mOshipangelo sha Shikuku namo mwa valwa elongo

OMALONGO onkee taga tsikile nokumonika moNamibia, unene tuu muumbangalantu woshilongo sho meme gwoomvuloa 36 Rachel Johannes a mono elongo, ano uunona utatu pethimbo limwe mOshipangelo shOngeleka ya Katoolika ka Roma sha Shikuku meti 29 Septemba 2009.

Uunona mbuka, uumati uyali nokakadhona kamwe ou li nawa, na meme gwawo Rachel oku li nawa. Meme Rachel ota lombwele The Namibian kutya uunona we mbuka utatu owa gwedha kuukwawo wu li uhamano, mboka mokati kawo mu na aakwana, ano aanona yaali ya monikwa esiku limwe momumvo 1999.Meme Rachel ota pandula Kalunga ke sho e mu pa omagano ge thike mpoka, ashike ota ti nee kutya ye mwene ka longa nokwa pumbwa ekwatho lela meputudho lyuunona we mboka, unene tuu mbuka welongo, ano uuhanona wa pumbwa omahini noshowo iikulya yiitungithi iikwawo.’Onda pumbwa ngashi omahini, iikulya iikwawo yuuhanona, iikutu, Iikelive, ondjato nenge oondjato dhuunona, ominambo , oothewa, omagadhi guunona, oondhikwa, omakende gokukaleka omeya omapyu, ano omakende gOotelemusa noshowo tuu iipumbiwa yimwe yopetameko, ‘meme Rachel ta ti ngawo nokutseyitha wo kutya he yuunona we naye ka longa.Ta indile nee kaasihenda kutya ye mu yambidhidhe moluhepo lwe nduka. Ta ti ongodhi ye hoka ta vulu okumonika oyo 0812239236.Omundohotola gwe, Sylvester Nzenza, ngoka a koleke kutya meme Rachel nuunona we oye li nawa lela, ano ye li monkalo ya nika lela uukolele, naye okwa koleke shoka sha popiwa ku meme Rachel kutya oya pumbwa ekwatho. Ta ti moonkundathana naye okwe mu lombwela shili kutya ka longa nokwa pumbwa noonkondo ekwathelo okuzilila kaasihenda. Omundohotola Nzenza naye ta indile koshigwana oshisihenda shi yambidhidhe meme Rachel noluvalo lwe nduka.Omukuluntu gwOshipangelo sha Shikuku Omundohotola, Samwe Awe, okwa ti kutya oshipangelo osha kala noku pa meme Rachel omahini a pe uuhanona we mbuka utatu, ashike omaipulo oge li nee mpoka kutya ngele okwa shuna kegumbo omahini, iikulya iikwawo niipumbiwa yilwe ote ke yi mona ngiini.Omundohotola Awe ta lombwele The Namibian kutya oya tokola kutya, omolu ompumbwe yiikulya yuuhanona we mbuka ngele a yi kegumbo, meme Rachel nuuhanona we na kale mo natango mOshipangelo uule wiiwike iyali tayi landula okuza nee pehulilo lyoshiwike sha zi ko, opo uunona wu pewe iikulya no u kole nawa manga inau ya kegumbo.’Eeno, ohatu mono ngaa mpaka naampeyaka omalongo, ihe ndika olyo lyotango nuumvo notatu pandula Kalunga pamwe na meme Rachel, sho e tu pa ishewe omagano ge thike mpoka, ‘Matron yOshipangelo sha Shikuku Christine Mayungo ta ti ngawo nenyanyu omanga ta yambidhidhwa kOoseesitela Johanna Shaanika ngoka e li Omukuluntu gwAapangi mOsala yOkanyothi mOshipangelo sha Shikuku, Seesitela Roosa Mwashindange, Seesitela Liisa Kosmas na Seesitela Maria Kassian.Meti 18 Auguste nuumvo, mOshipangelo shepangelo sha Shakati namo omwa monikile elongo ku meme Monika Mutumbulwa, ngoka e li Omoopaleki mOshipangelo shEpangelo sha Shakati. Kakele kelongo ndjoka meme Monika a mono, okwa monene wo omagano guukwana lwaali.Naye wo okwa tile kutya ota pumbwa wo ekwatho okuzilila kaasihenda.