka nenga a hwepopale.
“Onkene otandi tsikile neitaalo muKalunga opo omumwandje a aluke. Opwa li omathimbo gamwe ha kambuka nokakwa li nande ndishi kutya otandi mu ningi ngiini. Ngashingeyi otandi ende tandi tseya nawa onkalo ye naashoka ndi na okuninga monkalo kehe.”
Okwa popi kutya omwana kwa kala nokutaambelwa moombete okuza nkene a kwatwa kuuvu mboka.
“Otwa kala tatu taambelwa moombete nokulalekwa mo. Omumwandje okwa li a taambelwa moombete dhoshipangelo shaWindhoek Central, moKatutura Intermediate Hospital, osho wo moshipangelo shaShakati omumvo gwa piti,” osho Mupwedi a popi ngaaka.
Kashi shi nande oshipu, osho Mupwedi ngoka e na aanona yatatu, a popi ngaaka.
Mumwayinagona gwaMupwedi, Kristine Nghilokwa (35) okwa popi tati: “Ota monika a fa e na oonkondo, ashike oto vulu okumona kutya ota nana nondatu. Oha longitha oshimaliwa oshindji, niilonga mbyoka e na itayi vulu oku mu kwathela a gwanithe po oompumbwe dhe yemwene nodhoyana.”
Nghilokwa oti indile epangelo li kwathele Lwiishi mpoka tali vulu opo a vule okumona epango miipangelo yopaumwene opo a mone ndohotola a pyokona nota opalele omayakulo ngoka taga vulu okuhwepopeka mbala onkalo yokanona.
Pauyelele wandohotola gwomOvenduka, Adelinu Celestinu, uulema mboka hawu etithwa koLKS, ohawu kala wa pumba maanona nogwa konekiwa maanona ye li pokati koomvula ndatu noomvula hetatu, nolundji omaanona mboka okwa li ya valwa ye li nawa nomuundjolowele.
Ohagu vulu owala okukwathela pamiti nenge okupitila metando opo shi hwepopeke onkalo ye.
Kombinga yokupopya, okanona otaka vulu okulongwa okupopya nohashi vulu okwe eta iizemo yi li nawa molwashoka okanona ohaka vulu okutameka taka vulu okupopya iinima yimwe.
LKS owo uulema mboka hawu kalelele. Aanona yamwe ohaya vulu okutameka taya popi natango nenge oku uva ko shoka tashi popiwa, omanga yamwe ohaya nyengelelwa.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
