Namibia a mona ishewe aakwiita aape ye li 1048

ETANGA lyEgameno lya Namibia lya mona po ishewe aakwiita aape ya gwedhwa po konima sho mEtitatu lyoshiwike aamati naakadhona aagundjuka ye li 1048 ya piti eilongo lyawo lyUukwiita.

Oministeli yEgameno MayolaNdjayi, Charles Namholo, ta yambidhidhwa kOondjayi dhe dhIita ngashi, ku Komanda gwEtanga lyEgameno MayolaNdjayi Peter Nambundunga nokOmulongi mOsikola yAakwiita BrigadiyaNdjayi Joseph Kakoto nayalwe, oye a pititha aakwiita aape mbaka, sha ningilwa pOkamba yAakwiita pOluno mOndangwa.Kalele kOondjayi dhIita odhindji dha li mpoka, Minista yEgameno Namholo okwa li wo a ende pamwe nOminsita ye yOpevi yEgameno tate,Victor Simunja Omukwaniilwa gwOndonga tatekulu Immanuel Kauluma Elifas nOmalenga ge gamwe ngashi Omunashipundi gwElelo lyOndonga Elenga enene Peter Kauluma, Omukwaniilwa gUukwanyama meekulu Martha Mwadinomho Nelumbu nOmalenga ge, Elenga enene lyUukwambi tatekulu Herman Iipumbu na meme Iipumbu, Gavena ya Shana, Klemens Kashuupulwa, Gavena ya Shikoto Penda yaNdakolo, Gavena ya Musati Sackey Kayone, Meya gwa Ndangwa tate Naftal Andimba nOmupeha gwe meme Letty Tuutaleni.BrigadiyaNdjayi Kakoto, sho a taamba Ominista naanashituthi ayehe okwa tumbula nokuyelitha kutya Osikola yAakwiita aape mboka oya kwata oomwedhi omugoyi. Ta ti oya li ya taamba aailongi ye li 1055, ashike mboka ya mana oye li ashike 1048. Ta ti yamwe oya za mo kuyoyene mOsikola, yamwe taya tidhwa mo omolu okuhavulika omanga gumwe a si moshiponga shokwiimangeleka. Mokati kawo, Ndjayi Kakoto, ta ti, omu na aalumentu ye li 620 noomeme ye li 428. Ndjayi Kakoto ta ti, ayehe oya longwa nawa lela uukwiita wopetameko nevuliko noya ulika ye shi, shi noya tokola okukala taya vulika. Ndjayi Kakoto ta ti wo kutya, kakele kokulongwa Uukwiita, oya longwa wo nkene ye na okwiigamena komukithi omudhipagi gwo HiV/AIDS na nkene ye na okwaandjaganeka uuyelele mokati koshigwana wu na sha nekondjitho lyomukithi nguka omudhipagi gwo HIV/AIDS, unene tuu yoyene ya kale yi igameka kokukala nomuholike gumwiike we mu inekela, okwiikaleka kokule nomilalo inadhi longekidhwa nenge okulongitha Okoondoma.Ndjayi Kakoto ta pandula ayehe ye ya kwathela pethimbo lyeilongo lyoonakupita mbaka.mOshipopiwa she oshinene shokupata omadhewo/eilongo lyUukwiita ndika lyopetameko, Minista YEgameno MayolaNdjayi kwali gwEtanga lyEgameno lya Namibia, okwa pandula sho a mona ompito yoku ya a pitithe aailongi niilyo iipe yEtanga lyEgameno, shoka shi li oshikando shotango okuningilwa pondje yOkamba onene yAakwiita mOshilongo. Minista Namholo ta ti epito ndika oli li etimugoyi okuza sho ya tameke nelongo lyAakwiita moNamibia momumvo 1996.. Minista Namholo ta ti aamati naakadhona mbaka taya piti ngeyi oyo mboka ya zile mongundu onene yaanona ya valelwa kOmbanda, oothigwa, mboka ye li moluhepo noshowo mboka aakuluntu naavali, mboka ya kalele meni lyoshilongo noya monene iihuna omolu ekondjelomanguluko.Minista ta ti Omadhewo ngaka, ano elongo ndika olya li lya pewa edhina lyi ikalekelwa kutya ‘Oprojeka yOsipesiala’. Shi ikwatelela ashike kutya mboka ya li ya kuthwa nokulongwa oyomoongundu dhini, ngashi dha tumbulwa metetekelo.Minista ta ti ekuto lyaakwiita aape naagundjuka okuza kIitopowla ayihe 13 ya Namibia osho oshinakugwnaithwa shEpangelo, kukolekwe aluhe Etanga lyEgameno lya Namiba, na inashi ikwatelela unene koshinima shokutya iilonga. Ta ti Uukwiita eiyambo enene lyomuntu ti iyambele oshilongo she noku na okukala i ilongekidha okuya apehe mpoka ta tumwa a ka longe iilonga yegameno, kutya nee omeni nenge opondje yoshilongo ngashi kOmatumo gIigwanahangana hoka. Paukwaita. Minista ta ti Etanga lya Namibia, ohali kutha ombinga momatumo gIigwanahangana, lya li wo lya ka gandja ekwatho lyOpakwiita ko DRC pokati komvula 1998 no 2002. Tali ganda wo mboka ya li ya hala okukutha ko Caprivi ku Namibia momumvo 1999, na UNITA ngoka a li ta piyaganeke kOKavango noshowo kOshitopolwa sha Hangwena momimvo ndhoka.Minista Namholo ta tseyitha wo kutya pethimbo ndika Omapangelo gOmuumbugantu wa Africa, ano mOshitopolwa sha SADC, omwa etwa edhilaadhilo lyokutota po Etanga lyEgameno lya gwedhwa po lya SADC. Minista Namholo, okwa indila nee kiilyo iipe yEtanga lyEgameno mbika kutya yi kale yi uvite uuntsa sho yi li mEtanga lyEgameno muka, ashike yi kale yi shi shi kutya mEtanga lyEgameno kamu na okakombo ilitha. Omwa pumbwa omuntu ho vulika. Kamu ningwa omahoolomadhilaadhilo. Ta ti ngele omu na yamwe ya kuthile ombinga momahololomadhilaadhilo, na ya kale ya dhimbwa sho ya ninga.