Minista mukulu weliko nomahangano epangelo Calle Schlettwein okwa ti epangelo nali fimaneke oikumungu ngaashi okuyandja omeva nomayakulo opaundjolowele opamufika ponhele yokutilila ashike oimaliwa mehangano lopashiwana leedila.
Air Namibia okwa kala nokuhepeka oimaliwa yovafuti voishoshela eedula dihapu.
Omapopyo aSchlettwein okwe ya konima minista woilonga noyeendifo Veikko Nekundi a popya kutya ehangano leedila ola pumbwa okupatulululwa, nomapulaapulo okwa teelelika a ka tameke diva.
Omapopyo aNekundi okwa li eendululwa kehangano loikundaneki lepangelo New Era, ta ti ehangano leedila oli li moinima yotete yepangelo.
Schlettwein okwa ti ehangano leedila okwa li la teka po konima yomaupyakadi ahapu nomapekapeko a ningwa kombinga yalo inaa eta po sha.
Minista mukulu okwa lombwela oThe Namibian kutya epangelo ola pumbwa okufimaneka oinima ya fimana ponhele yehangano leedina olo ihali di oiyemo nandenande.
“Ehangano leedila laNamibia okwa li la pata shaashi ihali ningi nande oiyemo. Aae, inamu dja sha nandenande. Ngee otwa hala oku li alula, otwa pumbwa okudilaadila nawa ,” Osho a ti ngaho.
Schlettwein okwa ti omapekapeko aeshe a ningwa kombinga yehangano eli okwa dopa.
“Ondi shi omapekapeko ahapu a ningwa moAir Namibia. Ndee aeshe okwa dopa. Inaa eta po osho omunhu a hala okumona, oiyemo,” Osho a ti ngaho.
Okwa ti etomeno limwe olo la dopeka ehangano leedila laNamibia eendjila dile.
“Namibia oku li kokule nomandiki aeshe. Onghee omalweendo otaa kala alushe e na ondilo.
Ndee okutunga ehangano leedila komalipulo kutya otwa hala yoo okukala tu na eedila dopaunyuni otashi ningi okumona mo oiyemo kudjuu neenghono.
“Opu na oinima ihapu ya fimana tamu dulu okulongifwa oimaliwa ponhele yokupatululula oAir Namibia. Otwa pumbwa omatungo ahapu omeva moshikondo shomeva, oyeendifo, omaumbo, eefikola, noundjolowele . . .
“Onghee nee kwaame Air Namibia ke shi oshinima sha fimana,” Schlettwein osho a ti ngaho.
Momudo 2020, Air Namibia okwa li a yandja omukandafaneko wopangeshefa oo tau pula oshimaliwa shi fike peebiliyona N$4.7.
Epangelo okwa li la itavela okuyandja eengunga deemiliyona N$500 kehangano leedila laNamibia momudo 2019.
Eyambidido eli okudja komukufimbinga walo akula okwa li la nuninwa okwaalula eedila di li nhano meedila davo di li omulongo opo kuyambulwe po omayakulo omeumbo, koitopolwahoololo nosho yo opaunyuni.
Okwaalula Air Namibia oshinima shimwe shakula momaudaneko oSwapo, oo a ningwa omukanda womilandu wopambelewa.
Omunawino moinima ya pamba omaxupilo kehangano ledina Cirrus Capital Tannan Groenewald okwa ti edilaadilo eli otali ulike ashike kutya oshilongo inashi lihongela ko kepuko lasho lotete..
Okwa ti Air Namibia “oproyeka ihe na eshi tai eta po”.
“Epangelo ola pumbwa oimaliwa ihapu, onghee nee osho osha hala kutya otwa pumbwa okweehela oimaliwa ihapu i ye koAir Namibia, osho sha hala kutya otekisa yOvanamibia otai ka futa oshinima eshi,” Groenewald osho a ti ngaho.
Omapopyo kutya okutota ehangano leedila otashi ka shonopeka eendado dokutuka, kee shi oshili shaashi ovanhu itava mono oimaliwa ya wana okulanda outekete, osho a ti ngaho.
“Opelesenda ashike imwe oshinghwanyu mbali yOvanamibia kwa li ya longifa eedila momudo 2023, neepelesenda di li 65 dOvanamibia ovo ve na oilonga ihadi mono nokuli oshimaliwa sha wana komwedi va mone okatekete kokwaaluka okuya koSouth Africa, onghee nee kapu na nande omunhu ta xupu koimaliwa ihe fike poN$5 000 komwedi ta ka fimaneka okweenda modila.”
Omunawino moinima ya pamba omaxupilo Omu Kakujaha-Matundu okwa ti etokolo nali ningwe kwatalwa koumbangi, ndee ha komaliudo.
Okwa ti ouwa ou li apa kutya oproyeka kai shi ipe, osho tashi pula ku talwe komivalu dikulu.
“Epangelo nali tale omivalu odo tali longifa oumbangi oo u li po tau popile epatulululo lalo,” Kakujaha-Matundu osho a ti ngaho.
Okwa ti oproyeka nai ye ashike komesho ngee omauwa okudule osho sha ya mo.
“Natu tule po omaliudo ndee okupatululula Air Namibia taku kanghamekelwa komilandu dongeshefa. Napa kale omapuko ashona paife.”
ONDJOKONONA
Manga inali patwa, Air Namibia okwa li ha tuka a yuka keenhele di li 11 koEuropa, koumbuwanhu waAfrica nomoshilongo.
Momudo 2021, minista mukulu weliko Iipumbu Shiimi okwa li a shiivifa kutya ovafuti votakisa ova longifa oshimaliwa shi fike peebiliyona N$8.4 moule weedula omulongo da pita di kulile mo ehangano leedila opo liha mbangolote.
Pefimbo lepato lehangano eli muAuguste 2020, omaliko alo okwa li e na ongushu yeemiliyona N$981 muAuguste.
Epato lehangano eli ola eta pexulilo ehangano olo la pula epangelo oshimaliwa shoku li kulila mo oule weedula 20.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
