Mepakumo ashike leisho yo ohombo oya teka

Omupedu minista woilonga noyeendifo Veikko Nekundi okwa hala oshinima shokukala to yambidida omukulukadi woye ile omushamane woye noshimaliwa nande okonima eshi mwa topoka ngee ita dulu vali okulikwafa ile okuwanifa po eemumbwe daye opo shi kufwe mo monotwaveta yokuteya ohombo, okwa ti kutya oshinima eshi kashi shi nande omufyuululwakalo wOshiafrika.

Etivali ominista yoyuki Yvonne Dauseb okwa li ya yandja onotwaveta oyo ya kala ya teelelwa nalenale komutumba woshipashiwa.

Nekundi eshi a kufa ombinga meemata edi okwa ti okukala omunhu ta yandje omayambidido opashimaliwa kashi shi omufyuululwakalo wOshiafrika, ndee ta weda ko ta ti kapu na Omuafrika hai mohombo molwomaliko, ashike ohava i meehombo molwohole.

“Natu kaleni ashike Ovafrika. Inandi mona nale opaliamente yaEuropa tai longifa omufyuululwakalo waAfrika nande oumwe. Okuteya ohombo kaku shi nande oshinima shomeenghedi detu,” Osho a ti ngaho.

“Ohandi kelele oshinima ashishe eshi tashi popiwa apa. Kapu na nande oshinima tashi popile oshinima shi li ngaho,” Osho a ti ngaho.

Oshinima eshi okwa li sha patanekwa koshilyo shopaliamente shongudu yoLandless People’s Movement Utaara Mootu ta ti kutya momifyuululwakalo dimwe dOshiafrika omunhu natango okwa teelelika a kale ta yandje omayambidido oshimaliwa nokonima ohombo ya teka.

“She likolelela komifyuululwakalo dOshiafrika edi Nekundi ta popi, owa teelelika natango opo u kale to file oshisho omukulukadi woye mukulu, unene ngaa ngee okwa li mwa hombola pamufyuululwakalo. Mutu mofamili yoye osha yooloka,” Osho a ti ngaho.

Natango vali, oshilyo shimwe shoSwapo Tjekero Tweya osha pula opo onotwaveta ei i kalekwe manga fiyo kwa fatululwa oshitya ‘ovalihomboli’.

Okwa li ta popi onotwaveta yopaumwene oyo i li ominge neehombo domashenge, oyo tai ti ohombo ehangano pokati komukainhu nomulumenhu. Onotwaveta ei okwa li ya yandjwa kopaliamente odula ya dja ko.

“Itatu pitike nande onotwaveta ei fiyo omafatululo a tulwa meeveta,” Osho a lombwela omutumba wopashiwana ngaho Etivali.

Tweya okwa li ta yandje omaliudo aye kombinga yonotwaveta yokuteya eehombo.

“Oudjuu ou li apa kutya onotwaveta otai ti ovanhu nava filwe oshisho, ashike inai popya nawa kutya ovalihomboli oolye. Ovalihomboli oolyelye? Otu wete kutya ounona ava va tumbulwa omu ova fatululwa,” Osho a ti ngaho.

Shimwe vali, ominista younamapya nounaimuna, omeva nomatendululo omadu Calle Schlettwein okwa ti ovadali ove na oshinakuwanifa shakula shokufila ounona oshisho fiyo va fika mepupi loukulunhu.

“Oshinima eshi sha fimana oshe shi kutya ounona nava kale ve na oufemba wonghalamwenyo iwa. Ovadali aveshe ove na oshinakuwanifa shokuvafila oshisho, okatendo inaka tya ko sha opokukwashilipalekwe oshinima osho,” Osho a ti ngaho.

Oshilyo shongudu yoPopular Democratic Movement Elma Dienda osha twa kumwe naasho sha pulwa kuTweya kutya onotwaveta inai kundafanwa omanga onotwaveta yopaumwene inai shainwa i ye moilonga kupelesidente Nangolo Mbumba.

“Ondi udite kutya onotwaveta ei inai lixwa po. Omanga puhe na efatululo loshitya ‘ovalihomboli’ ohandi kala nda hala okuundulila onotwaveta ei komafiku 26 Juni nondi na elineekelo kutya moulefimbo oo ohatu pukulula omapuko oo e li mo,” Osho a ti ngaho.Onotwavete ei tete oya li poshitaafula shomupelesidente mukulu Hage Geingob ashike paife oi li naMbumba.

Omupopiliko wapelesidente Alfredo Hengari omwedi wa dja ko okwa li a lombwela oThe Namibian kutya Mbumba natango ota ningi omapulaapulo mwaasho shi na okuningwa po.

Minista woundjolowele nonghalonawa yopanghalafano Kalumbi Shangula okwa pula opo edina lonotwaveta li shendje. “Onda fa ndi wete edina lonotwaveta lihe shi liwa, shaashi oli na oitya imwe ya puka. “Ohandi ti mutu ponhele yokuyuufana onotwaveta yokuteya ohombo, ohatu dulu okuyuufana onotwaveta ye ‘xulifepo’ lohombo,” Osho a ti ngaho.