Natango gumwe a sa moshiponga

OMUKWASHIGWANA gumwe okwa si sho ohauto moka a li mo ya kandomene pokati kOshakati nOmungwelume ongulohi yEtiyali lyoshiwike sha yi.

Nakusa otaku tiwa, oye Risto Ndakile Shaakumeni gwomomukunda Otuwala mUukwambi mOshitopolwa sha Shana. Eso lya Shaakumeni moshiponga shika shOhauto olya eta omwaalu gwoonakusa miiponga yiihauto mOnooli yopokati okuza meti 28 Septemba 2011, paantu omilongombali nayahamano (26)Omasiku ga zi ko Opolisi oya lopota kutya omukwashigwana gumwe a mana oondjenda dhe mEtitano lyoshiwike sha zi ko sho ohauto ye ya kandomene lwopOnyati mOndonga mOshitopolwa sha Shikoto.Omulumentu omugundjuka gwopOndangwa mOshitopolwa sha Shana, Heimo Kweenda, naye a sile mOshipangelo shEpangelo sha Shakati oshiwike sha zi ko, konima sho a kandomene nohauto meti 28 Septemba 2011.mOshiponga osho tuu shoka sha faalela ngashiingeyi omwenyo gwa Kweenda, osha li sha faalele omugundjuka, Ananias Keendjele Kambedhi gwokOnashitendo mUukwaluudhi. Ayehe yaali oya li haya longele mOkampani yIipoleki yedhina Lewis pOndangwa. Omaso gaambaka yaali oga eta nee omwaalu gwaantu mboka ya sa miiponga yiihauto okuza meti 28 Septemba 2011 paantu 25.Opolisi ya Shana oya tseyitha kutya omulumentu gwoomvula inadhi shiwika natango, gwedhina Fillipus Shikwiyu, momwedhi gwayi sho a si eso lyombaadhilila sho ohauto ye ya kandomene lwopOnalunike lwaampoka mondjila onene ya Ndangwa nOmuthiya. Kutya oshiponga osha etwa naanaa koshike, inatu vula oku shi pewa nawa kOpolisi kwali manga. Inapu pita omasiku ogendji sho Opolisi ya Shana ya li ya tseyitha kutya omukwashigwana gwoomvula 31 Matheus Ngonga okwa si eso lyombaadhilila sho ohauto ye ya kandomene lwopOnethindi mOndonga moshitopolwa sha Shikoto meti 4 Novemba 2011, omanga aakalimo yatatu ya si wo moshiponga shi nyanyaleka sheidhengomumwe lyiihauto iyali yUutekisa mondjila onene ya Shakati nOkahao. Opolisi otayi indile koshigwana shi hinge nuukeka no neidhidhimiko.