Minista Nandi-Ndaitwah ota ka popitha Esiku lyOmudhingoloko

OMINISTA yOmundhingoloko nOmatalelopo, meme Netumbo Nandi-Ndaitwah, oye ta ka kala omupopi a simina poshituthi shEsiku lyOmudhingoloko mUuyuni, ndyoka nuumvo mu Namibia tali ka dhanenwa mOshakati.

Shika osha tseyithwa kUuministeli mbuka oshiwike shika. Lyoyene esiku ndika ohali dhimbulukiwa momasiku 5 ga June kehe omumvo, ihe Namibia ote li tameke momasiku 4 ga June (ano mEtine sigo nee omEtano lyoyene).
Ngavena gwoshitopolwa sha Shana, tate Clemens Kashuupulwa, oye ta ka taamba ko aayenda omanga Omukuluntu gwOshikondo sha na sha nOmudhingoloko mUuministeli mbuka, Teo Nghitila – ta ka gandja oshipopiwa kombinga yelalakano lyEsiku lyOmudhingoloko.
Omupevikuluntu gwOoprograma dhIigwanahangano mu Namibia, Lebogang Motlana, ota ka gandja oshipopiwa sha Amushanga-Ndjayi gwIigwanahangano shEsiku lyOmudhingoloko mUuyuni.
Meya gwa Shakati, Katrina Shimbulu, oye ta ka gandja omapandulo.
Mu Namibia, Esiku lyOmudhingoloko mUuyuni otali dhimbulukiwa notena tayi ti: ‘Namibia nElunduluko lyOnkalo yOmbepo – Ekatukonkatu megumbo li ekwatelela koonkambadhala dhuuyuni mekondjitho lyelunduluko lyonkalo yombepo.’
Esiku lyOmudhingoloko mUuyuni olya etwa po kIigwanahangano, nelalakano okuuvitha ko aantu muuyuni esimano lyomudhingoloko nokuuvitha ko aanapolitika ya eta po ooveta dhi na sha negameno lyomudhingoloko.
Oshituthi shika otashi ka ningilwa pOsaala ya Leo Shoopala.
Molwashoka Namibia oshilongo hashi mono omvula ontshona na ohashi dhengwa koshikukuta omathimbo ogendji, okwa tegelelwa shi ka dhengwe noonkondo kelunduluko monkalo yombepo.