NFA ta ka pula nkene oshimaliwa shoomiliyona N$15 tashi longithwa

Ehangano tali wilike okatanga kokoompadhi moshilongo lyedhina Namibia Football Association (NFA) olya popi kutya otali ka pula nkene oshimaliwa shoka tashi zi koAfcon noBrave Warriors shi na okulongithwa.

Osipana yopshigwana yoBrave Warriors okwa li ya kutha ombinga muudhano wekopi lyokatanga kokoompadhi menenevi Africa tawu ithanwa Afcon moka ye shi pondola okuya kedhingoloko lya landula ko lyoosipana 16 dha hugunina, noya pewa olupandu lwoshimaliwa shoomiliyona N$15.

Uudhano mboka otawu dhanenwa koCôte d’Ivoire, noshilongo shaNamibia osha ningi ondjokonona sho she shi pondola lwotango okuya kedhingoloko lya landula muudhano mboka.

Uuna osipana tayi shi enditha nawa nokuya kedhingoloko lya landula ko ohayi pewa olupandu lwoshimaliwa sha kola.

Omupresitente gwoNFA, Robert Shimooshili, okwa koleke kutya Namibia okwa pewa olupandu lwoomiliyona N$15, ashike elelo lyoNFA otali ka kundathana nepangelo kombinga ya nkene oshimaliwa shoka shi na okulongithwa.

Namibia medhingoloko lyoosipana 16 dha hugunina, okwa li a taalele Angola mOlyomakaya ashike okwa dhengwa ookoola 3-0 naashoka oshe eta yu umbwe mo muudhano mboka wekopi ndyoka lyoAfcon.

“Eeno, otatu ka pewa ooUS$800 000, ngaashi shi li muuyelele woondando oompe tadhi futwa oosipana okuza koConfederation of African Football (CAF),” osho Shimooshili a popi ngaaka.

Nokwa gwedhapo kutya NFA otaka tala kutya oshimaliwa shoka otaye shi longitha ngiini.

“Okomitiye yelelo lyoNFA otayi ka ninga oonkundathana nepangelo ya tokole kutya oshimaliwa shoka otashi longithwa po ngiini,” osho a popi ngaaka.

Shimooshili okwa gandja omapandulo koBrave Warriors sho ya ningi ondjokonona, ashike okwa gwedhapo kutya okutula mo ookoola kwa Namibia okwa li kwa nika iipa yombwa.

“OBrave Warriors oya dhana nawa lela, oku undula okatanga yu uka komeho, otse kwa li dhingi koAfcon ashike okutula mo ookoola kutse okwa li sha nika uunkundi. Ashike nando ongaaka, oku shi pondola tuye kedhingoloko lyoosipana dha hugunina 16, oshinima lela tushi uvitile etumba,” osho a popi ngaaka.

Olutuwiliki lwoCAF okwa li lwa tseyitha kutya oshimaliwa shoka tashi pewa mboka taye shi enditha nawa mekopi ndyoka lyoAfcon osha gwedhelwa noopelesenda 40, naashoka otashi ti kutya ngoka ta ka sindana po ekopi lyonumvo ota ka pewa olupandu lwoomiliyona US$7 (shi thike poomiliyona N$131,5).

Ngoka teya omutiyali ota ka pewa olupandu lwoomiliyona US$4 (Shi thike poomiliyona N$75,1); mboka taya ka hugunina muudhano mboka ye li yane kehe oshilongo otashi pewa US$2,5 (shi thike poomiliyona N$47); mboka taye keshipondola okuya miilongo ihetatu tayi hugunine mo kehe gumwe ota pewa oomiliyona US$1,3 (shi thike poomiliyona N$24,4).

Shoka otashi ulike egwedhelo lyi li pombanda lyolupandu muudhano woAfcon. Omimvo 10 dha piti, omusindani gwekopi oAfcon okwa li owala ha pewa oomiliyona US$1,5 (shi thike poomiliyona N$28), omanga Senegal ngoka a sindana po ekopi ndyoka omimvo mbali dha piti okwa li a pewa okapandi koomiliyona US$5 (shi thike poomiliyona N$94).

ETUMBA LYOMUDHEULI

Omudheuli gwosipana yopashigwana, Collin Benjamin, okwa popi oku uva nayi okukala u umbwa mo muudhano mboka wekopi lya Africa, ashike osipana ye oku uvitile etumba.

“Otu uvite etumba lyaashoka twa pondola po – osha li ontseyo ombwanawa ndjoka ya monika kaadhani yandje. Otwe shi pondola okuthika ponkatu ndjoka, nongaashi nde shi popi ohela, kutya ngoka kwa li a shanga omishangwa kali nande e wetele Namibia mongundu yoosipana 16 dha hugunina, onkene tse otu uvite etumba, ashike ngashngeyi otatu ka longa twa tula ombunda moshihwa.

Ondiwete kutya kehe okanona okaNamibia oka mona kutya otashi vulu okuningwa, otu na okutsa ondjodhi ashike ondjodhi oyo awike itayi vulu oku ku fala konkatu ya landula ko, otuna okulonga neitulemo,” osho a popi ngaaka.

Benjamin okwa gwedhapo kutya uudhano Afcon 2023 ka wa li owala kombinga yetanga lyookompadhi ashike owa li wa kwatela mo iinima oyindji.

“Oosipana ndhoka kwa li dha talika ko kutya odhi sindikwe kadhi sindikwe we, molwashoka aadheuli nayo oye na ontseyo, aadhani otaya dhana lela ponkatu yi li nawa naadhani oya sa ondjala. Ngele owa tala omadhina ngoka taga zi menenevi ndika, nena oto mono kutya Afcon ke li owala kombinga yuudhano wetanga lyokoompadhi, ashike omithigululwakalo dhAafarica okwa li dheya pamwe, iitalenti yAafrica oye ya pamwe noku ulika kutya tse [ongaAfrica] osho twa kalelapo shoka, oku ulika kutya tse aaAfrica, Africa olyetu, ewanawa, nuuyuni awuhe ngashingeyi owe tu tala, ndele haadhani owala oyo ayeke kwa li ya taliwa,” osho a popi ngaaka.

“Ngele owa tala elandulathano lyaahuka, nowa tala shoka omupresitente Alassane Ouattara e eta mpaka osho wo shoka tashi longwa koCAF, otashi fuula. Uupale owo ndondo yopombanda, iikwaniipangitho oyo ndondo yopombanda noonzo dha longithwa odho ndondo yopombanda. Oopate oompe otadhi tungwa, ndika enenevi tali humu komeho, enenevi li na oonkondo, notali popitha uuyuni tali ti hallo, hallo, Africa oye nguka.

Onkene oshinima kashili owala kombinga yetanga lyokoompadhi, ashike enenevi tali itumbula muuyuni kutya natse opo tuli niinima yetu oyondondo yopombanda,” osho a gwedha po ngaaka.

OMAUVANEKO OMAPE

Minista gwiipambele yomakwatathano gopaigwana, Netumbo Nandi-Ndaitwah okupitila momukanda gwiikundaneki ngoka gwa pitithwa mOsoondaha okwa pupula kombunda shoka oBrave Warriors ya ningi koAfcon.

“Nonande oya dhengelwa medhingoloko etiyali, oBrave Warriors oyu ulike oonkondo noya kala ya kwata pevi okuza petameko lyomaudhano,” osho a popi ngaaka.

Nandi-Ndaitwah okwa popi kutya epangelo olyi itula mo mokuyambula po aakwathitho niikwaniipangitho yomaudhano moshilongo osho wo okuyambidhidha oBrave Warriors. “Sho epangelo lyi itula mo mokuhwepopeka iikwaniipangitho yomaudhano, otatu indile oshigwana shi yambidhidhe oBrave Warriors nokatu na omalimbililo kutya osipana yetu otayi tsikile nokutu uvitha etumba. Otuna omukumo kutya otaya ka kala nokutula mo ookoola odhindji nokusindana omaudhano ogendji,” osho a popi ngaaka.