Omufiki wepulu leengobe oo wa holoka moshitopolwahoololo shaShikoto okwa lopotwa kutya owa kwata eengobe di li 196 omo di li 43 da fya nale nokuli okudja muNovemba odula ya dja ko.
Omukulunhu woundjolowele woimuna kombelewa yoinamwenyo moshitopolwahoololo shaShikoto, Lumeta Lomboleni, Etine okwa ti omukifi okwa li tete wa monika momafiku 08 Novemba 2024 moshikandjohoololo shaNehale Lyampingana moshitopolwa shaMangetti.
Okudja opo owe lihanena nee oshitopolwahoololo, nokwa lopotwa unene kutya owa ninga uhapu moikandjohoololo ngaashi Omuntele, Omuthiya, Oniipa, Onayena nEengodi.
“Omafyo e li 22 okwa li a lopotwa moshikandjohoololo shaNehale Lyampingana omo omukifi wa tamekela nomafyo akwao e li 21 okwa li a lopotwa keenhele da yooloka moshitopolwahoololo,” Osho a ti ngaho.
Lomboleni okwa yandja omayele kovanafaalama opo va vende eengobe davo ve di amene komukifi ou.
“Ohatu pula ovanafaalama ovo tava dulu okulanda ovenda opo va vende oimuna yavo iha kwatwe komukifi ou ile va talele po eenhele domomikunda davo pefimbo letu lokuvenda oko ku li taku kufa ombinga paife moshitopolwahoololo opo oimuna yavo i dule okuvendwa,” Lomboleni osho a ti ngaho.
Natango okwa denga omufindo kefimano lokuteelela omafiku 21 a pite po manga oimuna inai twalwa keenhele dimwe opo i pitikwe i ninge eenghono i dule okulwifa omukifi nokukelelwe omukifi waandjakane.
“Ovanafaalama tava tembula eengobe da vendwa otava pulwa va yandje oumbapila vovenda noukende pamwe nomikanda dokushinga eengobe ngee ova venda oimuna yavo voo vene,” Osho a ti ngaho.
Lomboleni okwa pula ovanafaalama opo va twikile okulopota oimuna oyo tai feekelwa kutya oi na omukifi ou keembelewa doinamwenyo di li popepi navo nokutwala oimuna yavo keenhele dokuvendela odo da tulwa po.
“Otwe lipyakidila nokuvenda nohatu pula ovanafaalama va ete oimuna yavo koyuunda yeevenda oyo i li popepi nosho yo keenhele dikwao ngaashi da shiivifwa,” Osho a ti ngaho.Okwa londoda yoo vali kutya ombelela yoimuna ei ya fya komukifi ou inai liwa, ta ti kutya otashi dulika i kale i na oudiyo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
