Kandjii-Murangi otashi vulika a tidhwe miilonga

Ombelewa yomupresitente uunambo oya popi kutya omupresitente ota ka tidha miilonga minista gwelongo lyopombanda, Itah Kandjii-Murangi ngele opwa monika uumbangi kombinga yomapopyo ngoka ta tamanekelwa gokulongitha pambambo
oshimaliwa shi li poomiliyona N$1,5.

Shoka osha landula sho omuleli gwongundu yo-Affirmative Repositioning (AR) Job Amupanda e eta puuyelele okupitila komalungula kutya Kandjii-Murangi okwa kala ti imonene oshimaliwa shomauwanawa gomalweendo okuza kiiputudhilo shaNamibian University of Science and Technology (Nust), the University of Namibia (Unam), Namibia Training Authority (NTA) osho wo United Nations Educational, Scientific and Cultural Organisation (Unesco) Namibia.

Omupopiliko gwomupresitente Hage Geingob, oye Alfredo Hengari, ngoka a popi kutya Geingob ota ka katuka onkatu uuna pwa monika uumbangi kutya Kandjii-Murangi okwa longa uulingilingi mokwiimonena oshimaliwa shoka.

“Ngele omu na uushili, okomisi yokukondjitha uulingilingi yoAnti-Corruption Commission otayi vulu oku shi konakona.
Pethimbo ndyoka, omupresitente ota kutha onkatu a kuthe koshipundi minista ngoka, ngaashi kwa li sha ningilwa oominitsa yalwe yaali. Osho oshipotha shotango sholudhi ndoka menenevi Africa, ngele kashi shi muuyuni,” osho Hengari a popi ngaaka.

Okupitila kepandja lye lyokiikundaneki yopankalathano komalungula, Amupanda okwa popi kutya Kandjii-Murangi okwa longa uulingilingi nokwa li a kutha oshimaliwa shooN$140 000 okuza koNust, oshimaliwa shi li pooN$400 000 koUnesco osho wo oshimaliwa shi li pooN$300 000 koNTA eshi ningi shaali pauyuuki.

Amupanda okwa popi wo kutya minista ngoka okwa li i idhimbike elombwelo lyompangu ndyoka kwa li lye mu lombwele a fute oondjo dhoomiliyona N$4 ndhoka e na dhoDevelopment Bank of Namibia.

Kandjii-Murangi ina yamukula omapulo ngoka a pulwa konzonkundaneki ndjika uunambo. Ashike nando ongaaka lwanima sho onzonkundanek ya kwatathana naye, okwa popi kutya “okwa li i ipyakidhila noshinima shimwe” nokwa popi kutya iikundaneki oteyi galukile nale.

OSHA KOLEKWA

Omupopiliko gwaNust, John Haufiku okwa koleke uunambo kutya oshiputudhilo shawo osha yakula eindilo okuza kuuministili momasiku 5 Juli 2022 opo shi fute minista oshimaliwa shomalweendo.

Okwa popi kutya eindilo ndyoka okwa li lya pewa epitikilo kelelo lyaNust opo minista a futwe oshimaliwa shooN$140 600 momasiku 3 Febuluali 2023. Okwa popi kutya oshimaliwa shoka osha futwa konima shoNust a pewa elombwelo okuza komukuluntuwiliki guuministili welongo lyopombanda, Alfred van Kent, ta pula opo oshiputudhilo shi fute minista iifuta ye yomalweendo gokuya koKorea.

“Uuministili kawa li tawu vulu okufuta pethimbo, oshimaliwa shomalweendo gaminista, nonkene okwa li wi indile oshiputudhilo [shaNust] shi fute, noshimaliwa shoka okwa li tashi futululwa kuuministili uuna tawu vulu oku shi ninga,” osho Haufiku a popi ngaaka.

“Alikana ndhindhilika kutya omupevikansela gwaNust, Erold Naomab, kali mo mombelewa pethimbo lyiifuta mbyoka, ayehe mboka ye li melelo oyo kwa li ya ungaunga niifuta mbyoka. Onkene, kadhi shi dhoshili okupopya kutya omupevikansela oye a futu oshimaliwa shoka,” osho Haufiku a popi ngaaka.

“Kapu na oshinima oshipe sha ningwa kombinga yiifuta mbyoka, shika oshikondo owala dhepangelo shoka shi li kohi yuuministili mboka kwa li sha kwathele epangelo [mokufuta] opo shi longithwe miipambele yelongo lyopombanda.”
Omupopiliko gwaUnam, Simon Namesho, ina vula okumonika a tye ko sha.