NamPower ta ka teta ko olusheno lwaamboka ye na oondjo

Omupevipresitente gwehanganokalelipo lyaanangeshefa lyedhina Namibia Local Business Association (Naloba), Peter Amadhila okwa popi kutya aanangeshefa oya kumwa noonkondo ketseyitho lya ningwa kutya olusheno otalu ka tetwa ko moondolopa ndhoka dhi na oondjo dholusheno lwaNamibia Power Corporation (NamPower), osho wo iitopolwa yomonooli yoshilongo mbyoka hayi pewa olusheno kehangano lyokwaandjaganeka olusheno lyo-Northern Regions Electricity Distributor (Nored).

NamPower ehangano ndyoka hali gandja olusheno koondolopa, nomalelo giitopolwa osho wo komahangano ngoka haga andjaganeke olusheno ngaashi Nored, Cenored, Erongo Red.

Ehangano lyo-NamPower mOmaandaha olya tseyitha kutya otali ka tula miilonga elandulathano lyokuteta ko olusheno lwaNored, lwelelo lyoshitopolwa sha//Kharas, osho wo lwoondolopa 18 moshilongo.

NamPower okwa popi kutya oondjo ndhoka dhi li moshigwana odhi li pobiliyona yimwe, nota kambadhala okutula po omulandu ngoka tagu ka thiminika aantu ya fute oondjo ndhoka.

Nored okwa andjaganeka olusheno kiitopolwa yomonooli yoshilongo ngaashi shaKunene, shaMusati, shaShana, shaHangwena, iitopolwa iyali yaKavango, oshitopolwa shaZambezi osho wo ombinga yimwe yoshitopolwa shaShikoto.

Omalelo goondolopa ndhoka dha gumwa ketokolo tali ka tulwa miilonga kuNamPower, ongaashi yaRehoboth, yaMariental, yaKarasburg, yaGobabis,yaAranos osho wo Maltahöhe.

Oondolopa dha gwedhwa po ongaashi yaGibeon, Bethanie, Tses, Koës, Leonardville, Berseba, Kalkrand, Stampriet, Gochas, Witvlei osho wo Aroab.

Ondolopa yaVenduka, Groot Aub osho wo Brakwater nayo oya kwatelwa mo.

Okupitila metseyitho ndyoka lya gandjwa kuNamPower, otaya ka tula miilonga omulandu gwokuteta ko olusheno moondolopa dha tumbulwa pombanda okuza momasiku 5 Juni, notashi ka ningilwa mboka ye na oondjo dholusheno.

“… shila oongele oondjo ndhoka dha futwa ko manga esiku ndyoka inaali adha,” osho NamPower a popi ngaaka okupitila metseyitho.

Amadhila okwa popi kutya Naloba ota kondema lela etokolo ndyoka “pakuudha”.

OMULANDU GWOKUDHIMA OLUSHENO

Pauyelele wa zi kuNamPower, omulandu gwokudhima nenge okuteta ko olusheno, otagu ka kala gu na oonkatu omugoyi, notagu ka temeka sho olusheno talu kala tango halu tetwa ko uule woowili ne moshiwike, sigo tashi ka thika ponkatu yokuteta ko olusheno uule woowili hetatu mesiku ngele omuntu okwa kala inaa futa oondjo dhe muule woonkatu ndhoka.

NamPower okwa popi kutya omwaalu gwaamboka ye na oondjo otagu kala nokulunduluka ethimbo nethimbo sho ookastoma tadhi futu ko oondjo dhawo.

Omasiku ga zi ko ongunduwiliki yokukondolola olusheno moshilongo oya gandja epitikilo kuNamPower opo a gwedhele olusheno ndoka ha gandja.

“Kehe gumwe okuwete uuwinayi woshizemo shokuteta ko olusheno shoka tashi ka gwedha komutengi gwegwedhelo lyondando yolusheno.

Ongeshefa otayi ka dhengwa pevi, onkalo yokwaana iilonga otayi yi pombanda, oluhepo niimbuluma otayi indjipala noonkondo, noshigwana ashihe otashi ka kolola ombinzi,” osho Amadhila a popi ngaaka.

Amadhila okwa popi kutya onkalo yoondolopa dhina oondjo dhaNamPower, kayi shi ompe, oya kala po okuza nale.

“Oshinima shoondjo osha kala ko nale notashi tsikile okukala po kutya nee eliko olya humu komeho,” osho a popi ngaaka.

Amadhila okwa popi kutya NamPower okwa pumbwa okulombwela oshigwana uushili kutya etokolo lyokuthiminika aantu ya fute ko oondjo dholusheno otali thindilwa kongudhi kuSouth Africa.

“Uushili oomboka kutya ethindilo kongudhi otali zi kuSouth Africa . . . okuhulitha po euvathanotsokumwe naNamibia lyelando lyolusheno tashi etithwa kompumbwe yolusheno moSouth Africa,” osho Amadhila a popi ngaaka.

Onzonkundaneki ndjika oya pula omukuluntuwiliki gwaNored, Fillemon Nakashole, a tye ko sha kombinga yetetwo ko lyolusheno, ashike okwa lombwele onzonkundaneki ndjika yi pule uuyelele komupopiliko gwawo, Simon Lukas .

Lukas okwa yamukula tati: “Otatu ka yeleka kombinga yaampoka twa thikama, momukokomoko gwoshiwike. Itandi vulu okutya ko sha mongashingeyi.”

Onzonkundaneki ndjika oya kwatathana nondolopa yaRehoboth, ndjoka oyo yimwe yomoondolopa ndhoka dha gumwa, nomupopiliko gwondolopa yaRehoboth, Desire Pieters, okwa popi kutya ondolopa yawo inayi yakula natango etseyitho lyopambelewa okuza kuNamPower.

“Tse otwa mono owala etseyitho ndyoka moshifonkundaneki. Onkene ‘katu na shoka tati ti ko’,” osho a popi ngaaka.

Cenored ehangano lyokwaandjaganeka olusheno mondingandinga yoshilongo, hali kutha olusheno kuNamPower, nolya popi kutya ohali shilipaleke kutya olya futa oondjo kuNamPower pethimbo.

Omupopiliko gwaCenored, Charlie Matengu, okwa popi kutya ongehangano lyokwaandjaganeka olusheno, oye na oshinakugwanithwa shokushilipaleka kutya olusheno olwa futwa.

“Ohatu shilipaleke – kutya nee otashi pula tu tokelitha oondjambi dhetu opo tu fute oondjo dhetu dholusheno.

Cenored ita kwataakwata oku shi ninga. “Etetwo ko lyolusheno, oshinima shoka inaatu tsakanena nale. Tse hatu kala nuupyakadhi wa sha kombinga yetu,” osjho a popi ngaaka.

Okwa popi kutya iitopolwa mbyoka ya gumwa ketokolo ndyoka lyokuteta ko olusheno, otayi ka mona iihuna.

“I ipula owala oongeshefa ndhoka dhi na iinima hayi ningi nayi mbala nenge oongeshefa dhaapashiyoni.

Onkalo ombwinayi lela, ashike nando ongaaka, otatu indile aantu ya tule po omulandu naNamPower gwokufuta oondjo dhawo opo ya kale ye li megameno olusheno lwawo kaalu tetwe ko,” osho Matengu a popi ngaaka.