Kamatyona Mutumbulwa ka fumvikwa kengathihi pOmusimboti

OKAMATYONA komunangeshefa a tseyika nawa gwomOngwediva tate Peter Mutumbulwa, kedhina Peter Mutumbulwa koomvula omulongo hoka kamana oondjenda ombaadhilila sho ka si omeya metale lyokomukunda gwawo kOmusimboti mUukwambi mOshitopolwa sha Shana, sha ningwa omutenya gwEtine lyoshiwike sha zi ko, oka fumvikwa kengathithi enene lyaalilasa pOmusimboti okuzilila pegumbo lyaakuluntu yako mOngwediva mOsoondaha ndjika ya zi ko.

Oshituthihupulitho naashoka shefumviko lyako, osha li sha kalwa kAakuluntu yako tate Peter na meme Maria Mutumbulwa, kAamwayina yaakadhona, kAakwanezimo, kAawiliki yomoondondo dhi ili nodhi li, ngashi kOokaansela yIitopolwa nOondoolopa, kAaleli yOpambepo noyopamuthigululwakalo, kAanangeshefa, kaashiinda, kAalongisikola yako noshowo kAanasikola yakwawo, kookuume kako oyendji lela noshowo kaalilisa ya za koombinga noombinga dha dhOshitopolwa nIitopolwa yilwe moNamibia. Engathithi lya li mpoka, olya li enene lela, noyendji, mwa kwatelwa naavali ya nakusa Peter nguka, oya li ye li kuminwa noonkondo. ‘ Eeno, oya tondokelwa shili noya mona omahekeleko okuza koombinga noombinga shili,’ yamwe ya ti ngawo.Nakusa Peter, ngoka a kala pegumbo lyaakuluntu ye mOngwediva nokwa li ha sikola pOsikola ya Charles Anderson mOngundu ontine, aadhika ta yi mongundu ontintano, okwa adhikile a yi kefudho kOoyinakulu kOmusimboti. Metine pamwe nayakwawo oya yile ya ka yoge metale lyomomukunda moka, nashi ya yi mo ya yoge, Peter okwa si omeya.Eso lye olye ehameke oyendji.