EHANGANO lyoRoads Contractor Company (RCC) okwa kundanekwa hali longitha oshindji momauwanawa gaamboka haye li longele mushoka shaamoka kutya otaya hilile mboka ye na ontseyo nuunongo moka omanga inaaku landulwa omilandu dhehangano ndyoka lyo-RCC.
Oonzo odha gandja oshiholelwa shaangoka a keelela po manga poshipundi shuuwiliki wehangano ndyoka lyo-RCC, Pieter Oosthuizen, ngoka a kala mehangano ndyoka lyo-RCC okuza muNovomba gwomumvo 2012.
Oosthuizen ngoka oshinakugwanithwa she shokulonga ooproyeka ndhoka tadhe eta mo iimaliwa mo-RCC moka okwa kundanwa ha pewa ondjambi yooN$100 000, mwa kwatelwa oshimaliwa shuuwanawa wolukalwa noshoshenditho ihe okwa kala megumbo lyo-RCC oshali noha hingi oshitukutuku (oshihauto) shehangano tuu ndyoka lyo-RCC.
Okwa kundanekwa wo Oosthuizen ha gwedhelwa ko yilwe kondjambi ye hoka shoka she eta a kale komwedhi ha pewa ondjambi yi vulithe N$138 000, ihaku zi nando osha shiifendela yepangelo.
Oshifo shika shoThe Namibian osha kundanekwa wo kutya otashi vulika Oosthuizen a kale wo ha pewa uuwanawa wontumba sho a keelela po poshipundi shuuwiliki wehangano ndyoka lyoRoads Contractor Company (RCC).
Oonzo odha ti sho ehangano ndyoka lyo-RCC lya tameke oku mu nana oshimaliwa shi thike poodola dhaNamibia omayovi omulongo kondjambi ye yokomwedhi sho ha longitha oshitukutuku (oshihauto) shehangano ndyoka lyo-RCC, Oosthuizen okwa nyenyeta shoka kewilikongundu lyo-RCC, newilikongundu ndyoka lyo-RCC olya gandja elombwelo opo Oosthuizen iimaliwa mbyoka a adhika a nanwa nale e yi shunithilwe nokuhulithwe po shoka shokunana oshimaliwa shoka kondjambi ye yokomwedhi.
Oosthuizen okwa kundanekwa ha longitha oshihauto sho4x4 Mitsubishi Pajero nokwa kundanwa wo ha pewa oshimaliwa shomahooli kehe omwedhi shoodola dhaNamibia omayovi gane nomathele gatano (N$4 500).
Oshifokundaneki tuu shika shoThe Namibian osha lopotele omvula ya zi ko kutya ehangano ndyoka lyo-RCC olya landela Oosthuizen egumbo, na omo ha zi moka ihaa futu nando oshimaliwa shasha komwedhi, sho nee a kala nee moka.
Uuyelele okuza koonzo owo mbono kutya egumbo ndyoka ngele olya thithwa po oli na okukala hali futilwa kehe omwedhi oshimaliwa shi thike poodola dhaNamibia omayovi omilongo mbali nagatano (N$25 000).
Oonzo odho tuu ndhoka mehangano ndyoka lyo-RCC odha ti Oosthuizen mokondalaka ye ndjoka a pewa omu na kutya kondjambi ye itaku kala haku nanwa iifendela yasha.
Shoka oshe eta nee Oosthuizen a kale hi ifutile yemwene iifendela koshikondo shokufuta iifendela moshilongo nuuwanawa mboka okwa kundanwa wu niwe wo kuyalwe yatatu yopondje mboka ya kutwa miilonga kehangano tuu ndyoka lyo-RCC.
Mokuyamukula komapulo ngoka oshifo shika shoThe Namibian sha li sha pula, Oosthuizen okwa tya ehangano lyawo ndyoka lyo-RCC ohali iyutha lela kushoka shi na okukala sha gwanithwa po kushoka shiifendela.
Ehangano ndyoka lyo-RCC okupitila muOosthuizen olya zimina wo kutya mboka ya za pondje oya kutwa lela kehangano ndyoka lyo-RCC. Oonzo odha ti Oosthuizen okwiishangitha ashike shi nasha nokufuta iifendela muKotoba nuumvo omanga a kala ha longele nale ehangano ndyoka lyo-RCC okuza muNovomba 2012.
Ngoka ta pewa uusama mushika oye omunashipundi gwewilikongundu lyehangano ndyoka lyo-RCC, Sonia Bergh, sho a kundathana shi nasha nokondalaka ndjoka, ya gandja uuwanawa lela kuOosthuizen shi vulithe ehangano lyoyene ndyoka lyo-RCC.
Omapulo ngoka ga li ga tuminwa ehangano ndyoka lyo-RCC oga yamukulwa kuOosthuizen yemwene ngoka a tindi okugandja uuyelele womuule shi nasha nokondalaka ye ndjoka yiilonga naamboka yopondje haya longele ehangano ndyoka lyo-RCC tati uuyelele ite wu gandja shaashi kawu shi wokutseyika kukehe nowopaumwene lela.
Nonando Bergh okwa tya omapulo ngoka ga pulwa ehangano ndyoka lyo-RCC naga yamukulwe komupopiliko gwehangano ndyoka, Gerson Karaerua, Oosthuizen omapulo ngoka ga pulwa ehangano ndyoka lya yama kepangelo lyo-RCC oye e ke ga yamukula.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
