Kapena ontompa natango posikola Oshigambo

NONANDE kwa li kwa tokolwa kutya kombanda yomulonga gwa Shigambo pOshigambo mOndonga mOshitopolwa sha Shikoto ku tungwe ontopa opo Aanasikola yAakadhona mboka ye na Omuhandjo gu li kombanda yomulonga noshowo aanasikola mboka haya zi komikunda noshigwana shoshene ya vule okweenda ko uuna ya thinda kOsikola ya Shigambo, sigo oompaka inapu tungwa ontopa ndjoka.

Edhilaadhilo lyokutunga ontopa kombanda yomulonga gwa Shigambo olya li lye ya po unene sho omunasikola gumwe noshilyo shEtanga lyEgameno ya si omeya sho okambautu hoka ka li ka humbata aalongwa ta ke ya pititha omulonga ka kandomene pokati komulonga ngoka mu Apilili omumvo gwayi.Oministeli Onkuluntu Nahas Angula, ngoka wo a longwa pOshigambo mpoka kwali, okwa gandjele oshimaliwa ongetamekitho lyokutungitha ontopa ndjoka, ashike, Omunashipundi gwElelo lya Shikoto, Max Nekongo, ngoka wo e li Kaansela gwOshikandjohogololo sha Nayena,ota ti Oshikondo shOondjia omumvo aguhe inashi longekidha po sha shokutungitha ontopa ndjoka. Ta ti omasiku sho ga li 14 Desemba omumvo gwayi, oya li ya gongala nOshikondo shika shOondjila pOshigambo mpoka, mpokwa pwa li pwa tokolwa kutya ondjila ndjoka ya za mwaandjoka ya Nandjokwe nEenhana ye ya mOshigambo, ya enda momulonga ngoka, yi lukwe ndele tayi tungilwa ontopa mpoka ya taaguluka omulonga ngoka. Nenge, molwashoka okwa toka, ku tungwe ontopa yopakathimbo ngashi ndjoka ya tungilwe moshana sha Ngela omimvo dha zi ko. Shi ningwe ngeno meendelelo, oshoka okwa toka nomvula oyi li po kuya yo wo Osikola yili pokutameka. Kaansela Nekongo ota ti kutya nonando pwa ningilwe etokolo lya tya ngawo lya endelela, Oshikondo shOondjila inashi ninga po sha nande sigo oompaka. Shoka sha ningi po, Kaansela Nekongo ta ti, osho ashike ndele tashi ka tameka nokutungulula uutompa uyali wi ili mondjila yongalama ya Shigambo nOndobe, ndjoka wo ya enda kombanda yomulonga nguka gwa Shigambo. ‘Oshinima shoka sha endelela oshokutunga ontopa kombanda yomulonga gwa Shigambo mOshigambo shoshene opo aanasikola noshigwana ya vule okweenda ko, haku ka tunga kuutompa mboka, Oshikondo shOondjila shi ipyakidhila ko nokutunga ngashiingeyi, ‘ tate Nekongo ta ti. Ta gandja wo eyeme lye sho Oshikondo shOondjila sha tameka okulonga uuntopa mboka sho inashi uvathana oshinima shoka nElelo lya Shikoto nenge ngaa na Kaansela gwOshikandjohogololo shoka sha Niipa tate John Shiindi. ‘ Kandi uvite ko nande kutya Oshikondo shOondjila omolwashike tashi longo ngawo, omolwashike tashi tu ningi ngawo,’ Max Nekongo ta nyenyeta ngawo mEtitatu lyoshiwike shika pOshigambo mpoka nokwiindila kOshikondo shOondjila shi luke mbala ondjila ya ya mOshigambo nokutungwe meendelelo ontopa, nande oyo ngaa nee ndjoka yopakathimbo manga, opo aanasikola noshigwana shi vule okweenda ko, oshoka omvula otayi loko nale nokwa tegelelwa natango omulonga ngoka gu ka udhe omeya nokukelela ngeyi aanasikola naakwashigwana ya ye mOshigambo.Omukuluntusikola gwOsikola yOpombanda ya Shigambo, Hendrick Shikonda, okwa ti kutya oshinima shokuhatunga ontopa kombanda yomulonga gwa Shigambo oshinima tashi mu ipulitha unene, oshoka Aanasikola kumwe naavali naakwashigwana onkee taya uhala taye mu pula ontopa ndjoka nokugandja uumbanda wawo kombinga yomeya gomulonga ngoka, ngashi ga lile omunasikola nomukwiita omvula ya zi ko. Shikonda ta ti omoluumbanda womeya ngoka, aanasikola yaali yomwaamboka ya li moshiponga shekandomo lyokambautu omvula ya zi ko, omvula ndjika oya thiga po Osikola ndjoka nokuya kOosikola dhilwe. Kaansela Shiindi naye ota ti aavali yomOshikandjohogololo she shoka nayo onkee taye mu pula oshinima shoka shontopa ya Shigambo. Taya ti aniwa kutya oye na uumbanda okutuma aanona yawo kosikola hoka manga inaku tungwa ontopa kombanda yomulonga ngoka. Kaansela Nekongo ota nyenyeta wo kutya okantopa taka tungululwa mondjila ya Shigambo nOndobe pomukunda Onahima popepi nOshigambo otaka tungwa kwa toka nokandjila hoka ka ningwa po mooha oko ku endwe manga okantopa haka taka tungwa otaka vulu nokuya kohi yomeya meendelelo nokwiimba aantu ya longithe ondjila ndjoka.Omupopiliko gwOshikondo shOondjila, Hilen Fillemon okwa ti kapena manga oshimaliwa shiilonga mbyoka.