NGOKA a li ngoloneya gwoshitopolwa shaHangwena Usko Nghaamwa (78), okwa popi kutya omakwatho nomayambidhidho ngoka ha gandja koosikola moshitopolwa she oge mu tulitha momakana gaantu moka yamwe nokuli taya indile opo a ningilwe omakonakono guulungililingi.
Mboka ye li ompinge nomakwathoyambidhidho ngoka haga kutatekulu Nghaamwa ha gandja koosikola ngaashi goshimaliwa, giitungithi osho wo giikumbatha nomalapi, otaku hokololwa ye wete ta longitha oshimaliwa shoka sha pumbwa okuningilwa omakonakono gaampoka hashi zi.
“Omolwashike ye na owala uupyakadhi naUsko? Yamwe oye na nokuli nuulongelwe wonkatu yuudegree. Ngame inandi mona elongo, ashike ongame ishewe haya kala ya tila [ngame] ngu he zala oombulukweya oombwiinayi,” osho Nghaamwa a popi ngaaka.
Ngoloneya omukulu okwa popi kutya oshimaliwa ngashoka a gandja kehumokomeho lyosikola osho wo koshiputudhilolongo sho-Namibia University of Science and Technology (Nust) moshitayi shomEembaxu popepi nEenhana, okwe shi longela yemwene nuudhigu.
Okwa popi kutya ye oku na ombepo nomutima gokukwathela oshigwana.
“Aantu otaya popile ndje muuwinayi, ashike ihandi longitha iimaliwa yawo. Kandi shi aakwanezimo yawo. Ohandi longitha oshimaliwa shandje mwene,” osho a popi ngaaka.
Nghaamwa okwa popi kutya okwa tameke nale okukala ta gandja omakwatho koosikola manga inaa ningwa nokuli kansela gwaHangwena nolwanima sho a ningwa ngoloneya.
Okwa popi kutya okwa li wo a tembudhile aayelele kegumbo lye ndyoka tali adhika momukunda Oipapakane nokwa li e ya tamekitha osikola.
“Otaya ningi nawa lela miilonga yawo yosikola. Onde shi nyanyukilwa,” osho a gwedha po ngaaka.
Nghaamwa okwa popi kutya aantu yamwe otaye mu popi kutya omakwatho ngoka ta ningile oshigwana, ote ga ningi molwashoka okwa hala okushunwa mombelewa yuuleli woshigwana.
“Uuna nda gandja omakwathoyambidhidho, aantu ohaya tila ndje. Ohaya kala taya ipula mbela kutya onda hala okugaluka ndi kuthe po iipundi yawo. Aantu yatya ngaaka aagoya,” osho a popi ngaaka.
Okwa popi kutya ke na nande ohokwe yokushuna mombelewa, nokwa popi kutya oshimaliwa shoka e na osha gwana oku mu yambidhidha, opamwe nofamili ye osho wo aaniilonga ye.
Ngoloneya omukulu okwa popi kutya oha longitha oshimaliwa shoomiliyona N$1,4 komwedhi okufuta aaniilonga ye mboka “haya longo nuudhiginini”.
Okwa popi kutya okukala keeli we mombelewa yepangelo oshe mu pa ompito nemanguluko lyokupenduka osho wo okukotha ethimbo a hala, osho wo oku ka lya mpoka a hala.
Okwa popi kutya ke na uuza, ye ishewe ke na esiku a ka kale u uvite ezaza.
“Uupyakadhi owu li ashike maantu mboka ye na ondjala. Uuna ya thigi po oombelewa ohaya tondokele komalelo gopamuthigululwakalo ya ka konge iilonga yuumwene womikunda,” osho Nghaamwa a popi ngaaka.
‘KANDI SHI OMUSIMANEKWA ‘
Nghaamwa, ngoka a kala ngoloneya gwoshitopolwa shaHangwena okuza momumvo 2005 sigo opethimbo a yi moshipundi shevululuko mo2020, okwa popi kutya mombelewa yuungoloneya inaya mo nande nelalakano lyokukala ta tumbalekwa nokwi ithanwa “omusimanekwa”
“Okwiithanwa omusimanekwa kashi shi sha kungame. Ngame omuntu handi ilongele nuudhiginini osho wo ofamili yandje. Aantu ngiika otaya ipula onda hala okutota po ongundu yandje yopapolitika. Shoka kandi na esiku ndi shi ninge. Kalunga ota yambidhidha ndje. Aantu oya sila ndje efupa,” osho a popi ngaaka.
Nghaamwa okwa popi kutya muule wethimbo a kala mombelewa yokulongela oshigwana, okwa adhika nale omunangeshefa, oshoka okwe wu tameke mo1967.
Okwa popi kutya okwa li ha longo kondhalate mo1964 hoka a li ha futwa ooranda 1,50.
“Onda kala handi landa iinima yandje, ngame otandi landitha. Inandi sholola. Onda longa nuudhiginini molwashoka inandi hala ondjala. Onda nwitha mo aantu oyendji mboka ya tameka oongeshefa dhawo, nongashingeyi otaye shi enditha nawa,” osho Nghaamwa a popi ngaaka.
OMWAKWATHOYAMBIDHIDHO
Ngoloneya omukulu okwa popi kutya okwi ipyakidhila nokutungitha okapangelo ka nuninwa unene oshigwana shaayelele shoka hashi mono iihuna oku ka thika kiipangelo.
“Aantu oyendji otaya hulitha komukithi gwonkana, molwashoka kapu na okapangelo,” osho a popi ngaaka.
Okwa popi kutya kosikola yedhina Oshikunde Combined School ndjoka tayi adhika moshitopolwa shaHangwena okwa li a gandja ko ekwatho lyoshimaliwa shooN$100 000, nokuli oye kahewa gosikola ndjoka.
MuFebuluali omumvo gwa zi ko, Nghaamwa okwa gandja ekwatho lyomaloli ga hamano goondhopi dhokwakola opo dhi tungithwe osaala yokulila aanasikola posekundo yedhina Omungwelume Secondary School.
Oondhopi ndhoka okwa popi kutya odhe mu kotha ooN$195 000.
MuKotoba 2021, Nghaamwa okwa gandja ekwatho lyoshimaliwa shooN$100 000 koshiputudhilolongo shaNust moshitayi shEenhana.
MuFebuluali 2020 okwa gandja ekwathoyambidhidho lyomatalashe 52 kosikola Onambutu Combined School yi li moshitopolwa shaHangwena.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
