Omupedu pelesidente woSwapo Netumbo Nandi-Ndaitwah okwa pula ovawiliki novakwateli komesho vongudu opo vaha longife oikulya yoshikukuta va dule okuhoololwa va ye peenhele doilonga mongudu.
Eshi okwe shi popya koshoongaleleilonga shongudu shovaunganeki vopaitopolwa nomauyelele novanambelewa vopaikandjo Etitatu.
“Otu na kukala tushi shi keshe efimbo kutya otwa tumwa koSwapo, ndee itatu ya ashike koSwapo ngee twa hala tu hoololweni tu pewe eemhito doilonga,” Osho a ti ngaho.
Nandi-Ndaitwah okwa kelela ovaunganeki vopaikandjo opo vehe lidope mo metukulo loikulya yoshikukuta oyo ya nuninwa ovanhu ovo tava mono oixuna.
“Konakwiiwa, inatu hala vali okuuda oshinima shi li ngaho kutya omuunganeki woshikandjohoololo ile woshitopolwahoololo ote lidopo moilonga yakamusela woshitopolwahoololo, oo e li oshilyo shoSwapo.
“Osho itashi tambulwa ko, opo tu dule okulonga neepohalama dovanhu vetu. Nashi tameke nopolohala yoshikukuta,” Osho a ti ngaho.
Nandi- Ndaitwah okwa lombwela ovaunganeki vopaitopolwahoololo nopaikandjohoololo opo va efe ookamusela va tukule oikulya yoshikukuta.
“Otwa hala Ovanamibia aveshe va xupe. Ohandi ti inatu kwateleni oikulya yoshikukuta mopolotika. Ohandi ti oshOvanamibia aveshe, shaashi ongongudu ya hoololwa i kale mepangelo omu, otu na okufila oshisho Ovanamibia aveshe keshe apa ve li, ndee ito dulu okwaanyena omunhu oikulya ei,” Osho a ti ngaho.
Nandi-Ndaitwah natango okwa popya kombinga yOvanamibia ovo hava mono oikulya yoshikukuta omanga ve na oiyemo.
“Ava tu na oiyemo, natu efeni ovo vehe na oiyemo va vatelwe, shakenekeni epangelo ondjilakati,” Osho a ti ngaho.
Okatongotongo momavatelo oikulya yoshikukuta otaku tiwa oka ya pombada, nomanyenyeto opaife ahapu ee li kodoolopa yaRehoboth.
Omunapaliamente mu kulu, Jan van Wyk okwa li a pula omuprima minista Saara Kuugongelwa-Amadhila kombinga yoikulya yoshikukuta oyo ihai tukulwa pauyuki.
MuAguste wodula ya dja ko, omukulunhuwiliki mombelwa yomuprima minista, I-Ben Nashandi, okwa li a popya kutya ookamusela nava vatele mokukonga nokushanga ovanhu ovo va pumbwa omavatelo oikulya momikunda.
“Eshi nashi ningwe pauyelele, unene ngaa ngaashi okupitila moyoongalele yovakwashiwana tai wilikwa kovaleli vomikunda opo ku monike nokushangifwe omaumbo oo e li momumbwe yomavatelo oludi eli,” Osho a ti ngaho.
Omundjadjukununi woikwapolotika, Ndumba Kamwanyah, Etitatu okwa ti Nandi-Ndaitwah okwa popya oshinima shi li mondjila, ta weda po vali kutya opu na eyooloko pokati keengudu dopolotika nepangelo ola pumbwa okuyeleka po opo.
“Engudu dopolotika oda pumbwa okulombwelwa kutya ouyelele wepangelo nau kale ounongo woshiwana,” Osho a ti ngaho.
“Omaliko epangelo, omaliko ovanhu ovo hava futu oishoshela yepangelo nomaliko oshiwana inaa longifwa mokuyambuka po ongudu yopolotika nande oimwe. Ondi wete kutya oshiwa eshi a popya kutya oikulya yoshikukuta inai kwatelwa moinima yopoltika,” Osho a ti ngaho.
Shimwe vali, omupedu pelesidente wongudu okwa yandja elombwelo kovaunganeki vongudu novanambelewa vongudu opo vaha kale tava popi novahoololi ngeenge ku na ashike omahoololo.
Oitya yaNandi-Ndaitwah oye ya konima yoivike eshi omuunganeki woSwapo, Bonifatius Munango, kwa li a kapulwa komukalimo womolukanda ledina Mix mOvenduka, oo a ti ongudu ihai wanifa po omaudaneko ayo, ashike ohai alukile ashike konhele oko ngee tai kambainine omahoololo.
“Okupopya novakwashiwana kwetu itaku xululile momahoololo. Nashi kale oshinakuwanifa tashi twikile okupopya novanhu.
“Ovanhu ova hala okutambulwa ko. Ovanhu ova hala okuudika. Keshe osho to mono okudja kovanhu, ou na okushitwala konghatu yelele ya shikula ko, fiyo otashi hange epangelo,” Osho a ti ngaho.
Oshoongaleleilonga okwa li sha ningwa nelalakano lokulombwela ovaunganeki voSwapo koikandjohoololo noitopolwahoolo kombinga yeepolohalama doshiwana, ngaashi omatungo, oshikukuta noilonga yomutengenekwafaneko.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
