Kuugongelwa-Amadhila ta lombwele mboka ye na iilonga yoponto ya thige po yepangelo

SAARA Kuugongelwa-Amadhila, ominista onkuluntu, mOmaandaha okwi indile aaniilonga yepangelo mboka taya longo iilonga yopaumwene pethimbo lyiilonga yepangelo yi ikuthe miilonga.

Oshifo shika osha kundanekele kutya olopota yaPricewaterhouseCoopers yomo2012 oya tile aaniilonga yepangelo ihaya holola uuyelele wu li mondjila kombinga yohokwe yawo moongeshefa dhopaumwene. Oyendji yomaaniilonga yepangelo oya holola kutya omulandu gwokutseyitha iilonga yoponto ina gu yela gwo ihagu gwanithwa po kaanambelewa aakuluntu – aakomeho yawo.

Aaniilonga yepangelo okwa lopotwa taya longitha oonzo dhepangelo mokuyambula po oongeshefa dhawo dhopaumwene, unene tuu muuministeli wuundjolowele.

Oopelesenda 73 dhaaniilonga muuministeli wuundjolowele oye na iilonga yoponto. Yamwe ohaya longitha ethimbo lyawo lyopambelewa momitumba dhomawilikongundu gomahangano galwe.

Shika otashi nkundipaleke omayakulo gepangelo. Ndhika minista Kuugongelwa-Amadhila okwe dhi popi pethimbo ta popitha oohamushanga aakuluntu yiikondo yepangelo naanambelewa yamwe aakuluntu mepangelo kombelewa yomupresidente moshikumungu shehwepopeko lyomuyo gwokutula miilonga oompangela dhepangelo.

Okwi indile aanambelewa ya konaakone ngele aaniilonga yepangelo mboka ye na oongeshefa dhopaumwene otaya gwanitha po tuu iilonga yepangelo, nongele hasho, ye yi thige po nokwiitula moongeshefa dhawo.

Minista okwa holola wo kutya omulandu gwokuganita aaniilonga yepangelo mboka ya hala okulonga iilonga yopaumwene ponto yiilonga yepangelo ogwa manithwa, naaniilonga yepangelo otaya ka pulwa ya tule mo omaindilo goku ya pitika ye shi ninge nziya.

Okwa ti aaniilonga otaya ka pulwa ya holole ohokwe yawo moongeshefa nosho wo omaliko gawo.

Shika, minista ta ti, otashi ningwa opo aaniilonga yepangelo yi itule mo miinakugwanithwa yawo yopambelewa nokukeelela ethigathano inaali pumbiwa pokati kepangelo noongeshefa dhopaumwene.

Esiku lya hugunina lyokuninga egano ndika sigo onena inali tseyithwa.