Etokolo longudumutima yoSwapo opo i nuke po oshoongalele osho hashi hoolola pelesidente wongudu naashi ya koleka Netumbo Nandi-Ndaitwah opo a ninge omuhoololwa pelesidente wongudu otali shekwa kovanhu vahapu neenghono.
Ovaleli vamwe vongudu otava ti ekotamhango longudu ola piyaanekwa opo li twe kumwe nelelo olo li li ko paife.
Oshilyo shonguduwiliki yoSwapo (Politburo) Sisa Namandje, mOlomakaya okwa fatulula ekotamhango longudu kombinga yoshoongalele shokuhoolola pelesidente ngee pelesidente wongudu a fi.
“Ekotamhango otali pula opo ku ningwe oshoongalele kongudumutima moule weemwedi nhatu ngee omhito youpelesidente kai na omunhu.
“Inali tya ile inali pula kutya oshoongalele nashi pulwe shi ningwe nde tashi kala ko meemwedi odo nhatu oshita,” Eembapila detokolo lokangudumutima odo oThe Namibian ya lesha osho da ti ngaho.
Oilyo imwe yongudu oya pula kutya omolwashike Namandje kwa li a pewa eevili mbali, omanga hamushanga woinima ya pamba oveta yoSwapo, Pohamba Shifeta opo a li.
“Oikundaneki otamu ti kutya okwa li a kolekwa. Kapu na ekoleko moSwapo. Koshoongalele, Nandi-Ndaitwah okwa li omunashipundi, omupedu pelesidente nomuhoololwa pelesidente wongudu oye auke. Kashi shi ekondjifafano olo?,” Oshilyo shimwe shongudumutima sha handuka osho sha ti ngaho. Omanga oshoongalele inashi ningwa, Swapo okwa tota po okakomisi opo ka kundafane kutya olye ta i ponhele yapelesidente Hage Geingob eshi a xulifa. Oshilyo shokakomisi nomupedu minista womidingonoko, omakuti nomatalelepo, Bernadette Jagger, okwa ti oidjemo yongudumutima otai tu kumwe naasho sha monika kokakomisi oko ka hoolola ou tai ponhele yaGeingob.
Oilyo imwe yongudumutima kakwa li ya hafela omatokolo okakomisi aka.
“Okwa li ndishi otwa ifanwa opo tu ungaunge noinima ina sha nekotamhango, ashike osha ka kala vali ehongo . . . itatu lwile eenhele, otwa hala ashike ekotamhango li landulwe,” Oshilyo shimwe shongudumutima osho sha ti ngaho.
Ongudu tai lele paife otai ningilwa omatilifo opaveta.
Oshilyo shimwe shongudu, Reinhold Shipwiikineni Etine loshivike sha dja ko osha shangela Nandi-Ndaitwah omukanda okupitila muhaende waye Titus Iipumbu, tashi ti nakuningwe oshoongalele moule weemwedi nhatu molwaefyo laGeingob. Shipwiikineni Oshoondaxa okwa ti okwa itavela kutya ekotamhango okwa li la tewa koshoongalele osho sha li ko Olomakaya.
“Efatululo olo Namandje a yandja ola fa ashike lomuningi woinyandwa. Ovanhu inava lesha ashike ekotamhango shama va lesha nokwaamena omauwa avo vene,” Osho a ti ngaho.
Oshilyo shimwe osha ti kutya Namandje okwa ngwangwanekwa shaashi oku li oshilyo shopolitburo.
Okwa ti kutya Namandje ina yandja nale omadilaadilo opaveta omanga ongudumutima inai ninga etalululo.
“Kakwa li shi li pauyuuki. Okwa li shi na okuningwa konima yoshivike ile ivali opo tu leshe nawa oveta.
“Moshoongalele, okwa li twa lombwelwa opo tu itavele, medina loukumwe, kamwa li okuhoolola ile okuulika eenyala mombada.”
Namandje ina nyamukula nande omapulo Oshoondaxa.
Koshoongalele osho sha li kombelewa ya kula yoSwapo mOlomakaya, Namandje okwa ti ovo ve udite kutya ekotamhango longudu oye li fininika opo i ninge oshoongalele shokuhoolola pelesidente moule weemwedi nhatu konima eshi pe na omhito youpelesidente ova puka.
“Ekotamhango longudu ola pula kutya naku ifanwe ku ningwe oshoongalele meemwedi odo, ashike inali tya naku ningwe oshoongalele pefimbo olo,” Osho a ti ngaho.
Omundjadjukununi woikwapolotika Ndumba Kamwanyah, okwa ti ongudu oya tala unene komafatululo oitya. “Ondi wete kutya ongudumutima oya kundafana oshinima sha puka. Kakwa li va pumbwa va kundafane ekoleko laNandi-Ndaitwah ongaomuhoololwa pelesidente wongudu. “Okwa li va pumbwa okukundafana omikalo dokuninga oshoongalele moule weemwedi nhatu,” Osho a ti ngaho. Kamwanyah okwa ti ekotamhango ola yela.
“Okuufana otashi ti moule weemwedi nhatu i fana opo ku ningwe oshoongalele shokuhoolola pelesidente, opo nee tapu holoka kutya otashi ningwa naini opo.
Okufatulula oitya nokuluufa keeveta odo omikalo ashike dokuhenuka oshoongalele shiha ningwe,” Osho a ti ngaho.
OMUPELESIDENTE WOMUKULUKADI
NANDE pu na omalipulo aa, Nandi-Ndaitwah mOlomakaya okwa ninga omuhoololwa pelesidente wongudu tai pangele oo te ke i kalela po momahoololo muNovemba, tashi dulike tashi mu ningi omupelesidente wotete waNamibia omukulukadi.
Ongudu natango oya tokola opo i ka ninge oshoongalele eshi momafiku 19 Apilili 2025.
Hamushangandjai mu kulu woSwapo nominista yoikwameni kwa li, Pendukeni Iivula Ithana, okwa twa kumwe nehoololo opo Nandi-Ndaitwah a ninge omupelesidente wongudu. Etumwalaka laNujoma okwa li la leshwa kuKuugongelwa-Amadhila ponhele yaye.
“Oinima aishe oya enda nawa,” Nandi-Ndaitwah osho a lombwela oThe Namibian konima yokafimbo kashona eshi oshoongalele shongudumutima sha dja mo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
