‘OMUNONA gwkondjelomanguluko’ ngoka taku fekelwa a dhipagwa kopolisi oshiwike sha zi koota fumvikwa ongula mOlyomakaya komukunda gwawo kOkongo koshitopolwa shaHangwena. Omunamimvo 26, Frieda Ndatipo, meme gwaanona ye li yatatu okwa hulithile ngawo sho pwa holokele eipumomumwe pokati kopolisi nongundu ‘ynaanona yekondjelomanguluko’.
Aanyasha mboka otaku fekelwa ya li yu umbu opolisi nomamanya na osho nee she eta aapolisi nayo yu umbe. Kapitiya Erastus, ngoka e li omupopiliko gwongundu ndjoka ‘yaanona yekondjelomanguluko’ okwa ti ke na uuyelele wothaathaa kutya nakusa Frieda Ndatipo otaka fumvikwa naanaa peni nokwa ti yo kefumviko lye itaya yi ko shaashi kaye shoka taya yi nasho kOnooli.
“Kehe gumwe oku uvithwa nayi kushoka”, kapitiya Erastus a ti ngawo nokugwedha po kutya yo itaya teka omukumo notaya tsikile nokukondjitha ngaashi naanaa aavali yawo kaa ya li ya teka omukumo mokukondjela emanguluko lyevi ndika lyomapendafule.
Erastus otati otaya tsikile sigo ayehe ya pewa iilonga kepangelo nokwiindile aanona yanakusa Frieda Ndatipo ya kale mesiloshimpwiyu lyepangelo. Sho a li a pulwa kombinga yaashoka taku fekelwa kutya oyi iteyele mositaasi shopolisi shaKatutura nokumangulula mukwawo, Erastus okwa ti opolisi otayi toto ashike omahokololo. “Opolisi oya li peni? Otashe ende ngiini omuntu a ye mosela nokumangulula mo mukwawo? “, kapitiya Erastus a pula ngawo. Ooyakwawo mboka taku fekelwa ya li yi iteyele moka nokumangulula mukwawo oya holokele mompangu mOmaandaha, na inaku gandjwa epitikilo yi ifutile mo mokalimosho. Oyo nee Titus Iita (31), Martin Shikongo (33), Teobard Kahala (32), Toivo Mwatile (29) naJohn Shikenga (30).
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
