Namibia ke shi wete nawa mokukelela ombuto yoHIV mounona

Ounona ve dulife po7 000 moNamibia otava lumbu nombuto yoHIV-AIDS, omwaalu waxuuninwa wa pitifwa koministili youndjolowele nomayakulo opanghalafano osho wa holola ngaho.

Omwaalu wa pitifwa Etivali okwa li wa kwatela mo omudo 2023.

Omwaalu wombuto tai tandavele natango ou li pombada, oministili osho ya ti ngaho.

Omanga omwaalu womafyo a etwa kombuto yoHIV-AIDS tau shuna pedu, oministili oya holola kutya omafyo ovanhu tava lumbu nombuto otaa i unene pombada molwo o-TB.

“Omwaalu womafyo molwombuto otaa u pedu, ashike itaa endelele unene. Otwa didilika omafyo ahapu mokati kovanhu ve na ombuto molwa o-TB,” Oministili osho ya ti ngaho.

Oministili youndjolowele nomayakulo opanghalafano, melongekumwe noUNAIDS, Etivali oya shiivifa kutya Ovanamibia ve li lwopo228 538 otava lumbu nombuto yoHIV-AIDS.

Oshinima eshi okwa li sha shiivifwa momukandatengeneko woHIV womudo 2024.

Omatengeneko oHIV, oo haa pitifwa keshe kodula, okwa holola kutya ovalumenhu ve li lwopo79 627 novakainhu ve li 148 911 otava lumbu nombuto yoHIV moNamibia. “Etengeneko eli otali ulike kutya ovakainhu vahapu otava lumbu nombuto yoHIV shi dulife ovalumenhu,” Oministili youndjolowele osho ya ti ngaho momukanda wokoikundaneki.

Oministli youndjolowele oya ti okukelela oHIV movanhu veedula 15 fiyo 49 oku li peepelesenda 9.7, omo mu na eepelesenda di li 12.7 dovakainhu neepelesenda di li 6.6 dovalumenhu.

Oministli oya didilika ovanhu vape ve na ombuto yoHIV ve li 6 049 , omo mu na ovakainhu ve li 3 955 novalumenhu ve li 2 094.

Namibia natango okwa lopota omafyo a etwa koAIDS e li 3 657. Momwaalu omu, omu na ovalumenhu ve li 1 543 novakainhu ve li 2 116.

Oministili oya ti oya hala okuungaunga noshinima eshi shombuto tai i pombada unene.

Omupopiliko wehangano noIntrahealth Selma Shiwaya Etivali okwa lombwela oThe Namibian kutya Namibia oku li pondodo iwa mounyuni nande natango okwa hala ngaa okudja po pondodo opo e li.