Namcor okwa taataya Mulunga

Ewilikongudu likulu lehangano lomahooli laNamibia ledina National Petroleum Corporation of Namibia (Namcor) Etine loshivike shadja ko ola taataya omukulunhuwiliki walo Immanuel Mulunga.

Namcor okwa li a koleka oshinima eshi shekufomoilonga onguloshi yEtine loshivike sha dja ko.

“Ewilikongudu koshoongalele shalo osho kwa li sha ningwa momamafiku 08 Auguste 2024 okwa li la kundafana kombinga yoihokolola oyo i li metifa yomaliumbato ehe li nawa e na sha nomaliko inaa pitikwa oo a monika komukulunhuwiliki oo a tulwa pedu, Mulunga,” Ewilikongudu osho la ti ngaho momukanda Etine.

Omukanda natango owa popya kutya “sha landula eenghundafana, ewilikongudu ola tokola okuxulifa po omayakulo aMulunga, meendelelo ngaashi tashi dulika.

Ewilikongudu ola itavela kutya omaliumbato ehe li nawa omukulunhuwiliki okwa kula nokwa yeleka etokolo olo la kufwa.

“Ewikilikongudu ole lipaka mo mokukwashilipaleka elunduluko lelelo liwa notali ka yandja ouyelele wa wedwa po ngee sha pumbiwa.”

Mulunga onguloshi yEtine loshivike sha dja ko okwa ti ke na nande ouyelele kombinga yexulifepo loilonga yaye shaashi kakwa li e li mo moshilongo.

“Ondi shi shi kutya opu na omukanda wa teelela nge mongula ndee kandi shi naashi shi li mo nokuli.”

Eshi oshe ya konima oihokololaputudo Etitatu ya mona kutya kakwa li a pewa eenghono dokutula kumwe epangelo mongeshefa yomahooli yaAngola oyo kwa li ya teelelika i pule ovafuti voishoshela yokongulu oshimaliwa shi fike peebiliyona N$8.

Shimwe vali, ehangano lomahooli lopashiwana okwa li la fininikwa opo li fute oshimaliwa shi fike peemiliyona N$415 oshinima osho ewilikongudu la ti okwa li shi kumwifa neenghono, olo kwa li tali lundilwa nokuli kutya otali kofa moilonga.

Omauyelele aa oku li mepangulo lomafiku 07 Auguste 2024, olo la mona kutya Mulunga ke na ondjo konghandangala oyo a dana mokutuma oshimaliwa shomahooli osho tashi nyenyetwa kuvahapu osho kwa li tashi feekelwa kutya kashi li pauyuki kewilikongudu odula ya dja ko.

Oihokololaputudo okwa li ya ningwa okudja momudo 2023 fiyo 2024, nokwa li ya kwatelwa komesho komhupanguli womatalululoindilo e li moshipundi shetulumuko womhangu ya shi ya ko Gerhard Maritz.

“Etokolo lange moihokolola ei i li ominge nomunailonga ole li kutya omanyenyeto aeshe e li ominge naye moihokolola omu okwa kupulwashi,” Maritz osho a ti ngaho mepangulo laye olo kwa li la ningwa Etitatu la dja ko.

Omanga oThe Namibian inai uda ekufomoilonga laMulunga Etine, Mulunga okwa ti okuudite ehe na ongunga.

“Onda kala ndi shi shi kutya inandi ninga sha shapuka, ashike eshi okuhena ondjo kwa yela, tete okudja koAnti-Corruption Commission (ACC) ndee paife okudja moihokolola ye lifikamena po. Ouyuki owa longwa,” Osho a ti ngaho.

Omwedi wa dja ko oThe Namibian okwa li ya lopota kutya okwa li pu na eenghendabala dokudimbulukifa omunashipundi woihokolola opo a manife oihokolola omanga Juni ina fya.

Eedjo di li meni loNamcor oda itavela kutya Maritz okwa danena oshibofa.

Oda ti efindano laMulunga kali shi laalushe, shaashi omukulunhuwiliki oo a tulwa pedu oku na oibofa ikwao mwa kwatelwa ongeshefa yomidjalo dovakwaita nehangano loEnercon yongushu yeemiliyona N$60.

Namcor, odjo oya ti, otai dulu okukelela Mulunga aha alukile kehangano lomahooli lopashiwana.
Omukandailonga womukulunhuwiliki owa ya fiyo omodula tai ya muKotoba.

Eengudu edi oda kala di li meenghundafana opo di topoke nawa, ashike etokolo laxuuninwa otashi dulika li ka piyaaneke oinima.
OSHOONGALELE SHEWILIKONGUDU

Mokati koihokolola yaMulunga ewilikongudu okwa li la ninga oshoongalele momafiku 19 Novemba 2021. Okwa li okoshoongalelele, eshi ewilikongudu la ti, Mulunga kwa li a tuma oshimaliwa shi fike peemiliyona N$123 okudja kombaanga yoNamcor okuya kehangano lomahooli laAngola omanga kwa li inashi kolekwa, omo a ninga omakengelelo. Maritz okwa ti ewilikongudu ola pa Mulunga eenghono opo a dule okuvatela Namcor a kufe ombinga meengeshefa dimwe.