mOnandjaba mOkalongo omu na egumbo ewanawa lyaayenda

MONANDJABA mOkalongo ka Haudano mOshitopolwa sha Musati omu na egumbo lyAayenda ewanawa nolyopashinanena naayendindjila lwaahoka kaye li we muudhigu wokwiimonena ehala mpoka taya kala nokulala uuna taya talele po koshitopolwa shoka nenge koondoolopa ndjoka ya Nandjaba nosho tuu momudhingoloko moka.

Egumbo lyaayenda ndika, lyedhina Ketu 2000 Guesthouse and Bar CC,
olyomunangeshefa a tseyika nawa gwokoshitopolwa shoka sha Kalongo tate Josua Mwetupunga.
‘Onda ningi etokolo lyokweeta po egumbo lyaayenda mOnandjaba mOkalongo oshoka sho Okalongo taka ende taka humu komeho ngeyi nondoolopa ya Nandjaba yi li ponkatu yokuhumithwa komeho, omwa pumbwa lela omayakulo gi ili nogin ili gopashinanena mwa kwatelwa ngashi omagumbo gopashinanena gokukalwa nokulalwa kaayenda mboka taya talele po Okalongo nondoolopa ya Nandjaba moshitopolwa shoka sha Musati,’ Mwetupunga ta ti ngawo.
Ta gwedha po ta ti kutya Egumbo lyawo lyaayenda ndika olya kwatela mo oondunda dhokulala dhi li pomithika dha yooloka kumwe noofuto dhadho pasiku limwe noshowo okombitha yokutelaka iikulya yaayenda, oshililo oshiwanawa, Obar yi li pombanda yetungo ndjoka, oshiyogelo shokuyoga oonguyo dhaayenda nohaya yogo wo nodhaakwashigwana momudhingoloko uuna kaye na aayenda oyendji taya yogitha oonguyo dhawo.
Opu na wo ehala lyokupaakinga iihauto yaayenda nOsekuriti ndjoka tayi gamene nawa ehala ndyoka ngashi shi na okukala. ‘Ondi na edhilaadhilo lyokutamununa mo ehala, molwashoka aayenda ohaya kala oyendji nayamwe ya hala po omayakulo gi ili nogi ili ngashi unene okandama kokuyoga nuunima wo wulwe womainyanyudho,’ Mwetupunga ta
ti ngawo nokulombwele The Namibian kutya otaya kembadhala lela okugandja omayakulo ge li nawa kaayenda yawo mpoka nokaatalelipo yalwe yesiku.
Ta ti aaniilonga ye, tate Gerson Neshuku ngoka e li Oshefa, ano Omuteleki
Omukuluntu mEgumbo lyaayenda moka noshowo omuniilonga pamwe naye mokombitha mpoka meme Tulina Antonio, omuyakuli gwaayenda apehe meme Anna Hamunyela, omuyakuli pomathikilo nopoongodhi meme Lydia Sem noshowo meme Menesia Karipo ngoka e li omuyakuli kondjugo yoshiyogelo nayakwawo yalwe, oya longwa nawa iilonga yomOohotela nomomagumbo gaayenda na ke na nande uudhigu nayo mokugwanitha po iilonga yawo yesiku kehe.
Tate Mwetupunga ta lombwele oshigwana shoka tashi talele po Onandjaba mOkalongo moka shaa paluthe nande okutalela po Egumbo lyaayenda ndika.
‘Kutya nee owa hala ashike okwiikutha enota nondjala yomela paendelelo, ila kutse, oto mono eyakulo lyomeendelelo putse mpaka,’Mwetupunga ta ti ngawo.
Egumbo lyaayenda lyawo ndika oli li mokoona yondjila ya Shikuku naandjoka ya Mafo, Okalongo nOmbalantu.