Presidente Netumbo Nandi-Ndaitwah ota katukile ashike minista wounamapya nounaimuna, eeshi, omeva nomatendululo omadu Mac Hengari onghatu ngee okwa tulilwa mo oshibofa shi na sha nomapopyo ekwatokeenghono.
Presidente okwa ulika Hengari a ninge minista moikondo imwe yakula yeliko konima yoshivike – nande oku li koshi yomakonakono opolifi shi na sha nomafeekelo aa, a dja momudo 2024.
Opolifi inai tumbula nande Hengari momukanda wayo oo kwa li wa yandjwa mexuliloshivike, tau ti “otu na omufeekelwa moshikumungu osho shi li koshi yomakonakono”.
Opolifi nande ongaho oya ti, oshikumungu eshi osha dja nale konima yeedula nhano.
Omupopiliko wapresidente Alfredo Hengari Oshoondaxa okwa lombwela oThe Namibian kutya Nandi-Ndaitwah ota kufile ashike minista onghatu ngee kwa patululwa oshibofa pambelewa.
“Omafeekelo omafeekelo ashike. Presidente Netumbo Nandi-Ndaitwah iha kufa onghatu ile a ninge omatokolo she likolelela komafeekelo, ashike okoumbangi. Presidente ota kufa onghatu she likolelela koibofa noumbangi,” Osho a ti ngaho.
Hengari okwa ti presidente natango okwa tala mokuyambula po eyokomesho loshilongo.
Euliko laminista Hengari laNandi-Ndaitwah ola kala tali nyikwaanyikwa konima ashike yefiku eshi kwa li la shiivifwa, osho sha eta omalipulo kombinga yomulandu wopambelewa wapresidente wokuulika eeminista.
Presidente okwa taalela nale omafininiko okudja koshiwana opo a ninge po sha kombinga yaminista woundjolowele Esperance Luvindao, oo naye tashi dulika a taalela oshibofa shopolifi shi na sha momaliumbato opailonga omonakudiwa ehe li nawa.
Omapopyo kombinga yaHengari okwa li a etwa komalungula komukengeleli woimaliwa oo a ninga omunandjungu Michael Amushelelo oshivike sha dja ko, oo a lundila opolifi kutya otai holeke oshibofa osho sha kwatela mo okaana keedula 16.
‘KAPU NA OSHIBOFA SHA KANA’
Komufalandjai wopolifi Joseph Shikongo okwe likanyuna omapopyo oo kutya opolifi oya lundulula oshibofa okudja koshibofa shekwatokeenghono oku shi ninga shoumbudi woimuna ndee tave shi holeke.
“Opolifi yaNamibia otai konakona nawa oshibofa shekwatokeenghono osho tashi popiwa kOshakati shonomola CR73/11/2024.
Ohatu anye omapopyo kutya oshibofa eshi osha kana nondi li apa ndi koleke kutya omakonakono otaa twikile nawa,” Osho a ti ngaho momukanda oo kwa li wa yandjwa mexuliloshivike.
Shikongo natango okwaanya omapopyo kutya opolifi oyaanya okuvatela nakuningwa oshihakanwa oo ta popiwa ile kutya ovanambelewa ove mu ningila omatilifo opo a mwene.
Okwa ti oshibofa osha kala shi li koshi yomakonakono oule weedula nhano molwounene washo.
“Nakuningwa oshihakanwa oo ta popiwa okwa kala nokumona omayakulo a pumbiwa okudja kopolifi yaNamibia nokwa yandja ehokololo laye koshi yeano, osho shi li ombinga yepeko,” Osho a ti ngaho.
Shikongo okwa londoda vali oshiwana opo shiha andjakaneke ouyelele inau kolekwa notau pukifa.
“Ohatu pula keshe oshilyo shoshiwana shi na ouyelele tau dulu okuvatela omakonakono opo a dengele opolifi, ponhele yokuyandja ouyelele komalungula,” Osho a ti ngaho.
OMATILIFO ONGHATU YOPAVETA
Hahende waminista Hengari okwa ninga omatilifo okufutifa Amushelelo molwekakeko loukwatya.
Hahende Loini Shikale-Ambondo Oshoondaxa okwa ti minista Hengari ota ka ninga keshe onghendabala yokuyeleka edina laye konima Amushelelo a ninga omapopyo oo koFacebook momafiku 28 Marsa.
“Omuyakulwa wetu okwe likanyuna omapopyo aa filufilu.
Okwa totwa nokukwetelwe komesho komutitatu. Omapopyo aa keeshi oshili, otaa kakeke, kee na nande oukwashili ile paveta,” Osho a ti ngaho momukanda wa nyolelwa Amushelelo Oshoondaxa.
Shikele-Ambondo okwa kupulashi omafeekelo kutya minista okwa fininika nakunngwa oshihakanwa opo a kufe mo epunda nokwa ti kee li mondjila nokwa nuninwa okweehameka ondjokonona yaHengari.
Hahende okwa ti Amushelelo okwa ti vati omapeko oshibofa okwa li a kana, nande okwa li kwa lopotwa oshibofa shekwatongonga moshitopolwahoololo shaShana koshi yonomola CR 73/11/2024.
Shikale-Ambole okwa pula opo Amushelelo a yandje ouyelele kombinga yaina yokaana nokaana manga omafiku 04 Apilili opo ku ka ningwe omakonakono.
“Hengari okwe likala kutya haye xe yokaana oko taka popiwa noku na ehalo loku ka ninga omakonakono lehangano la nyolifwa ngaashi PathCare opo ku monike oshili.”
Ashike nee, hahende okwa ti kapu na ile omunambelewa womakonakono a dengela Hengari kombinga yoshibofa osho a tulilwa mo shi na sha nomapopyo ekwatongonga.
Hahende okwa ti Amushelelo ota ongele yoo oimaliwa koshiwana okupitila mombaanga ihe na edina yoFNB, vati opo a konge nakuningwa oshihakanwa nokaana.
Okwa pula Amushelelo opo a ningulule omapopyo aye meendelelo ndee ta xulifa po omapopyo a nyika okukakeka oukwatya “ngee okwa dopa okuliufa komalombwelo otashi eta a katukilwe onghatu yopaveta”.
“Ngee owa dopa okulongela kumwe, otu na elombwelo lokukatuka onghatu yopaveta tu ku fininike u yandje ouyelele oo tau pulwa.”
AMUSHELELO INA SHUNA MONIMA
Amushelelo Oshoondaxa okwa ti ina tila okukyfilwa onghatu yopaveta noita ningulula nande omapopyo aye.
“Onaini ovanhu ava tave lihongo kutya itandi tilifwa nande ovanambelewa vaopolifi va homata eendjebo, onghee nee okambaoila ke na oitya otaka tilifa nge ngahelipi?” Osho a ti ngaho.
Amushelelo okwa ti oshikumungu nashi twalwe komhangu yopombada shaashi ite “liufa nande okushimwe shomwaa yo tava pula”.
Okwa pula yoo vali Hengari a fiye po oilonga youminista.
Okwa londoda kutya ngee minista ita xulifa po oilonga, ota twikile nokweeta koluheela oumbangi uhapu.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
