Presidente Netumbo-Nandi Ndaitwah okwa ti kutya Namibia ota dulu okuwilika oshikondo shaye shoundjolowele nosho yo eepolohalama daye dimwe domayambulepo puhe na eyambidido okudja kehangano laAmerica ledina United States Agency for International Development (USAID).
Pefimbo lomapulaapulo nehangano loikundaneki lopaunyuni ledina Al Jazeera mexuliloshivike, Nandi-Ndaitwah okwa ti Namibia okwa mona owino wa wana wokutwikila neepolohalama daye nande presidente waAmerica Donald Trump okwa yandja elombwelo kukalekwe manga omavatelo aa koilongo yaAfrica.
“Keshe elunduluko otali dulu okukala li na owii pakafimbo.
Ashike ondi na oku ku lombwela kutya otwa ninga elunduluko liwa ngee tashi ya kokuwilika oHIV-AIDS. Otu li oshilongo shimwe shomoilongo oyo ya ninga elunduluko liwa,” Osho a ti ngaho.
Omapopyo aye okwe ya konima epangelo laTrump la shiivifa muFebuluali kutya omavatelo oilongo oyo opo tai putuka otaa tetwa, osho sha kuma neenghono oundjolowele neeproyeka domayambulepo mounyuni.
Odula ya dja ko, Namibia okwa li a mona oshimaliwa shi fike lwopeemiliyona N$700 sheepolohalama daye doHIV-AIDS.
Omido da dja ko, USAID okwa pandulile Namibia kutya oku li umwe womoilongo oyo ya lopota nawa okushonopeka okutandaveleka omukifi voHIV okudja kumeme wa yuka kokaana pefimbo lokunyamifa.
Momudo 2024 Namibia okwa li yoo vali a pandulwa kehangano loundjolowele lopaunyuni eshi a pondola okulwifa okutandaveleka omukifi okudja mumeme ta nyamima okuya mokaana.
Nandi-Ndaitwah okwa ti okwa itavela kutya owino oo wa monika okudja kepangelo laAmerica otau ka pitika Namibia a twikile nokuyandja omayakulo opaundjolowele nokuya komesho neepolohalama daye domayambulepo.
Enyamukulo laye ola landula omalimbililo kutya otashi dulika oHIV i ka ye pombada osho tashi dulika shi shunife monima eyokomesho olo kwa li la ningwa po fiyo opapa.
Nandi-Ndaitwah natango okwa holola kutya Trump okwe mu tumina omahalelo yambeko sha landula eshi a nangekwa ongopresidente yaNamibia, nokwa tuma ovanhu ve uye ponhele yaye.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
