OMUHOOLOLWA PELESIDENTE Netumbo Nandi-Ndaitwah okwa ti kutya opu na ovanhu ovo ve mu halela oudu nomatilifo okwa ningilwa onghalamwenyo yaye.
Nandi-Ndaitwah oshinima eshi okwe shi popya koshoongalele shefindano loSwapo mOvenduka Olomakaya.
Nande okwa ti onghalamwenyo yaye oya ningilwa omatilifo, ina yandja nande oumbangi wa yela tau popile omapopyo oo.
“Kashi shi oshiholekwa kutya opu na ovanhu ovo va hala okumona oinima ii handi i ningilwa. Itave shi dilaadila paife. Ova kala tave shi dilaadila.
Momudo 2017, okwa li nda ya moshiponga shohauto. Ovanhu vamwe okwa li va ninga oivilo shaashi okwa li ve shi ‘okwa li a fya’.”
Ashike nande ongaho, Nandi-Ndaitwah okwa ti ovanhu vahapu ohava ilikanene oukolele waye.
“Opu na vahapu ovo hava indilile omwenyo ou, omutima ou, olutu eli notava twikile okwiilikana,” Nandi-Ndaitwah osho a ti ngaho.
Okwa ti vali okuuka pexulilo lomudo 2022, okwa li a dengelwa komutoolinghundana oo e mu pula opo a tye ko sha komapopyo kutya okwa li ta ka xulifa momudo 2023.
“Oshoshili, omutoolinghundana umwe okwa dengela nge ta pula nge epulo olo,” Osho a ti ngaho.
Okwa ti ngee opu na ovanhu ovo va hala onghalamwenyo yaye i xule diva, nashi kale.
Nandi-Ndaitwah okwa denga omufindo kutya pefimbo loikonga yomahoololo omudo ou, okwa li pu na eenghundana doipupulu kutya okwa li e li moshipangelo kOpuwo nOkonandjokwe.
Nandi-Ndaitwah okwa ti okudja momudo 2022, konima kwa li a tameka okuninga oikonga, ina enda moshipangeleo ile a kwatelwa meembete moshipangelo.
Ashike nee, okwa popya kutya “oshinima sha nyika oshiponga” okwa li sha holoka kuye momafiku 26 Oktoba odula ei.
Okwa ti ongudu yaye yovayakuli vopaundjololwele oye mu lombwela kutya osho kwa li sha ningwa po kakwa li nande shopaunamiti. Ashike, ina popya nande shihapu kwaasho kwa li sha ningwa kombinga yaye.
Pefimbo opo, okwa li kwa lopotwa keshe pamwe kutya Nandi-Ndaitwah okwa li e lidenga po koshoongalele shoSwapo osho sha li kOtjiwarongo.
Mefiku omo, hamushangandjai woSwapo Sophia Shaningwa okwa li a londoda ‘ovalodi” opo va efe Nandi-Ndaitwah.
Okwa ti opu na ovanhu vamwe kwa li va tengeneka kutya Nandi-Ndaitwah ota ka ombokelwa kOtjiwarongo.
“Shi xulifei po meendelelo. Nashi kale shaxuuninwa handi udu oshinima eshi,” Shaningwa osho a ti ngaho.
Komufalandjai wopolifi inspkta Joseph Shikongo okwa ti ota dulu ashike okutya ko sha ngee okwa mono ouyelele wopambelewa kombinga yokuponokela onghalamwenyo yomuhoololwa pelesidente.
“Kombinga yeameno, otwe lilongekida okwaamena keshe umwe moNamibia oo onghalamwenyo yaye tai ningilwa omatilifo, kutya nee okwa dja kongudu yomilameno ile kongudu tai pangele,” Shikongo osho a ti ngaho.
Omupedu hamushangandjai woSwapo Uahekua Herunga Oshoondaxa kakwa li ta dulu okukoleka ngee opu na ngaa omumbwe yokupopya kombinga yeameno laNandi-Ndaitwah, ta ti “ongudu inai kundafana kombinga yoshikumungu eshi”.
MuJuni odula ei, oshilyo shongudumutima yoSwapo Martin Shalli okwa li a pula oilyo yongudu novayambididi opo va ilikanene Nandi-Ndaitwah shaashi opu na ovo va hala a kanife oukolele.
Shalli okwa li ta popi koshitufi sha li kOnyaanya moshitopolwahoololo shaShikoto.
“Kalunga na kale pamwe nokandidate yetu omufimanekwa Netumbo. Ne mu yambeke. Efilonghenda lomwene nali mu shikule keshe opo ta i. Atushe natu mu ilikaneneni shaashi opu na ovo ve mu halela owii,” Shalli osho a ti ngaho.
MuFebuluali omudo ou, ohauto yaNandi-Ndaitwah yoilonga okwa ya dja omwifi eshi kwa li ashike e li pokudja poHeroes’ Acre konima yefudiko lanakufya pelesidente Hage Geingob. Ongudu yaye yeameno okwa li ya endelela i mu alule mo.
Momafiku 29 Novemba odula ya dja ko, osheeshindifo sha Nandi-Ndaitwah shimwe okwa li sha kwata omundilo manga kwa li tashi ende. Kapu na nande oshiponga shasha kwa li sha lopotwa nohauto okwa li ya pya po filufilu.
MuDesemba omudo 2017, Nandi-Ndaitwah okwa li a xupa moshiponga omanga kwa li e li koitopolwa yokonooli yaNamibia.
Pefimbo opo ohauto yaye okwa li ye lidenga mumwe nokatalaka kashona. Okwa li kwa lopotwa kutya ovanhu vavali ova xulifila moshiponga omo. Omapopya omadipayo keeshi ape kovaleli voilongo. Omapopyo oo okwa li yoo e ya pefimbo lomahoololo aGeingob.
Kaume kaye kopofingo efimbo olo, minista mukulu wouyuki Sacky Shanghala, okwa li a endululwa koThe Namibian momudo 2014, taa ti opu na eenghendabala dokudipaya Geingob.
Geingob yeemwene okwa li a koleka kutya oku shi shi kombinga yeenghundafana di na sha nomwenyo waye.
Manga osho inashi ningwa, pelesidente mukulu Hifikepunye okwa li ongudu yaye yeameno ya nghonopekwa momudo 2005 omanga kwa li e li omuhoololwa pelesidente.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
