Mbumba ita kufa omunhu moilonga molwoushenge

Omupopiliko wapelesidente Alfredo Hengari okwa ti pelesidente Nangolo Mbumba ita kufa nande minista wouyuki Yvonne Dausab moilonga.

Oshinima eshi oshe ya konima ehangano olo li li ominge nomashenge neehombo dovanhu voukakwashikekookanhu la pula opo Dausab a kufwe ile a xulipe po oilonga moule weevili 48.

“Ovanhu ihava pewa oilonga ta kutalwa komaukwatya avo opamakwatafano,” Hengari osho a lombwela oThe Namibian onghela ngaho.

Hengari okwa ti pelesidente ota wilikwa kekotamhango, olo aanena kutya ote ke li fimaneka moilonga yaye.

“Namibia oshilongo shekotamhango noudemokoli, osho ihashi tongola ovakwashiwana vasho medina loukakwashikekookanhu nomaitavelo avo,” Hengari osho a ti ngaho.

Ehangano olo tali wilikwa kuPendapala Nakathingo, hali ifanwa Stop Homosexuality and Same-Sex Marriage in Namibia, ola lombwela oikundaneki kutya otali ka ninga ekangha lakula momafiku 12 Auguste.

Nakathingo okwa ti ehoololo laDausab ongominista youyuki oli li ominge noufemba wovanhu ovo itava popile omashenge.

“Omaliudo etu oku li apa kutya katu uditile ombili omunhu oo ta xwaxwameke oshinima osho inashi pumbiwa koshiwana,” Osho a ti ngaho.

Nakathingo okwa ti, ehangano kali li ominge naDausab ongomunhu, ashike inali tambula ko ehoololo laye ongominista youyuki.

Okwa ti ehoololo laDusab kali li pauyuki kwaavo va dalwa ovalumenhu novakainhu naavo va hala okukala ngaho.

“Ngee okwa dopwa okuningwa osho hatu pula ongovalumenhu, ovakainhu, ovadali, ovamati noukadona voshilongo eshi, nongo tu li ovahoololi ovo va tula epangelo koshipundi, ohatu pula omahoololo,” Omukanda osho wa ti ngaho.

Ehangano natango otali pula opo pelesaidente Mbumba a shaine omalunduluko omokatendo kohombo nefatululo loshitya ovalihomboli ngaashi onotwaveta yopaumwene tai pula moule weevili 48.

Nakathingo okwa ti omanga ovanhu tava pitikwa va ninge eshi va hala meenduda davo dokunangala, oveta yeehombo dovanhu voukakwashikekookanhu umwe otai piyaaneke omadilaadilo ounona.

“Katu li ominge navo ashike otu li ominge naasho tava ningi. Oshinima shoushenge kashi shi oshinima sho moshiwana, onghee nee inashi pitikwa.

Otu va hole ashike katu hole onima oyo hava ningi,” Osho a ti ngaho.

Odula ya dja ko okwa li kwa ningwa omunyanyo tau pula pelesidente Hage Geingob opo a kufe Dausab moilonga meendelelo.

Omufitaongalo weongalo ledina Jesus Centre Haruna Goroh okwa ti opu na oinima ihapu oyo ina oshilonga ya pumbwa okulikundwa ngaashi ovanhu tava fi kondjala, ponhele youshenge. Ashike nee, Goroh okwa ti okwa itavela mombili, ndee ngee ovanhu vahapu ova hala Dausab a kufwe moilonga, pelesidente na pwilikine kuvo.

“Pelesidente okwa pumbwa okukala e litumba ndee ta pwilikine kovanhu ndee ina kala ta pwilikine komawi okondje yoilongo oo taa xwaxwameke oinima i li ngaho iheshi yOvanamibia nOvafrika. Inamu kala mu na oilonga i li ngaho mopaliamente minista ta kufa ombinga ndee ta longifa omaukwatya aye opo a xwaxwameke oinima yaye.”