Mokati keelopota kutya Angola okwa didilika omukifi wepulu loondjima wedina mpox moshilando pangelo shaye, Luanda, Epangelo laNamibia ola ti oshilongo paife ngaha kashi na nande omiti deevenda domukifi ou.
Oshinima eshi oshe ya omanga natango ovanhu tava twikile ashike okuuya moNamibia tava di moAngola keengaba kOshikango, ovakwashiwana tava ve ya ashike nokudja moilongo ei ivali keshe efiku tava landifa ile tava talele po eefamili.
Omukulunhuwiliki woministili youndjolowele nomayakulo opanghalafano Ben Nangombe okwa koleka kutya kapu na omiti deevenda edi.
“Katu na mo eevenda dompox moNamibia natango. Nande nee oda pumbiwa neenghono konima mpox kwa li wa kolekwa kehangano loundjolowele lopaunyuni, ovalongi vomiti edi vahapu ove lineekela kehangano eli opo li mone oilongo oyo i li unene moshiponga,” Osho a ti ngaho.
Nangombe okwa ti epangelo otali kendabala okumona omiti edi.
“Namibia ke li umwe womoilongo oyo ya monika kutya oi li moupyakdi wakula wompox. Ohatu longo nomahangano oiwana ya hangana opo e tu vatele tu mone nghee tu na okumona omiti edi noupu,” Nangombe osho a ti ngaho.
Oministili youndjolowele nomayakulo opanghalafano oya koleka kutya mpox owa monika poushiinda Angola.
Nangombe okwa ti omunhu ou a monika omukifi ou omukwashiwana waCongo oo e li nokuli e li kalekelwa moshipangelo moLuanda paife.
Momukanda wa nyolwa Omaandaxa Nangombe okwa kwashilipaleka oshiwana kutya Namibia natango okwa tonata, puhe na nande omunhu a monika oumukifi ou wompox fiyo onena.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
