Nekundi okwa lombwela ehangano lokuwilika eendjila lilonge onhopa yoAris meendelelo

Minista woilonga noyeendifo Veikko Nekundi okwa pula opo ehangano lokuwilika eendjila laNamibia ledina Road Authority (RA) opo li ninge eindilo loipumbiwa lomeendelelo li wapaleke onhopa yoAris oyo kwa li ya teka po kodula oshivike sha dja.

Onhopa oyo ya teka po oya fiya ovakalimo vokoRehoboth ovo have ya okulongela kOvenduka keshe efiku vehe wete kutya otava ningi ngahelipi.

Onhopa oyo i li mondjila yoB1, i li eekilometa 30 koumbuwanhu waVenduka, okwa li ya teyaulwa po neenghono komeva efundja a etwa kodula yakula oyo ya li ko.

Nekundi okwa ti onhopa kakwa li tai dulu okuwapalekwa noya pumbwa okupingenwa po nonhopa i na eebaana mbali.

Minista, oo kwa li a ka talela onhopa, okwa yandja omayele komukulunhu wehangano lokuwilika eendjila Conrad Lutombi opo a kendabale a ninge eindilo lokukonga oipumbiwa lomeendelelo opo ku kwashilipalekwe kutya onhopa ipe oya manifwa pefimbo.

“Ondi wete kutya ohandi dulu okuyandja elombwelo lopamulandu shi na sha nouwa woshiwana.

Itatu dulu okulongifa omukalo oo hau longifwa shito wokukonga oipumbiwa, oo hau pula eemwedi neemwedi. Onghee nee, ondi na nonda dama natango keemhango dopaulumomumbwe dokukonga oipumbiwa,” Nekundi osho a ti ngaho.

Minista natango okwa li a talela ondjila yongushu yeebiliyona N$10, oyo kwa li ya tungwa opo ku kelelwe ofina yomauto ahapu unene mondjila oyo i li pokati koshilando noumbuwanhu waNamibia, ya ya fiyo okeengaba daSouth Africa.

Minista okwa pandula ehangano olo tali longo ondjila oyo, eshi la tunga po ondjila imwe oyo tai longifwa paife.

“Okwa li va twalwa ko divadiva, ndee okwa li va longa ondjila oyo ya ningilwa okupitika omahauto a yuka kombinga imwe e li avali,” Minista osho a ti ngaho.

Lutombi okwa ti oilonga yonhopa yoAris otai ka pula eemwedi di li heyali lwaapo opo i manifwe.

“Ou shi kombinga yonhopa oyo ya teka po, opo twa ninga ondjila yopakafimbo paife, nohatu longo opate yaalushe, i na eendjila mbali.

“Nokonima, otwe lineekela okwiipatulula moule woivike ivali. Notu li yoo vali twe lipyakidila nomafaneko okutungulula onhopa ei.

“Okulongulula otashi dulika ku tu pule eemwedi heyali, onghee nee kashi shi oshinima tashi dulu okuningwa meendelelo.

Otu na okukwashilipaleka kutya otwe i longa pamukalo oo tau dulu okupitika eenghono domeva oo twa didilika.

Onghee nee oya pumbwa okulongwa pamukalo wopamufika lela,” Osho a ti ngaho.

Lutombi okwa ti okwa teelela olopota i na ouyelele wa wana kutya eendjila moshilongo oda mona oixuna i fike peni.

Okwa weda po kutya ondjila oyo ya dja mondjila oyo yaHosea Kutako ya yuka kOvitoto oya patwa manga shaashi oya mona oixuna neenghono kodula.

RA okwa kufa eenghatu dokupata ondjila ikulu yopokati kOvenduka nOkahandja, shaashi onhopa pokati kOsona Village nOsona Military Base oi na omadidiliko okuteka po.